សង្គមស៊ីវិលចង់ឲ្យមានច្បាប់កំណត់អាណត្តិរបស់នាយករដ្ឋមន្ត្រី
ជាថ្មីម្តងទៀតក្រុមអង្គការសង្គមស៊ីវិលបានលើកយកបញ្ហាអាណត្តិរបស់នាយករដ្ឋមន្ត្រីមកជជែកគ្នា ប្រយោជន៍ដើម្បីឲ្យមានការបែងចែកការដឹកនាំរដ្ឋច្បាស់លាស់តាមកាលវេលាមួយជាក់លាក់ ចៀសវាងការកាន់អំណាចយូរពេកសម្រាប់បុគ្គលនាយករដ្ឋមន្ត្រីមួយរូប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ក្រោមប្រធានបទ «ការកំណត់អាណត្តិនាយករដ្ឋមន្ត្រី» លោកគល់ បញ្ញា នាយកប្រតិបត្តិអង្គការឃ្លាំមើលការបោះឆ្នោត ខុមហ្វ្រែល ថ្លែងនៅក្នុងសិក្ខាសាលានៅភោជនីយដ្ឋានខ្មែរសុរិន្ទកាលពីព្រឹកថ្ងៃទី១៩សីហានេះថា ការឆ្លៀតជជែកគ្នាពីការកំណត់អាណត្តិនាយករដ្ឋមន្ត្រីនាពេលនេះជាឱកាសមួយល្អខណៈដែលគណបក្សនយោបាយបាននិងកំពុងត្រៀមធ្វើវិសោធនកម្មទាក់ទងទៅនឹងការបោះឆ្នោត។
ក្រុមអង្គការសង្គមស៊ីវិលបានលើកយកមាត្រា១១៩ថ្មី នៃរដ្ឋធម្មនុញ្ញមកសំអាង ដើម្បីធ្វើជាសេចក្តីស្នើច្បាប់ ដោយមាត្រា១១៩ថ្មី (មួយ) ត្រូវគេសរសេរថា «តាមសេចក្តីស្នើពីប្រធានដោយមានមតិឯកភាពពីអនុប្រធានទាំងពីរនៃរដ្ឋសភា ព្រះមហាក្សត្រទ្រង់ចាត់តាំងវរជនមួយរូប ក្នុងចំណោមតំណាងរាស្ត្រនៃគណបក្សដែលឈ្នះឆ្នោត ឲ្យបង្កើតរដ្ឋាភិបាល។ ឃ្លាបន្តទាក់ទងទៅនឹងសេចក្តីស្នើវិសោធនកម្មគឺ វីរជនមួយរូបនេះមិនធ្លាប់ កាន់តំណែងជានាយករដ្ឋមន្ត្រីចំនួន០២អាណត្តិ ឬរយៈពេលដប់ឆ្នាំកន្លងមកហើយ។
មានពហុមតិជាច្រើនដែលបានចូលរួមនៅក្នុងឱកាសនោះដែរ ដែលចេញមកពីតំណាងអង្គការសង្គមស៊ីវិលផ្សេងៗគ្នា ដោយមានការលើកឡើងជាបឋមថាដើម្បីនិយាយពីកំណត់អាណត្តិនាយករដ្ឋមន្ត្រី ចាំបាច់អង្គការសង្គមស៊ីវិល ត្រូវធ្វើជាគំរូគេសិនដោយមានការចាប់ផ្តើមកំណត់អាណត្តិប្រធានអង្គការជាមុនសិន។ផលប៉ះពាល់ទៅលើការអនុវត្តលទ្ធិប្រជាធិបតេយ្យ អំពើផ្តាច់ការ និងការលំបាកក្នុងការអភិវឌ្ឍន៍ជាតិ ក៏ត្រូវលើកឡើងផងដែរ។
រីឯគណបក្សនយោបាយក៏ដូចគ្នាដែរ ទាំងគណបក្សជាប់ឆ្នោតនិងគណបក្សមិនជាប់ឆ្នោតគួរតែកំណត់អាណត្តិប្រធានបក្ស ឲ្យបានច្បាស់លាស់ មុននឹងមានការនិយាយពីអាណត្តិនាយករដ្ឋមន្ត្រី។
លើសពីនេះក្រុមអង្គការសង្គមស៊ីវិលក៏មានការលើកឡើងដែរពីការបញ្ចូលការកំណត់អាណត្តិនាយករដ្ឋមន្ត្រីទៅក្នុងគោលនយោបាយរបស់ខ្លួន នៅពេលដែលមានការរៀបចំការបោះឆ្នោតសកលលើកក្រោយ។
សូមបញ្ជាក់ថា ការជជែកគ្នារបស់សង្គមស៊ីវិលនាពេលនេះ បានធ្វើឡើងបន្ទាប់ពីប្រទេសកម្ពុជា ត្រូវបានដឹកនាំដោយលោកនាយករដ្ឋមន្ត្រី ហ៊ុន សែន អស់រយៈពេល ៥អាណត្តិមកហើយគិតទាំងអាណត្តិទី៥នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ