សមាជិក«រាប់រយនាក់»នៃសហគមន៍ដីធ្លីគ្រោងមកសាលារាជធានីនៅថ្ងៃចន្ទ
សមាជិកនៃសហគមន៍បឹងកក់ រួមជាមួយអតីតអ្នកបឹងកក់ អ្នកបុរីកីឡា និងសហគមន៍ដីធ្លីផ្សេងៗទៀត ដែលមានគ្នារហូតដល់«៣០០ទៅ៤០០នាក់»គ្រោងមកផ្តុំគ្នានៅសាលារាជធានីភ្នំពេញ នៅថ្ងៃស្អែកដើម្បីទាមទារឲ្យមន្ត្រីដោះស្រាយបញ្ហាដីធ្លីរបស់ពួកគេ ឲ្យបានច្បាស់លាស់។ ដោយទទួលដំណឹងក្រៅផ្លូវការ មន្ត្រីសាលាក្រុងស្នើឲ្យអ្នកភូមិកុំបិទផ្លូវ បើមិនដូច្នេះទេ នឹងត្រូវប្រឈម«វិធានការ»អាជ្ញាធរ។
ចុះផ្សាយនៅថ្ងៃ៖
ស្តាប់ - ០២:២១
ទាមទារឲ្យរដ្ឋអំណាចផ្តល់ប័ណ្ណកម្មសិទ្ធិដីធ្លីសម្រាប់អ្នកភូមិបឹងកក់៤០គ្រួសារ និងទាមទារឱ្យអាជ្ញាធរបោះព្រំដីទំហំ១២,៤៤ហិកតារបស់អ្នកភូមិ ឱ្យដាច់ស្រឡះពីដីក្រុមហ៊ុនឯកជន គឺជាគោលបំណង នៃការប្រមូលផ្តុំគ្នារបស់សមាជិកសហគមន៍បឹងកក់ ខាងមុខសាលារាជធានីភ្នំពេញ នៅថ្ងៃចន្ទ ទី២៨ ខែកក្កដា ឆ្នាំ២០១៤។ នេះបើយោងតាមអ្នកស្រី ទេព វន្នី តំណាងម្នាក់នៃសហគមន៍បឹងកក់ ដែលបានប្រាប់បន្ថែមទៀតថា អ្នកភូមិគ្រោងមកជុំគ្នាជាមួយសមាជិកបណ្តាញសហគមន៍ដីធ្លីផ្សេងទៀត ដូចជា អ្នកបុរីកីឡា និងអតីតអ្នកភូមិបឹងកក់ជាដើម។
ចាប់ពីម៉ោង៨ព្រឹកទៅ សមាជិកសហគមន៍ដីធ្លីនៅក្នុងទីក្រុងភ្នំពេញ ដែលត្រូវបានអះអាងថា អាចមានគ្នារហូតដល់«៣០០ទៅ៤០០នាក់» ហើយដែលមិនសុខចិត្តចំពោះចំណាត់ការរបស់រដ្ឋអំណាច ទាក់ទងនឹងដីតំបន់បឹងកក់ ចង់បង្ហាញការទាមទាររបស់ខ្លួន ដោយអហិង្សា នៅចំពោះមុខមន្ត្រីសាលាក្រុងភ្នំពេញ។ ទន្ទឹមនឹងនេះដែរ អ្នកភូមិក៏ស្នើសុំការពន្យល់ពីសាលារាជធានីអំពីមូលហេតុ ដែលមន្ត្រីមូលដ្ឋាន មិនកោះអញ្ជើញពួកគេឲ្យមកជជែករឿងដីធ្លីនោះ តាមការសន្យា ដែលបានកំណត់ធ្វើនៅថ្ងៃទី១៧ ខែកក្កដា ឆ្នាំ២០១៤។
ដោយទទួលដំណឹងនេះក្រៅផ្លូវការ អ្នកនាំពាក្យសាលារាជធានីភ្នំពេញអះអាងថា នោះជា«សកម្មភាពដដែល» ហើយថា «អ្នកភូមិមិនយល់អំពីដីទំហំ១២,៤៤ហិកតានៅតំបន់បឹងកក់»។ លោក ឡុង ឌីម៉ង់ បញ្ជាក់ថា អាជ្ញាធរតែងតែដាក់កម្លាំងការពារសន្តិសុខ និងសណ្តាប់ធ្នាប់ជាធម្មតា ប៉ុន្តែអ្នកនាំពាក្យហាមអ្នកភូមិកុំបិទផ្លូវ បើមិនដូច្នេះទេ «អាជ្ញាធរនឹងមានវិធានការ»ចំពោះពួកគេ។
សូមរម្លឹកថា អ្នកភូមិបឹងកក់ និងអតីតអ្នកភូមិបឹងកក់ ដែលរងផលប៉ះពាល់អវិជ្ជមាន ដោយសារសេចក្តីសម្រេចរបស់រដ្ឋាភិបាល ក្នុងការអនុញ្ញាតឱ្យក្រុមហ៊ុន ស៊ូកាគូអ៊ិន វិនិយោគដីបឹងកក់ទំហំ១៣៣ហិកតា តាំងពីឆ្នាំ២០០៦មក តែងតែតវ៉ារកដំណោះស្រាយសមស្របសម្រាប់ពួកគេ។ ថ្វីបើនៅឆ្នាំ២០១១ នាយករដ្ឋមន្ត្រី ហ៊ុន សែន បានសម្រេចកាត់ដី១២,៤៤ហិកតាចេញពីគម្រោងឯកជន ដើម្បីទុកឱ្យអ្នកភូមិក្តី ក៏ការបែងចែកដីនោះនៅតែជាបញ្ហាមិនអាចដោះស្រាយបានរហូតមកដល់ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ