សមាគមខ្មែរកម្ពុជាក្រោមនឹងស្វែងរកអន្តរាគមន៍ពីប្រទេសមហាអំណាច
អង្គការ-សមាគមខ្មែរកម្ពុជាក្រោមនឹងស្វែងរកអន្តរាគមន៍ពី ប្រទេសមហាអំណាចទាំងប្រាំដើម្បីជម្រុញឲ្យប្រទេសវៀតណាម ទទួលស្គាល់ ប្រវត្តិសាស្ត្រពិតនៃការបាត់បង់ទឹកដីកម្ពុជាក្រោមទៅឲ្យប្រទេសវៀតណាមកាលពីឆ្នាំ ១៩៤៩។ នេះ បើតាមលោក ថាច់ សេដ្ឋា ប្រធានអង្គការ-សមាគមខ្មែរកម្ពុជាក្រោម ដែលបានថ្លែងឲ្យដឹងនៅក្នុងវេទិកាសាធារណៈស្តីពី ទឹកដីកម្ពុជាក្រោមនៅថ្ងៃអាទិត្យទី០៦ កក្កដា នេះ។ បាតុកម្មនឹងជាជម្រើសចុងក្រោយ បើគ្មានការឆ្លើយជាវិជ្ជមានណាមួយពីរដ្ឋាភិបាលវៀតណាមដល់ប្រជាពលរដ្ឋខ្មែរទេនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ក្រៅពីមានគម្រោងដាក់ឯកសារប្រវត្តិសាស្ត្រពិតនានា អំពីទឹកដីកម្ពុជាក្រោម ទៅកាន់ស្ថានទូតវៀតណាមនោះ អង្គការ-សមាគមខ្មែរកម្ពុជាក្រោមក៏បានសម្រេចដាក់ឯកសារទាំងនោះទៅកាន់បណ្តាស្ថានទូតប្រទេសមហាអំណាចនៅក្នុងប្រទេសកម្ពុជាផងដែរ។
លោក ថាច់ សេដ្ឋា ប្រធានអង្គការ-សមាគមខ្មែរកម្ពុជាក្រោម បានមានប្រសាសន៍ថា ក្រោយពីប្រមូលឯកសារ និង មតិយោបល់បន្ថែម ពីសំណាក់ប្រជាពលរដ្ឋខ្មែរហើយនោះ សមាគមនឹងបញ្ជូនឯកសារទាំងនោះ ទៅកាន់ស្ថានទូតប្រទេសមហាអំណាចទាំងប្រាំ ប្រចាំនៅប្រទេសកម្ពុជា ជាពិសេសស្ថានទូតប្រទេសបារាំង និង ចិន ដែលបានដឹងរឿងរ៉ាវច្រើនពីការបាត់បង់ទឹកដីកម្ពុជាក្រោមទៅឲ្យប្រទេសវៀតណាម ។ ជាមួយគ្នានេះដែរ លោក ថាច់ សេដ្ឋា ក៏បានស្នើដល់ប្រទេសបារាំង និង ចិន ជួយផ្តល់ឯកសារសំខាន់បន្ថែម ពាក់ព័ន្ធនឹងទឹកដីកម្ពុជាក្រោមនេះ ដល់អង្គការ-សមាគមខ្មែរកម្ពុជាក្រោម ដើម្បីយកទៅបញ្ជាក់ឲ្យបានច្បាស់ដល់រដ្ឋាភិបាលវៀតណាម។
យ៉ាងណាក៏ដោយ លោក ថាច់ សេដ្ឋា មិនបានបញ្ជាក់ពីកាលបរិច្ឆេទនៃការដាក់ឯកសារទាំងនោះនៅឡើយទេ ដោយរង់ចាំប្រមូលឯកសារបន្ថែមសិន។ ក៏ប៉ុន្តែ លោក បញ្ជាក់ថា ក្រោយដាក់ឯកសារហើយ បើមិនមានការឆ្លើយតបបែបណាទេនោះ បាតុកម្មទាមទារឲ្យវៀតណាមទទួលស្គាល់ប្រវត្តិសាស្ត្រពិត និង សូមទោសជាសាធារណៈរឿងទឹកដីកម្ពុជាក្រោម នឹងអាចកើតឡើងនៅពាក់កណ្តាលខែកក្កដានេះ។
សូមបញ្ជាក់ថា ដើមហេតុនៃការតវ៉ាឲ្យវៀតណាមទទួលស្គាល់ប្រវតិ្តសាស្ត្រពិតនៃបាត់បង់ទឹកដីកម្ពុជាក្រោមនេះ គឺក្រោយពីអ្នកនាំពាក្យស្ថានទូតវៀតណាមប្រចាំនៅកម្ពុជា លោក ត្រឹង វ៉ាន់ថុង បានប្រាប់ប្រព័ន្ធផ្សព្វផ្សាយកាលពីដើមខែ មិថុនាកន្លងមក ថា ទឹកដីកម្ពុជាក្រោមជាទឹកដីវៀតណាមតាំងពីយូរយារណាស់មកហើយ មិនមែនបារាំងកាត់ឲ្យវៀតណាមនោះទេ។ អង្គការ-សមាគមខ្មែរកម្ពុជាក្រោម បានហៅការលើកឡើងនេះថា ជាការបំភ្លៃបំផ្លើសប្រវត្តិសាស្ត្រពិត និង មើលងាយដល់ប្រជាពលរដ្ឋខ្មែរទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ