ទាហានមួកខៀវកម្ពុជាមានសុខភាពល្អតែការប្រយ័ត្នពីការឆ្លងអេបូឡាមានកម្រិតខ្ពស់
មេបញ្ជាការជាន់ខ្ពស់នៃក្រសួងការពារជាតិកម្ពុជាទទួលបន្ទុកបេសកកម្មរក្សាសន្តិភាពអង្គ ការសហប្រជាជាតិ បានណែនាំដល់កងកម្លាំងមួកខៀវកម្ពុជាទាំងអស់ដែលកំពុងបំពេញបេសកកម្ម រក្សាសន្តិភាពនៅប្រទេសចំនួន ៨នៃតំបន់អាហ្រ្វិកឲ្យមានការប្រុងប្រយ័ត្នការឆ្លងជំងឺអេបូឡា។ ជាមួយគ្នានេះនៅមិនទាន់មានសេចក្តីរាយការណ៍ណាមួយបង្ហាញថាជំងឺអេបូឡាបានឆ្លងមកលើកងយោធាកម្ពុជានោះឡើយ ខណៈបទបញ្ជាត្រូវបានដាក់យ៉ាងតឹងរ៉ឹងទាក់ទងទៅនឹងការរស់នៅនិងការបំពេញការងាររបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
ដោយមានការបារម្ភពីការឆ្លងជំងឺអេបូឡាដែលកំពុងកើតមាននៅតំបន់អាហ្វ្រិកខាងលិច
នាយទាហានជាន់ខ្ពស់ទទួលបន្ទុកផ្នែកបេសកកម្មអង្គការសហប្រជាជាតិរបស់កម្ពុជាបានធ្វើការណែនាំទៅដល់កងកម្លាំងដែលកំពុងបំពេញបេសកកម្មនៅប្រទេសមួយចំនួនក្នុងតំបន់អាហ្រ្វិកឲ្យបង្កើនការប្រុងប្រយ័ត្នខ្ពស់ចំពោះជំងឺដ៏កាចសាហាវនេះ។
នៅក្នុងលិខិតមួយដែលចុះហត្ថលេខាកាលពីថ្ងៃទី១៥ខែសីហា ឆ្នាំ២០១៤ ដោយនាយឧត្តមសេនីយ៍ សែម សុវណ្ណី អគ្គនាយកនៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម ផ្ញើជូនមេបញ្ជាការគ្រប់កងឯកភាពនៅប្រទេសម៉ាលី ប្រទេសលីបង់ ប្រទេសស៊ូដង់ ស៊ូដង់ខាងត្បូង តំបន់ដាហ្វួរនិង Abyei នូវចំណុចចំនួនបី។ នោះគឺទីមួយត្រូវមានការផ្សព្វផ្សាយជាបន្ទាន់ដល់នាយទាហាននិងពលទាហាននៅក្នុង
អង្គភាពរបស់ខ្លួនរក្សាអនាម័យ ការហូបចុក ស្នាក់នៅសម្អាតខ្លួនប្រាណនឹងសាប៊ូជាប្រចាំពេ លទៅមកបេសកកម្ម លាងដៃឲ្យស្អាតមុនទទួលទានអាហារ សំរាកក្នុងមុង និងមានការហាមឃាត់ជាដាច់ខាតការដើរហើរចេញទៅក្រៅ លើកលែងតែមានភារកិច្ចបេសកកម្ម។
ចំណុចមួយទៀតគឺចំពោះនាយទាហានសេនាធិការ និងសង្កេតការណ៍នៅប្រទេសទាំងបី និងពីរតំបន់ខាងលើត្រូវតាមដានសុខភាពជាប្រចាំករណីមានការសង្ស័យត្រូវឲ្យគ្រូពេទ្យត្រួតពិនិត្យជាបន្ទាន់។ រួមទាំងចំណុចចុងក្រោយត្រូវរាយការណ៍ជាបន្ទាន់មកមជ្ឈមណ្ឌលជាតិ ពេលមានករណីកើតឡើងណាមួយ ដើម្បីមានមូលដ្ឋានរាយការណ៍ជូនប្រមុខរដ្ឋាភិបាល ថ្នាក់ដឹកនាំក្រសួងការពារជាតិនិងគណៈកម្មាធិការជាតិធ្វើការសម្រេច និងជួយអន្តរាគមន៍ទាន់ពេលវេលា។ ពុំមានយុទ្ធជនមួកខៀវណាម្នាក់បានរងគ្រោះដោយសារជំងឺអេបូឡាឡើយរហូតមកទល់ពេលនេះ។
សូមបញ្ជាក់ថាការចេញលិខិតផ្សព្វផ្សាយដល់កងកម្លាំងមួកខៀវកម្ពុជានៅពេលនេះគឺបានធ្វើឡើងបន្ទាប់ពីមានការផ្ទុះជំងឺអេបូឡា ប៉ុន្មានសប្តាហ៍មកហើយ នៅតំបន់អាហ្រិ្វកភាគខាងលិច ដែលបានសម្លាប់មនុស្សជាង១០០០នាក់ ភាគច្រើននៅក្នុងប្រទេសហ្គីណេ លីបេរីយ៉ា និងសៀរ៉ាឡេអូន។
សូមរំលឹកថាចាប់តាំងពីឆ្នាំ២០០៣មក ប្រទេសកម្ពុជាបានបញ្ជូននាយទាហាននិងពលទាហានទៅបំពេញបេសកកម្មរក្សាសន្តិភាពនៅបរទេសចំនួន ជាង២០០០នាក់ នៅប្រទេសចំនួន៨។ហើយបច្ចុប្បន្នមាននាយទាហាននិងកងកម្លាំងប្រមាណជា៦០០នាក់កំពុងបម្រើការងារនៅប្រទេសទាំងនោះនៅឡើយ ដោយពួកគេមានជំនាញឯកទេសខាងបោសសម្អាត កម្ទេចគ្រាប់មីននិងយុទ្ធភណ្ឌមិនទាន់ផ្ទុះការងារវិស្វកម្មព្រលានយន្តហោះ គ្រូពេទ្យកម្រិត២ នាយទាហានសង្កេតការណ៍។ល។និង។ល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ