សហជីពនឹងមានច្បាប់គ្រប់គ្រងនៅមុនដំណាច់ឆ្នាំ២០១៤
កិច្ចពិភាក្សាត្រីភាគីស្តីពីពង្រាងច្បាប់សហជីព ត្រូវបានបើកធ្វើឡើងហើយរយៈពេលពីរថ្ងៃ គឺថ្ងៃទី២៨ និង ២៩ឧសភា ដោយមានការចូលរួមពីតំណាងសហជីព តំណាងនិយោជក និងតំណាងរដ្ឋាភិបាល។សម្រាប់ថ្ងៃទី១ កិច្ចប្រជុំបានទទួលយកអនុសាសន៍នានាពីភាគីពាក់ព័ន្ធ ដើម្បីជាប្រធានបទក្នុងការពិភាក្សាគ្នាផុលផុសនៅថ្ងៃបញ្ចប់។ ពង្រាងច្បាប់ស្តីពីសហជីពដែលមាន១៧ជំពូកនិង៩១មាត្រា ត្រូវប្រធានអង្គប្រជុំរដ្ឋមន្ត្រីក្រសួងការងារអះអាងថា នឹងបញ្ចប់ហើយក្លាយជាច្បាប់នៅមុនដំណាច់ឆ្នាំ២០១៤នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ក្រុមមេដឹកនាំសហជីព តំណាងនិយោជក និងតំណាងរដ្ឋាភិបាលក្រោមកិច្ចសហការផ្នែក បច្ចេកទេស ពីអង្គការ អន្តរជាតិខាងការងារ(ILO) នឹងបើកកិច្ចពិភាក្សាផុលផុសនៅថ្ងៃព្រហស្បតិ៍ទី២៩ឧសភា ទាក់ទងទៅនឹងពង្រាងច្បាប់ស្តីពីសហជីព។
រៀបចំនៅសណ្ឋាគារអាំងទែកុងទីណង់តាល់រយៈពេលពីរថ្ងៃ គឺថ្ងៃទី២៨និង២៩ ឧសភា សិក្ខាសាលា ត្រីភាគីស្តីពីកិច្ចពិគ្រោះយោបល់លើសេចក្តីព្រាងច្បាប់ស្តីពីសហជីពនៅថ្ងៃទីមួយមើលទៅ នៅមិនទាន់មានភាពជឿនលឿនអ្វីទេ ដោយសារតែអង្គប្រជុំដែលមជ្ឈដ្ឋានទូទៅចាត់ទុកថា មានសារៈសំខាន់នោះបានត្រឹមទទួលយកមតិយោបល់ដែលស្នើឡើងដោយភាគីចូលរួមទាំងអស់។
លោក អាត់ ធន់ ប្រធានសហភាពការងារកម្ពុជា និងជាប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា(ស៊ីខៅឌូ) បានថ្លែងថាមានចំណុចជាច្រើនដែលភាគីសហជីព និងអ្នកពាក់ព័ន្ធឯទៀតស្នើឡើងដើម្បី បញ្ចូលទៅក្នុងពង្រាងច្បាប់ស្តីពីសហជីព ដូចជាការស្នើសុំឲ្យគិតគូពីបញ្ហា ប្រាក់ឈ្នួល ដល់មន្ត្រីរាជការ និងមុខរបរសេដ្ឋកិច្ចក្រៅប្រព័ន្ធ នីតិវិធីក្នុងការចុះបញ្ជីសហជីព នីតិវិធីកូដកម្ម ជាដើម។
ដោយឡែកភាគីនិយោជកមិនបានបង្ហើបឲ្យដឹងទេខណៈដែលការជជែកគ្នាតម្រូវឲ្យមានការគោរពគោលការណ៍អសាធារណៈ។ ជាមួយគ្នានេះភាគីសហជីពសង្ឃឹមតិចតួចនៅឡើយថាអនុសាសន៍របស់ពួកគេនឹងត្រូវបានគេបញ្ចូលទៅក្នុងពង្រាងច្បាប់ស្តីពីសហជីពដែលមាន ៩១មាត្រា។
ទោះជាយ៉ាងនេះក្តីភាគីទាំងអស់ចាត់ទុកថា ការអង្គុយជជែកគ្នាបីភាគីដោយសន្តិភាព មានសារៈសំខាន់នៅក្នុងការងារទំនាក់ទំនងវិជ្ជាជីវៈនៃវិស័យកាត់ដេរនិងដេរស្បែកជើង។
រដ្ឋមន្ត្រីក្រសួងការងារ លោក អ៊ិត សំហេង នៅក្នុងឱកាសបើកកិច្ចប្រជុំបានថ្លែងថា ក្រសួងការងារនឹងបន្តសហការជាមួយ ILO ធ្វើការកែសម្រួលតាមស្មារតី នៃអង្គសិក្សាសាលា ព្រមទាំងដាក់កិច្ចពិភាក្សាអន្តរក្រសួងជាមួយក្រុមប្រឹក្សាអ្នកច្បាប់ ក្រុមប្រឹក្សាសេដ្ឋកិច្ច វប្បធម៌ សង្គមកិច្ច ឲ្យចប់នៅក្នុងត្រីមាសទីបីនេះ។ លោក រដ្ឋមន្ត្រីបន្តថា នៅដើមត្រីមាសទី៤ ពង្រាងច្បាប់នឹងដាក់ជូនរដ្ឋាភិបាលពិនិត្យសម្រច បន្ទាប់មក បញ្ជូនទៅស្ថាប័ននីតិបញ្ញត្តិដើម្បីសុំការអនុម័តមុនដំណាច់ឆ្នាំ ២០១៤នេះ។
សូមបញ្ជាក់ថាដំណើរការរៀបចំពង្រាងច្បាប់ ត្រូវបានចាប់ផ្តើមធ្វើចាប់តាំងពីឆ្នាំ២០០៨ រហូតដល់ ខែឧសភាឆ្នាំ២០១៤នេះ ក្រសួងការងារសហការជាមួយ ILO បានកសាងជាពង្រាងច្បាប់ ស្តីពី សហជីពដែលរួមមាន១៧ជំពូក និង៩១មាត្រា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ