គណបក្សប្រជែងគ្នាទាំងពីរអះអាងពីការចំណេញនិងបាត់សំឡេងទៅវិញទៅមក
តំណាងគណបក្សដែលមានអាសនៈនៅក្នុងរដ្ឋសភា គឺគណបក្សប្រជាជនកម្ពុជា និងគណបក្សសង្គ្រោះជាតិ បានបង្ហាញពីស្ថានភាពបឋមរបស់ខ្លួនរៀងៗខ្លួន គិតមកទល់ថ្ងៃត្រង់នេះ ទាក់ទងទៅដំណើរការបោះឆ្នោត ក្រុមប្រឹក្សា រាជធានី ខេត្ត ក្រុង ស្រុក ខណ្ឌ នៅថ្ងៃទី១៨ខែឧសភានេះ។ គណបក្សទាំងពីបានបង្ហាញពីការបាត់បង់និងការចំណេញសំឡេងទៅវិញទៅមក និងមានការពន្យល់ពីមូលហេតុផ្សេងៗពីបញ្ហាទាំងអស់នោះ ខណៈដែលគ.ជ.ប. ប្រកាសបឋមដែរថា មានភាពរលូន។
ចុះផ្សាយនៅថ្ងៃ៖ កែប្រែថ្ងៃទី៖
អង្គបោះឆ្នោតដែលជាសមាជិកក្រុមប្រឹក្សាឃុំ-សង្កាត់ នៅតាមបណ្តាខេត្តក្រុងបានទៅកាន់
មណ្ឌលបោះឆ្នោតរៀងៗខ្លួនទាំង ១៩៧ការិយាល័យកាលពីម៉ោង ៧ព្រឹក។ មណ្ឌលមួយចំនួនបានបញ្ចប់និងបានរាប់សន្លឹកឆ្នោតយ៉ាងឆាប់រហ័ស រីឯមណ្ឌលមួយចំនួនទៀតមានភាពយឺតយ៉ាវដោយសារអង្គបោះឆ្នោតមានមានធុរៈ មិនអាចធ្វើដំណើរទៅកាន់មណ្ឌលបោះឆ្នោតទាន់ពេលវេលាបាន។
គេនៅមិនទាន់ដឹងពីលទ្ធផលផ្លូវការនៅឡើយទេ ព្រោះត្រូវរង់ចាំការប្រកាសរបស់គណៈកម្មាធិការជាតិរៀបចំការបោះឆ្នោត។ ក៏ប៉ុន្តែរហូតមកទល់ម៉ោង១២ថ្ងៃត្រង់ថ្ងៃអាទិត្យនេះ គណបក្សនយោបាយ ដែលមានការប្រជែងគ្នា ហើយមានសម្លេងនៅក្នុងរដ្ឋសភានោះ បានធ្វើសេចក្តីសន្និដា្ឋនបឋមរៀងៗខ្លួន។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិមានប្រសាសន៍ថា៖«គណបក្សសង្គ្រោះជាតិមានសម្លេងលើសពីការរំពឹងទុក ហើយមានខេត្តខ្លះនិងស្រុកខ្លះគណបក្សសង្គ្រោះជាតិកើនចំនួនអាសនៈជាលទ្ធផលរួម។ ខ្ញុំមិនទាន់ទទួលព័ត៌មានពីភាពមិនប្រក្រតីនៅឡើយទេ ក៏ប៉ុន្តែកន្លែងខ្លះមានការរាប់លឿន រាប់ច្រឡំ ហើយកំពុងស្នើសុំឲ្យរាប់ឡើងវិញ»។
ជាមួយគ្នានេះលោក អ៊ក គឹមហាន ប្រធាននាយកដ្ឋានសរុបនៃខុទ្ទកាល័យគណៈកម្មាធិការកណ្តាលគណបក្សប្រជាជនកម្ពុជាបានថ្លែងផងដែរថា៖«ការបោះឆ្នោតតាំងពីព្រឹកមកទល់ពេលហ្នឹងប្រព្រឹត្តទៅរលូនល្អ អត់មានបញ្ហាអ្វីរាំងស្ទះទេ។ សម្លេងឆ្នោតកំពុងបូកសរុប ហើយលទ្ធផលបឋមវាមានកើនសម្លេង វាមានថយសម្លេង។ វាមិនទាន់ប្រាកដទេ គឺជាលទ្ធផលបឋម»។
ដោយឡែក លោក ទេព នីថា បានវាយតម្លៃបឋមផងដែរពីការបោះឆ្នោតជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ គិតមកទល់ម៉ោង ១២ថ្ងៃត្រង់ដែរថា៖«ជាទូទៅដំណើរការបោះឆ្នោតប្រព្រឹត្តទៅបានល្អ ហើយការិយាល័យប្រមាណជា៥០បានបញ្ចប់ការបោះឆ្នោតនៅវេលាម៉ោង៨ ។ ដោយចាប់ផ្តើមរាប់សន្លឹកឆ្នោត ហើយនៅម៉ោងប្រមាណ១១ ការិយាល័យប្រមាណ៧០ ទៅ៧៥ភាគរយបានបញ្ចប់ការងារ។ ដោយឡែកនៅភ្នំពេញមានការិយាល័យចំនួន២ ដែលអ្នកបោះឆ្នោតមិនទាន់អញ្ជើញទៅបោះ ជាទូទៅត្រូវចាំ ហើយការរាប់សន្លឹកឆ្នោតត្រូវបានរាប់អស់ហើយ» ។
អង្គបោះឆ្នោតមួយរូប ត្រូវបោះឆ្នោតឬគូសសន្លឹកឆ្នោតចំនួន ២ សន្លឹក គឺសន្លឹក “ពណ៌ស” សម្រាប់បោះឆ្នោតជ្រើសរើសសមាជិកក្រុមប្រឹក្សារាជធានីខេត្ត។ សន្លឹកឆ្នោត “ពណ៌ផ្ទៃមេឃ” សម្រាប់បោះឆ្នោតជ្រើសរើសសមាជិកក្រុមប្រឹក្សាស្រុក ខណ្ឌ។
សូមបញ្ជាក់ថា ការបោះឆ្នោតអសកលជ្រើសរើសក្រុមប្រឹក្សារាជធានីខេត្ត ស្រុក ខណ្ឌ អាណតិ្តទី២ អង្គបោះឆ្នោតជាសមាជិកក្រុមប្រឹក្សា ឃុំសង្កាត់នៅក្នុងតំណែង ទូទាំងប្រទេសមានចំនួន ១១៤៥៩ មកពីគណបក្សនយោបាយចំនួន ៦ រួមមាន ៖ អង្គបោះឆ្នោតគណបក្សប្រជាជនកម្ពុជាចំនួន ៨២៩២ នាក់ អង្គបោះឆ្នោតគណបក្សសមរង្ស៊ីចំនួន ២១៥៥ នាក់ អង្គបោះឆ្នោតគណបក្សហ្វ៊ុនស៊ិនប៉ិចចំនួន ១៥១ នាក់ អង្គបោះឆ្នោតគណបក្សនរោត្តមរណឬទ្ធិចំនួន ៥២ នាក់ អង្គបោះឆ្នោតគណបក្សសិទ្ធិមនុស្សចំនួន ៨០០ នាក់ និងអង្គបោះឆ្នោតគណបក្សសញ្ជាតិកម្ពុជាចំនួន ១ នាក់។
ប៉ុន្តែ គណបក្សដែលចូលរួមប្រកួតប្រជែងបោះឆ្នោតមានចំនួ ៥ គណបក្សរួមមាន៖១. គណបក្សប្រជាជនកម្ពុជា. ២ គណបក្សសង្គ្រោះជាតិ. ៣ គណបក្សហ្វ៊ិនស៊ិនប៉ិច. ៤ គណបក្សសាធារណរដ្ឋប្រជាធិបតេយ្យ. ៥ គណបក្សសម្ព័ន្ធដើម្បីប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ