ត្រូវគោរពច្បាប់ដើម្បីកាត់បន្ថយសោកនាដកម្មលើដងផ្លូវ!
ចុះផ្សាយនៅថ្ងៃ៖
ស្តាប់ - ០៥:០១
ជារៀងរាល់ឆ្នាំ តុល្យការស្តីពីមនុស្សស្លាប់ដោយសារគ្រោះថ្នាក់ចរាចរណ៍ គឺជាព័ត៌មានមួយគួរឲ្យព្រឺខ្លាច។ ជាក់ស្តែង គ្រាន់តែក្នុងអំឡុងពេលបុណ្យចូលឆ្នាំថ្មីនេះ មានមនុស្សស្លាប់៣៨នាក់ និងរបួសជាង៣០០នាក់។ តួលេខនេះបានបង្ហាញថា គ្រោះថ្នាក់ចរាចរណ៍នៅតែជាសោកនាដកម្មដ៏គួរឲ្យរន្ធត់ និងបានបង្កការខាតបង់សង្គមដ៏ធំធេងដល់សង្គមដដែល។ មូលហេតុចម្បងនៃសោកនាដកម្មនេះ ជាទូទៅ បណ្តាលមកពីឥរិយាបថមិនគោរពច្បាប់របស់អ្នកបើកបរ។ ដូច្នេះ មានតែការនាំគ្នាគោរពច្បាប់ទេដែលអាចកាត់បន្ថយសោកនាដកម្មនៅលើដងផ្លូវបាន។
វាពិតជាគួរឲ្យរន្ធត់ចិត្តខ្លាំងណាស់ ហើយក៏ជារឿងអកុសលមួយដែរសម្រាប់ប្រជាពលរដ្ឋខ្មែរ។អកុសលនៅត្រង់ថា នៅពេលដែលប្រទេសជាតិស្គាល់សន្តិភាពនិងការអភិវឌ្ឍ ពលរដ្ឋជាច្រើនបែរជាស្លាប់ឬរបួសពិការដោយសារគ្រោះថ្នាក់នៅតាមដងផ្លូវទៅវិញ។ មនុស្សស្លាប់ជាមធ្យម៥នាក់ក្នុងមួយថ្ងៃគឺជាតួលេខមួយខ្ពស់ជាងការស្លាប់ដោយសារជំងឺអេដស៍និងដោយសារគ្រាប់មីនដែលជាសំណល់ពីសម័យសង្គ្រាមទៅទៀត។
និយាយឲ្យចំគ្រោះថ្នាក់ចរាចរណ៍គឺជាឃាតករសម្លាប់មនុស្សច្រើនជាងគេបង្អស់នៅក្នុងប្រទេសកម្ពុជាបច្ចុប្បន្ន។ នេះនៅមិនទាន់រាប់បញ្ចូលការខូចខាតផ្នែកសង្គមនិងសេដ្ឋកិច្ចដ៏សន្ធឹកសន្ធាប់ផងទេ។ អ្វីដែលគួរឲ្យរន្ធត់ថែមទៀតនោះគឺ ខណៈដែលគេកំពុងនាំគ្នាប្រារព្ធពិធីបុណ្យចូលឆ្នាំដ៏សប្បាយរីការយ គ្រួសារខ្មែរជាច្រើនបែរជារៀបចំពិធីបុណ្យសពទៅវិញ។
យោងតាមការសិក្សា ជាទូទៅ ឥរិយាបថមិនគោរពច្បាប់គឺជាមូលហេតុចម្បងជាងគេដែលបង្កឲ្យមានសោកនាដកម្មនៃគ្រោះថ្នាក់ចរាចរណ៍។ ឥរិយាបថមិនគោរពច្បាប់មានច្រើនសណ្ឋានដូចជា ការបើកបរហួសល្បឿនកំណត់ បើកបរដោយមិនគោរពសិទ្ធិអាទិភាព មិនគោរពស្លាកសញ្ញាចរាចរណ៍ ឬបើកបរក្នុងស្ថានភាពស្រវឹងជាដើម។ ឥរិយាបថមិនគោរពច្បាប់នេះហើយគឺជាប្រភពនៃសោកនាដកម្មនិងជាប្រភពនៃបញ្ហាច្រើនយ៉ាងនៅក្នុងសង្គម។
ជាការពិតណាស់ ភាពអនាធិបតេយ្យក្នុងការធ្វើចរាចរណ៍តាមដងផ្លូវសាធារណៈគឺជាបញ្ហាធំធេងមួយនៅកម្ពុជា។ ជាទូទៅ អ្នកបើកបរមិនសូវគិតគូរពីស្លាកសញ្ញាចរាចរណ៍ឬគំនូសបែងចែកទ្រូងផ្លូវឡើយ ពោលគឺឲ្យតែមានចន្លោះត្រង់ណា ពួកគេនឹងរុលចូលទៅកន្លែងនោះដោយមិនខ្វាយខ្វល់ពីសិទ្ធិអាទិភាពឬក៏ឧបសគ្គនៅខាងមុខនោះឡើយ។ ប្រសិនបើទីកន្លែងរៀងស្ងាត់វិញ អ្នកកាន់ចង្កូតយានយន្តនឹងបន្ថែមល្បឿនតាមចិត្តចង់ដោយមិនគិតពីគ្រោះថ្នាក់ទេ។
អ្នកធ្វើដំណើរច្រើនតែសំឡឹងរកមើលភ្នាក់ងារប៉ូលិសច្រើនជាងមើលភ្លើងសញ្ញាឬស្លាកសញ្ញាចរាចរណ៍ផ្សេងទៀត ពោលគឺប្រសិនបើគ្មានប៉ូលិសឈរនៅតាមផ្លូវទេ ពួកគេនឹងបន្តដំណើរបើទះបីជាភ្លើងក្រហមក៏ដោយ ឬក៏បត់ឆ្វេងទោះបីជាមានស្លាកសញ្ញាហាមបត់។ អាក្រក់ជាងនេះទៅទៀត អ្នកបើកបរខ្លះបំពានច្បាប់ចរាចរណ៍នៅចំពោះមុខសមត្ថកិច្ចប៉ូលិសតែម្តងប្រសិនបើប៉ូលិសគ្មានម៉តូប្រដេញទេនោះ។
និយាយពីអ្នកបើកបរម៉ូតូវិញ ជាទូទៅ ពួកគេមិនចេះប្រើប្រាស់កញ្ចក់មើលក្រោយឡើយហើយក៏មិនពាក់មួកសុវត្ថិភាពដែរ។ ការបំពាក់កញ្ចក់មើលក្រោយឬពាក់មួកសុវត្ថិភាពគឺដោយសារតែខ្លាចប៉ូលិសផាកតែប៉ុណ្ណោះ តែមិនមែនដើម្បីសុវត្ថិភាពខ្លួនឯងទេ។ កញ្ចក់ម៉ូតូភាគច្រើនត្រូវបានគេដាក់ដើម្បីមើលមុខខ្លួនឯងជាជាងសម្រាប់មើលក្រោយ។ អ្នករត់ម៉ូតូឌុប ភាគច្រើនចូលចិត្តចតនៅត្រង់ផ្លូវកែងនិងចតចូលជ្រៅមកលើទ្រូងផ្លូវដោយមិនខ្វល់ខ្វាយពីការរំខានអ្នកធ្វើដំណើរផ្សេងទៀតឡើយ។
អ្នកមានឡានមួយចំនួនតែងបំពានច្បាប់ពីព្រោះតែពួកគេគិតថាប៉ូលិសមិនសូវហ៊ានរំខានឡើយ។ អ្នកលក់ដូរចូលចិត្តយកចិញ្ចើមផ្លូវឬទ្រូងផ្លូវធ្វើជាទីផ្សារខណៈដែលយានយន្តបើកទៅមកយ៉ាងលឿន។ ម្យ៉ាងទៀតនៅកម្ពុជា ផ្លូវមិនអំណោយផលដល់ការបើកបរលឿននោះឡើយពីព្រោះផ្លូវជាតិមានទំហំតូចនិងមានចរាចរណ៍ទៅមកលើផ្លូវតែមួយ ហើយជាផ្លូវដែលមនុស្ស សត្វ អាចឆ្លងកាត់បានគ្រប់ពេល។ ដូច្នេះ ការបើកបរលឿនងាយនឹងជួបគ្រោះថ្នាក់យ៉ាងខ្លាំង។
និយាយពីភ្នាក់ងារប៉ូលិសវិញ ពួកគេតែងផាកពិន័យឲ្យបានច្រើនតាមដែលអាចធ្វើទៅបានហើយការផាកពិន័យភាគច្រើនមិនបានផ្តល់វិក័យបត្រដល់អ្នកបើកបរឡើយ។ ការផ្តល់ប័ណ្ណបើកបរឬការត្រួតពិនិត្យបច្ចេកទេសយានយន្តក៏នៅតែអាចធ្វើបានក្រោមឥទ្ធិពលទឹកប្រាក់ដែរ។ នៅពេលមានគ្រោះថ្នាក់ចរាចរណ៍ អ្នកមានខ្នងបង្អែកតែងស្វែងរកអន្តរាគមន៍ច្រើនជាងការដោះស្រាយតាមផ្លូវច្បាប់។ និយាយឲ្យចំប្រព័ន្ធសង្គមទាំងមូលហាក់អំណោយផលដល់ការមិនគោរពច្បាប់។ នៅពេលដែលមនុស្សជាច្រើនមិនគោរពច្បាប់ ភាពអនាធិបតេយ្យនៅតាមដងផ្លូវក៏កើតមានឡើង។ នោះហើយជាប្រភពនៃសោកនាដកម្ម។
ដូច្នេះ ដំណោះស្រាយគ្មានអ្វីក្រៅពីការងាកមកគោរពច្បាប់ទាំងអស់គ្នាហើយបើកបរដោយប្រុងប្រយ័ត្ននិងដោយយល់អធ្យាស្រ័យគ្នាឲ្យបានច្រើននោះឡើយ។ ទន្ទឹមនឹងនោះ អាជ្ញាធរមានសមត្ថកិច្ចក៏ត្រូវបង្កើនវិធានការផ្លូវច្បាប់ឲ្យបានម៉ឺងម៉ាត់ផងដែរ។ ប្រសិនបើមិនដូច្នោះទេ គ្រោះថ្នាក់ចរាចរណ៍នៅតែបង្កសោកនាដកម្មសម្រាប់សង្គមនិងគ្រួសារខ្មែរជាដរាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ