សហគមន៍ជាតិនិងអន្តរជាតិបន្តសាទរចំពោះដំណោះស្រាយវិបត្តិនយោបាយ
សារអបអរសាទរពីសហគមន៍ជាតិ និង អន្តរជាតិ បន្តធ្លាក់មកជាបន្តបន្ទាប់ចំពោះកិច្ចព្រមព្រៀងដោះស្រាយវិបត្តិនយោបាយរវាងគណបក្សប្រជាជនកម្ពុជានិងគណបក្សសង្គ្រោះជាតិ។
ចុះផ្សាយនៅថ្ងៃ៖
សហភាពអឺរុប នៅថ្ងៃទី ២៣កក្កដាម្សិលមិញ បានចេញសេចក្តីថ្លែងការណ៍មួយ ស្វាគមន៍ចំពោះកិច្ចព្រមព្រៀងគ្នា រវាងគណបក្សនយោបាយជាប់ឆ្នោតទាំងពីរ កាលពីថ្ងៃទី ២២កក្កដា។ អ្នកនាំពាក្យសហភាពអឺរុប បាននិយាយនៅក្នុងសេចក្តីថ្លែងការណ៍នោះថា កិច្ចព្រមព្រៀមនេះ នឹងអាចក្លាយជាបច្ច័យមួយ ដើម្បីអភិវឌ្ឍលទ្ធិប្រជាធិបតេយ្យនៅកម្ពុជា ក៏ដូចជានឹងធ្វើឲ្យសេដ្ឋកិច្ចកម្ពុជា កាន់តែលូតលាស់បន្ថែមទៀត។ សហភាពអឺរ៉ុបអះអាងថា នឹងនៅតែបន្តកិច្ចសហប្រតិបត្តិការល្អជាមួយកម្ពុជាជានិច្ច។
ប្រទេសបារាំង ក៏បានអបអរសាទរដល់កិច្ចព្រមព្រៀងរបស់គណបក្សទាំងពីរផងដែរ។ អ្នកនាំពាក្យក្រសួងការបរទេសបារាំង បានថ្លែងថា អំណឹះតទៅ គឺជាពេលវេលាដែលគណបក្សធំៗទាំងពីរ ធ្វើការជាមួយគ្នា ក្នុងន័យស្ថាបនាដើម្បីជំរុញការអភិវឌ្ឍលទ្ធិប្រជាធិបតេយ្យ សេដ្ឋកិច្ច និងសង្គម។ ទីក្រុងប៉ារីស អះអាងថា ខ្លួនស្ថិតនៅជានិច្ចជាមួយកម្ពុជា ដើម្បីជួយប្រទេសនេះ ក្នុងការពង្រឹងស្ថាប័នលទ្ធិប្រជាធិបតេយ្យ។
នៅក្នុងស្រុកវិញ អង្គការតម្លាភាពកម្ពុជា ក៏បានស្វាគមន៍ចំពោះការបញ្ចប់ជម្លោះនយោបាយ រវាងគណបក្សប្រជាជនកម្ពុជា និងគណបក្សសង្គ្រោះជាតិ និងការប្តេជ្ញាចិត្តរបស់គណបក្សទាំងពីរក្នុងការធ្វើកំណែទម្រង់។ អង្គការនេះសង្ឃឹមថា កិច្ចប្រជុំ និងការពិភាក្សាបន្ទាប់រវាងគណបក្សទាំងពីរនឹងនាំឲ្យមានលទ្ធផលជាក់ស្តែង។
អង្គការតម្លាភាពកម្ពុជាបានស្នើសុំឲ្យគណបក្សទាំងពីរគួរពិចារណាលើការកំណត់អាណត្តិនាយករដ្ឋមន្ត្រី ឲ្យមានត្រឹមតែ ២អាណត្តិ ដើម្បីឲ្យកម្ពុជា អាចឆ្ពោះទៅមុខ ក្នុងការជំរុញលទ្ធិប្រជាធិបតេយ្យ ឲ្យកាន់តែប្រសើរឡើង និងអាចកាត់បន្ថយហានិភ័យ នៃការរំលោភអំណាច។ នេះបើយោងតាមសេចក្តីថ្លែងការណ៍របស់អង្គការតម្លាភាពកម្ពុជា នៅថ្ងៃទី ២៣កក្កដា ម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ