ទូតថ្មីបារាំងសន្យាបន្តកិច្ចសហប្រតិបត្តិការជាមួយកម្ពុជាបន្ថែមទៀត
ឯកអគ្គរដ្ឋទូតថ្មី នៃសាធារណរដ្ឋបារាំងប្រចាំកម្ពុជា Jean-Claude Poimboeuf បានថ្លែងថាប្រទេសបារាំងមានក្តីរីករាយយ៉ាងខ្លាំងចំពោះការវិវត្តន៍ផ្នែកនយោបាយនៅកម្ពុជានាពេលថ្មីៗនេះ ហើយបារាំងសូមស្វាគមន៍និងសង្ឃឹមថា គណបក្សនយោបាយទាំងពីរនឹងសហការគ្នាដោះស្រាយរាល់បញ្ហានយោបាយ។ លោក ឯកអគ្គរដ្ឋទូតថ្មីបារាំង បានថ្លែងដូច្នេះនៅក្នុងឱកាសជំនួបមួយ ជាមួយលោកនាយករដ្ឋមន្ត្រី ហ៊ុន សែន កាលពីថ្ងៃចន្ទម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
នៅក្នុងជំនួបជាមួយឯកអគ្គរដ្ឋទូតបារាំងថ្មីលោក Jean-Claude Poimboeuf លោកនាយករដ្ឋមន្ត្រី ហ៊ុន សែន បានស្នើឲ្យបារាំង ជួយមើលថែទាំកងទ័ពមួកខៀវ កម្ពុជាដែលបានចេញទៅបំពេញបេសកម្មថែរក្សាសន្តិភាពនៅតាមបណ្តារប្រទេសមួយចំនួន។
លោក អៀង សុផល្លែត ជំនួយការលោកនាយករដ្ឋមន្ត្រី បានថ្លែងប្រាប់អ្នកកាសែតបន្ទាប់ពីបញ្ចប់ជំនួបកាលពីល្ងាចថ្ងៃចន្ទម្សិលមិញនៅវិមានសន្តិភាពថា បារាំងតែងតែស្ថិតនៅក្នុង និងដើរទន្ទឹមនៅជាមួយកម្ពុជាជានិច្ច នេះហើយជាបេសកកម្មការទូតរបស់លោកអគ្គរដ្ឋទូតមកកាន់ប្រទេសកម្ពុជា។
តាមរយៈលោក អៀង សុផល្លែត លោក ហ៊ុន សែន បានសម្ដែងនូវការអបអរសាទរ ចំពោះឯកឧត្ដមឯកអគ្គរដ្ឋទូតថ្មី នៃប្រទេសបារាំងប្រចាំកម្ពុជា និងថ្លែងអំណរគុណចំពោះប្រទេសបារាំង ដែលតែងតែ ផ្ដល់នូវកិច្ចសហ ប្រតិបត្តិការ ល្អក្នុងការជួយដល់ប្រទេសកម្ពុជា។
លោកនាយករដ្ឋមន្ត្រីលើកឡើងថា ពីមុនកម្ពុជាបាន ទទួលកង ទ័ពមួកខៀវមកកាន់ប្រទេសកម្ពុជា ប៉ុន្តែឥឡូវនេះកម្ពុជាបានបញ្ជូនកងទ័ពមួកខៀវ ទៅក្រៅប្រទេស ក្នុងប្រតិបត្តិការរក្សាសន្តិភាព ដោយលោកបានស្នើសុំឲ្យបារាំងយកចិត្តទុកដាក់ ក្នុងការជួយមើល ថែទាំគ្នាទៅវិញទៅមក នៅក្នុងបេសកកម្មប្រតិបត្តិការរក្សាសន្តិភាព នៅប្រទេសក្រៅបន្ថែម ទៅលើក្របខ័ណ្ឌ អង្គការ សហប្រជាជាតិ។
លោក ហ៊ុន សែន បន្តអំពីការរីកចម្រើនលើកិច្ចសហប្រតិបត្តិការ រវាងប្រទេសទាំងពីរ ហើយបានបញ្ជាក់ថា តួនាទីបារាំងគួរតែនឹកទៅដល់ជំនួបកំពូលនៅ ឆ្នាំ ១៩៨៧ នៅទីក្រុងប៉ារីស ដែលពេលនោះបារាំងបានលើកទឹកចិត្ត និងយកចិត្តទុក ដាក់សម្របសម្រួល និងឈានដល់ការចុះហត្ថលេខា ហើយបន្ទាប់មកបារាំងក៏បានចូលរួមចំណែកក្នុងការជួយអភិវឌ្ឍន៍ប្រទេសកម្ពុជាផងដែរ។
ជាមួយគ្នានេះលោក លោក កុយ គួង អ្នកនាំពាក្យក្សរួងការបរទេសកម្ពុជាក៏ទទួលស្គាល់ថាទំនាក់ទំនងរវាងប្រទេសបារាំង និងកម្ពុជាកាន់តែមានភាពជិតស្និទ្ធិបន្ថែមទៀត។ តាមរយៈទីភ្នាក់ងារអភិវឌ្ឍន៍បារាំង AFD លោកកុយ គួង បញ្ជាក់ថា ប្រទេសបារាំងបានផ្តល់ជំនួយជាច្រើនវិស័យសម្រាប់ប្រទេសកម្ពុជា។ទាំងជំនួយស្មារតី និងបច្ចេកទេស។
តាមរយៈលោក អៀង សុផ្លែត ដដែល លោក Jean-Claude Poimboeufឯកអគ្គរដ្ឋទូតថ្មី នៃ សាធារណរដ្ឋ បារាំងប្រចាំ កម្ពុជាបានថ្លែងថា ប្រទេស បារាំង បានកត់សម្គាល់ដល់ការវិវត្តផ្នែកនយោបាយនៅ ក្នុងប្រទេសកម្ពុជានាពេលថ្មីៗនេះ ហើយបារាំង សូមស្វាគមន៍ និងសង្ឃឹមថា គណ បក្សនយោបាយទាំងពីរនឹងសហការគ្នាដោះស្រាយរាល់បញ្ហាទាំងឡាយ ដែលកម្ពុជាកំពុងតែ ប្រឈមនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ