សម រង្ស៊ី បង្ហើបអំពីជម្រើសចំនួនបីសម្រាប់កែទម្រង់ គ.ជ.ប ឱ្យឯករាជ្យ និងអព្យាក្រឹត
ជម្រើសសម្រាប់កែទម្រង់គណៈកម្មាធិការជាតិរៀបចំការបោះឆ្នោតមានបី។ នេះបើយោងតាមលោក សម រង្ស៊ី ប្រធានគណបក្សសង្គ្រោះជាតិ នៅថ្ងៃអង្គារ ទី០៨ មេសា។ ជម្រើសទី១គឺរើសសមាសភាព គ.ជ.ប ចេញពីគណបក្សជាប់ឆ្នោតទាំងពីរ ជម្រើសទី២គឺរើសសមាសភាព គ.ជ.ប ចេញពីមនុស្សឯករាជ្យអព្យាក្រឹត និងជម្រើសទី៣គឺរូបមន្តចម្រុះ។ លោក ឈាង វុន សមាជិកក្រុមការងារគណបក្សប្រជាជនកម្ពុជា ថាមិនទាន់បានដឹងអំពីសំណើនេះទេ ប៉ុន្តែក្នុងនាមរូបលោកផ្ទាល់ ជម្រើសទី១ទំនងជាអាចទទួលយកបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
លោក សម រង្ស៊ី ប្រធានគណបក្សសង្គ្រោះជាតិ នៅព្រឹកថ្ងៃអង្គារនេះ បានបង្ហើបប្រាប់ពីខេត្តកំពត ទីដែលលោកជួបសំណេះសំណាលជាមួយសមាជិកក្រុមប្រឹក្សាឃុំសង្កាត់ខាងគណបក្សប្រឆាំង អំពីរូបមន្តបីផ្សេងៗគ្នា សម្រាប់កែទម្រង់គណៈកម្មាធិការជាតិរៀបចំការបោះឆ្នោត ឬហៅកាត់ថា គ.ជ.ប។ លោក សម រង្ស៊ី បានលើកឡើងថា ទាំងប្រធាន និងសមាជិកនៃគណៈកម្មាធិការជាតិរៀបចំការបោះឆ្នោត ត្រូវតែជ្រើសរើសជាថ្មី ហើយដោយមានការឯកភាពពីគណបក្សជាប់ឆ្នោតទាំងពីរ។
បើតាមលោក សម រង្ស៊ី ជម្រើសទី១គឺការជ្រើសរើសសមាសភាពគណៈកម្មាធិការជាតិរៀបចំការបោះឆ្នោត ចេញពីសមាជិកនៃគណបក្សជាប់ឆ្នោតទាំងពីរ ដើម្បីឱ្យ គ.ជ.ប មានតុល្យភាព ទប់គ្នាទៅវិញទៅមក មិនឱ្យមានអ្នកណាខ្លាំងជាងអ្នកណា។ បន្ទាប់មក ជម្រើសទី២ លោក សម រង្ស៊ី បន្ត គឺការជ្រើសរើសសមាសភាពគណៈកម្មាធិការជាតិរៀបចំការបោះឆ្នោត ចេញពីមនុស្សឯករាជ្យ អព្យាក្រឹត ដែលមានគោលការណ៍ប្រជាធិបតេយ្យ និងគោលការណ៍យុត្តិធម៌ ជាដើម។ លោក សម រង្ស៊ី សំដៅមន្ត្រីនៃអង្គការមិនមែនរដ្ឋាភិបាលទាំងឡាយណា ដែលមិនគាំទ្រគណបក្សណាមួយ។ ជម្រើសចុងក្រោយគឺរូបមន្តចម្រុះ ដែលប្រធានគណបក្សប្រឆាំងរូបនេះពន្យល់ថា ក្នុងចំណោមសមាសភាពទាំង៩រូបនៃគណៈកម្មាធិការជាតិរៀបចំការបោះឆ្នោត ត្រូវមាន៣រូបមកពីគណបក្សប្រជាជនកម្ពុជា ៣រូបមកពីគណបក្សសង្គ្រោះជាតិ និង៣រូបទៀតមកពីមនុស្សអព្យាក្រឹត។ លោក សម រង្ស៊ី ថ្លែងថា រូបមន្តទី៣គឺដើម្បីជួយយិតយោងគ្នា កុំឱ្យល្អៀង ក្នុងការធ្វើសេចក្តីសម្រេចចិត្ត។
លោក ឈាង វុន សមាជិកក្រុមការងារចរចារបស់គណបក្សប្រជាជនកម្ពុជា អះអាងនៅរសៀលនេះថា មិនបានដឹងអំពីសំណើ ដែលលើកឡើងដោយលោក សម រង្ស៊ី នៅឡើយទេ។ ប៉ុន្តែ ក្នុងនាមរូបលោកផ្ទាល់ ជម្រើសទី១ទំនងជាអាចទទួលយកបាន ប្រសិនបើចំនួនសមាសភាពគណៈកម្មាធិការជាតិរៀបចំការបោះឆ្នោត ដែលជ្រើសរើសចេញពីសមាជិកគណបក្សជាប់ឆ្នោតទាំងពីរនោះ សមាមាត្រទៅនឹងចំនួនអាសនៈតំណាងរាស្ត្រនៃគណបក្សនីមួយៗនៅក្នុងរដ្ឋសភា ពោលគឺសមាសភាពមកពីគណបក្សប្រជាជនកម្ពុជាត្រូវច្រើនជាងសមាសភាពមកពីគណបក្សសង្គ្រោះជាតិ ព្រោះគណបក្សរបស់លោកសមាជិកសភា៦៨រូប ឯគណបក្សសង្គ្រោះជាតិមានតែ៥៥រូប។ លោកពន្យល់ថា ប្រព័ន្ធសមាមាត្រគឺជាគោលការណ៍នៃលទ្ធិប្រជាធិបតេយ្យពិតប្រាកដ ហើយថាមិនអាចឱ្យមានតុល្យភាពបានទេ ព្រោះជ័យជម្នះរបស់គណបក្សលោកគឺដោយសារគោលនយោបាយល្អជាង និងការគាំទ្ររបស់ប្រជាជនច្រើនជាង។
សំណើរបស់លោកសម រង្ស៊ី អាចជាសម្ពាយរបស់គណបក្សសង្គ្រោះជាតិ ក្នុងការត្រៀមជួបមេដឹកនាំកំពូលរបស់គណបក្សប្រជាជនកម្ពុជានៅពេលខាងមុខ ដើម្បីដោះស្រាយវិបត្តិនយោបាយនៅកម្ពុជា ឱ្យឆាប់ចប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ