ក្រសួងមហាផ្ទៃសុំយោបល់ពីក្រសួងយុត្តិធម៌ចំពោះសំណើដោះលែងសកម្មជនបក្សប្រឆាំង
ក្រោយពីទទួលបានលិខិតស្នើសុំអន្តរាគមន៍ឲ្យដោះលែងសកម្មជនបក្សប្រឆាំងគឺលោក មៀច សុវណ្ណារ៉ាពីសំណាក់លោកសម រង្ស៊ី ប្រធានគណបក្សសង្គ្រោះជាតិនោះ ក្រសួងមហាផ្ទៃមិនបានសម្រេចយ៉ាងណានោះទេ ។ ប៉ុន្តែក្រសួងនេះនៅរសៀលថ្ងៃសុក្រនេះ បានបន្តបញ្ជូនលិខិតនោះទៅកាន់ក្រសួងយុត្តិធម៌ ដើម្បីធ្វើការពិនិត្យ និងផ្តល់យោបល់។
ចុះផ្សាយនៅថ្ងៃ៖
ស្តាប់ - ០១:៣១
ក្រសួងមហាផ្ទៃមិនបានសម្រេចបែបណាមួយនោះទេចំពោះលិខិតរបស់លោកសម រង្ស៊ីប្រធានគណបក្សសង្គ្រោះជាតិដែលបានស្នើឲ្យក្រសួងមានសមត្ថកិច្ចមួយនេះអន្តរាគមន៍ដោះលែងលោកមៀច សុវណ្ណារ៉ា ប្រធាននាយកដ្ឋានព័ត៌មាន និងផ្សព្វផ្សាយរបស់គណបក្សសង្គ្រោះជាតិ។
លោកខៀវ សុភ័គ អ្នកនាំពាក្យក្រសួងមហាផ្ទៃបានថ្លែងប្រាប់វិទ្យុបារាំងអន្តរជាតិថា ក្រសួងមហាផ្ទៃបានទទួលលិខិតនោះហើយ ប៉ុន្តែក្រសួងមិនបានសម្រេចយ៉ាងណានោះទេ។ ទោះជាបែបនេះក្តី អ្នកនាំពាក្យរូបនេះ បានបញ្ជាក់ថា ក្រសួងមហាផ្ទៃបានបញ្ជូនលិខិតនោះទៅក្រសួងយុត្តិធម៌រួចហើយ ដើម្បីធ្វើការពិនិត្យ និងផ្តល់យោបល់អំពីបញ្ហានេះ។
សូមរម្លឹកជូនថា លោកមៀច សុវណ្ណារ៉ា ប្រធាននាយកដ្ឋានព័ត៌មាន និងផ្សព្វផ្សាយរបស់គណបក្សសង្គ្រោះជាតិត្រូវបានអាជ្ញាធរចាប់ខ្លួនកាលពីថ្ងៃទី១១វិច្ឆិកាកន្លងទៅ ។ បន្ទាប់មកតុលាការបានសម្រេចឃុំខ្លួនបណ្តោះអាសន្នលោកមៀច សុវណ្ណារ៉ានៅឯពន្ធនាគារព្រៃសរក្រោមបទចោទ ដឹកនាំកុបកម្ម ញុះញង់ឲ្យប្រព្រឹត្តបទឧក្រិដ្ឋ និងផ្តើមគំនិតក្នុងអំពើហិង្សា ដោយចេតនាមានស្ថានទម្ងន់ទោស ពាក់ព័ន្ធនឹងអំពើហិង្សានៅជិតទីលានប្រជាធិបតេយ្យ កាលពីថ្ងៃទី១៥ កក្កដា ឆ្នាំ២០១៤កន្លងមក។ ក្រោយការចាប់ខ្លួនមួយថ្ងៃ ពោលគឺនៅថ្ងៃ១២ វិច្ឆិកា គណបក្សសង្គ្រោះជាតិបានចេញសេចក្តីថ្លែងការណ៍ថ្កោលទោស និងអំពាវនាវឲ្យមានការដោះលែងសកម្មជនរបស់ខ្លួនដោយគ្មានលក្ខខណ្ឌ។ ស្របពេលជាមួយគ្នានោះ លោកសម រង្ស៊ី ក៏បានសសេរលិខិតមួយច្បាប់ទៅកាន់រដ្ឋមន្ត្រីក្រសួងមហាផ្ទៃផងដែរ ដើម្បីស្វែងរកការអន្តរាគមន៍ដោះលែងលោកមៀច សុវណ្ណារ៉ា។
យ៉ាងណាក៏ដោយ លិខិតរបស់ប្រធានគណបក្សសង្គ្រោះជាតិនោះទៅដល់ក្រសួងយុត្តិធម៌ ឫយ៉ាងណាមិនត្រូវបានលោកសន សោភ័ណ្ឌ នាយកខុទ្ធកាល័យរដ្ឋមន្ត្រីក្រសួងយុត្តិធម៌បញ្ជាក់ឲ្យដឹងនៅឡើយទេនៅល្ងាចថ្ងៃសុក្រនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ