បាតុកម្មរំដោះទីលានប្រជាធិបតេយ្យ៖ តំណាងរាស្ត្រជាប់ឆ្នោត ៣នាក់ ត្រូវចាប់ខ្លួនបន្ទាប់ពីអំពើហិង្សា
បេសកកម្ម របស់លោកស្រី មូរ សុខហួរ ដើម្បី «រំដោះទីលានប្រជាធិបតេយ្យ» នាព្រឹកថ្ងៃទី១៥ កក្កដានេះ ត្រូវបានបញ្ចប់ដោយលោកស្រីមូរ សុខហួរ និងតំណាងរាស្ត្រជាប់ឆ្នោត២រូបទៀតត្រូវបានប៉ូលិសចាប់ខ្លួន។ ការចាប់ខ្លួននោះត្រូវបានធ្វើឡើងភ្លាមៗ បន្ទាប់ពីអំពើហិង្សាប៉ះទង្គិចរវាងកងកម្លាំងសន្តិសុខនិង ក្រុមបាតុករ។ លោក ឃួង ស្រេង អភិបាលរងរាជធានីភ្នំពេញអះអាងថា មានសន្តិសុខ៣៧នាក់រងរបួស ក្នុងនោះ២នាក់ត្រូវសង្គ្រោះបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ប៉ូលិសបានបាញ់គ្រាប់បែកផ្សែងដើម្បីបំបែកក្រុមបាតុកររបស់គណបក្សសង្គ្រោះជាតិក្នុងពេលប៉ះទង្គិចជាមួយកងសន្តិសុខខណ្ឌដូនពេញ។ ជាអំពើហិង្សាដែលលោកឃួង ស្រេង អភិបាលរងរាជធានីភ្នំពេញឲ្យដឹងថា មានក្រុមសន្តិសុខ៣៧នាក់រងរបួស ក្នុងនោះ២២នាក់របួសធ្ងន់ និង២នាក់ត្រូវសង្គ្រោះបន្ទាន់នៅពេទ្យកាល់ម៉ែត្រ។ លោកបន្តថាក្រុមសន្តិសុខត្រូវរបួសក្បាល ដោយសារតែបាតុករប្រើបំពង់ទីបជ័រ ហើយខាងក្នុង គេដាក់សរសៃដែកនិងចាក់បេតុង។
បន្ទាប់ពីអំពើហិង្សាកើតឡើងនៅម៉ោងជាង៩ព្រឹក ក្រុមបាតុកម្មទាមទារបើកទីលានប្រជាធិបតេយ្យ ដឹកនាំដោយលោកស្រីមូរសុខហួរ នៅចំណុចស្ពាននាគ បានប្រកាសរំសាយ។ ប៉ុន្តែ នៅពេលលោកស្រីមូរសុខហួរ និងបេក្ខជនជាប់ឆ្នោត២រូបទៀត គឺលោកកែវ ភិរម្យនិងលោកម៉ែន សុថាវរិន្ទ្រ ជិះក្នុងរថយន្តឡិចស៊ីស ស្លាកលេខព្រឹទ្ធសភាចេញពីស្ពាននាគ ក៏ត្រូវប៉ូលិសបង្ក្រាបបាតុកម្មចេញពីក្នុងបន្លាលួសស្ទាក់ឃាត់ ហើយនាំខ្លួនតំណាងរាស្ត្រជាប់ឆ្នោតទាំងបី ចូលទៅក្នុងទីលានប្រជាធិបតេយ្យ។ មួយម៉ោងក្រោយមក ប៉ូលិសបានបញ្ជូនលោកស្រីមូរ សុខហួរ និងតំណាងរាស្ត្រជាប់ឆ្នោតពីរនាក់ទៀត ទៅកាន់ស្នងការប៉ូលិស។
លោកឃួង ស្រេង បានបញ្ជាក់ថា ការឃាត់ខ្លួនតំណាងរាស្ត្រជាប់ឆ្នោតរបស់គណបក្សសង្គ្រោះជាតិទាំង៣រូបនោះដោយសារតែពួកគាត់ដឹកនាំធ្វើបាតុកម្មដោយខុសច្បាប់ និងជាបាតុកម្មហិង្សាមកលើកងកម្លាំងសមត្ថកិច្ច។ នៅរសៀលនេះ ព្រះរាជអាជ្ញារងពីរនាក់កំពុងសួរនាំពួកគាត់។
យ៉ាងណាក៏ដោយ ក្នុងព្រឹត្តិការណ៍ប៉ះទង្គិចកាលពីព្រឹកមិញ លោកហូរវ៉ាន់បានអះអាងនៅកន្លែងធ្វើបាតុកម្មថា ខាងបាតុករក៏បានរងរបួសមួយចំនួនផងដែរ តែលោកមិនមានចំនួនជាក់លាក់នោះទេ។ បាតុករបានប្រមូលបានដំបងឈើរបស់ក្រុមសន្តិសុខ៣ការ៉ុងដែលគេប្រើសម្រាប់បង្ក្រាបបាតុកម្ម។
គណបក្សសង្គ្រោះជាតិបានចេញសេចក្តីថ្លែងការណ៍ សម្តែងការសោកស្តាយនូវអំពើហិង្សានៅពេលធ្វើបាតុកម្មទាមទារឲ្យមានការបើកទីលានប្រជាធិបតេយ្យ កាលពីព្រឹកថ្ងៃទី១៥កក្កដា។ គណបក្សសង្គ្រោះជាតិនៅតែប្រកាសប្រកាន់យកនិងគោរពនូវគោលការណ៍អហិង្សាដោយសន្តិវិធី។ ក្នុងសេចក្តីថ្លែងការណ៍គណបក្សសង្គ្រោះជាតិទាមទារឲ្យដោះលែងដោយឥតលក្ខខណ្ឌបេក្ខជនជាប់ឆ្នោតតំណាងរាស្ត្រទាំងបីរូប និងទាមទារឲ្យបើកទីលានប្រជាធិបតេយ្យ។
ចំណែកសមាគមសិទ្ធិមនុស្សអាដហុក ក៏បានថ្លែងការណ៍ថ្កោលទោសការប្រើអំពើហិង្សារវាងកងកម្លាំងប្រដាប់អាវុធ កងសន្តិសុខខណ្ឌដូនពេញ និងក្រុមបាតុករនៅលើស្ពាននាគ កាលពីព្រឹកថ្ងៃ១៥កក្កដា។ តាមអាដហុកអំពើហិង្សានៅព្រឹកមិញ មានក្រុមបាតុករជាង១០នាក់និងក្រុមសន្តិសុខ៦នាក់រងរបួស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ