ប្រជាពលរដ្ឋដែលមានជម្លោះដីធ្លីមកពីខេត្តក្រចេះ ព្រមានចេញដើរជាថ្មីនៅក្នុងទីក្រុងភ្នំពេញ
ចាប់ពីថ្ងៃចន្ទសប្តាហ៍ក្រោយនេះតទៅ ក្រុមប្រជាពលរដ្ឋដែលមានជម្លោះដីធ្លីមកពីស្រុកស្នួលខេត្តក្រចេះ នឹងចាប់ផ្តើមដើរដង្ហែដាក់ញត្តិទៅកាន់ស្ថាប័នធំៗជាថ្មីម្តងទៀត ប្រសិនបើអាជ្ញាធរមិនដោះស្រាយបញ្ហាដីធ្លីរបស់ពួកគេឲ្យបានឆាប់។ ការដើរដង្ហែដាក់ញត្តិនៅក្នុងទីក្រុង នឹងបង្កការឈឺក្បាលកាន់តែខ្លាំងថែមទៀត សម្រាប់អាជ្ញាធរទីក្រុងភ្នំពេញ។ តែអាជ្ញាធរអះអាងថា កំពុងដោះស្រាយ។
ចុះផ្សាយនៅថ្ងៃ៖
ស្តាប់ - ០១:៥៤
ប្រជាពលរដ្ឋមកពីស្រុកស្នួលខេត្តក្រចេះ នៅថ្ងៃសុក្រទី២៩សីហានេះ បានអំពាវនាវឲ្យអាជ្ញាធរខេត្តក្រចេះ ប្រញាប់ប្រញាល់ក្នុងការដោះស្រាយបញ្ហាដីធ្លីរបស់ពួកគេ និងកុំពន្យារពេលតទៅទៀត។ ប្រជាពលរដ្ឋជាង១០០នាក់ តំណាងឲ្យប្រជាពលរដ្ឋ៣៨០គ្រួសារ ដែលមានជម្លោះដីធ្លីជាមួយក្រុមហ៊ុន ហឹរ៉ាយហ្ស៊ិន អេហ្គ្រីខាល់ឈ័រ ឌីវីឡុបមែន លើផ្ទៃដីជាង១ពាន់ហិចតា នៅឃុំស្នួល ស្រុកស្នួលខេត្តក្រចេះនេះ បានឡើងមកតវ៉ានៅក្នុងទីក្រុងភ្នំពេញតាំងពីពាក់កណ្តាលខែសីហា ហើយកំពុងស្នាក់នៅក្នុងវត្តសាមគ្គីរង្សី។ ប៉ុន្តែបច្ចុប្បន្នពួកគេកំពុងជួបការលំបាក ដូច្នេះ មានតែសំណូមពរឲ្យអាជ្ញាធរពន្លឿនការដោះស្រាយឲ្យបានឆាប់។ នេះបើតាមការបញ្ជាក់ពីលោក សួន វិច្ឆិការ តំណាងប្រជាពលរដ្ឋ។
លោកបានឲ្យដឹងថា ប្រជាពលរដ្ឋនឹងចាប់ផ្តើមដង្ហែញត្តិជាថ្មី ចាប់ពីថ្ងៃចន្ទសប្តាហ៍ក្រោយនេះទៅ ដើម្បីសុំកិច្ចអន្តរាគមន៍បន្ថែម ក្នុងនោះរួមមាន ទី១គឺស្ថាប័នព្រះមហាក្សត្រ ទី២ស្ថាប័ននាយករដ្ឋមន្ត្រី និងទី៣គឺស្ថាប័នរដ្ឋសភា។
កាលថ្ងៃទី១៨សីហាកន្លងទៅ លោកនាយករដ្ឋមន្ត្រី ហ៊ុន សែន បានបង្ហាញការចាប់អារម្មណ៍នៅក្នុងសំណុំរឿងជម្លោះដីធ្លីនៅឃុំស្នួល ស្រុកស្នួល ខេត្តក្រចេះនេះ នៅពេលដឹងថា ប្រជាពលរដ្ឋទាំងនោះបានឡើងមកតវ៉ាមកដល់ទីក្រុងភ្នំពេញ។ ក្រោយមកអាជ្ញាធរបានប្រញាប់ប្រញាល់មកជួបជាមួយប្រជាពលរដ្ឋដែលកំពុងស្នាក់នៅក្នុងវត្តសាមគ្គីរង្សី និងបានសន្យាដោះស្រាយឲ្យបានឆាប់។
លោក វុទ្ធី វណ្ណារ៉ា ប្រធានលេខាធិការដ្ឋាន គណៈកម្មការសុរិយោដីថ្នាក់ជាតិ ដែលចូលរួម ស្រង់ព័ត៌មានពីប្រជាពលរដ្ឋកាលពីថ្ងៃទី២៦សីហា បានបញ្ជាក់ប្រាប់វិទ្យុបារាំងអន្តរជាតិនៅថ្ងៃនេះថា លោកកំពុងព្យាយាមដោះស្រាយបញ្ហានេះហើយ តែលោកមិនអាចបញ្ជាក់បាននៅឡើយទេថា ថ្នាក់ដឹកនាំនឹងសម្រេចយ៉ាងណា និងនៅពេលណា។ ដោយលោកបានសុំឲ្យប្រជាពលរដ្ឋអត់ធ្មត់។ ហើយនៅថ្ងៃទី១៨ខែកញ្ញាខាងមុខនេះ អាជ្ញាធរនឹងកោះប្រជុំជាមួយប្រជាពលរដ្ឋជាថ្មីម្តងទៀត នៅសាលាខេត្តក្រចេះ ប៉ុន្តែប្រជាពលរដ្ឋអះអាងថា នឹងមិនចូលរួមនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ