ក្រសួងមហាផ្ទៃ មិនទទួលលិខិតជូនដំណឹងអំពីសន្និបាតក្រុមប្រឹក្សាជាតិ លើកទី១ របស់គណបក្សសង្គ្រោះជាតិ
គណបក្សសង្គ្រោះជាតិ បានជូនដំណឹង តាមលិខិតមួយច្បាប់ សី្តពី ការរៀបចំធ្វើសន្និបាតគណបក្សលើកទី១ ទៅកាន់ក្រសួង មហាផ្ទៃ។ ជាលិខិតដូចដែលគណបក្សប្រឆាំង បានធ្វើពីលើកមុនៗ ប៉ុន្តែនៅពេលនេះ នាយកដ្ឋានរដ្ឋបាលនៃក្រសួងមហាផ្ទៃ បានបដិសេធមិនព្រមទទួលលិខិតនោះទេ។ លោក យឹម សុវណ្ណ ប្រធានគណៈកម្មាធិការប្រតិបត្តិ គណបក្សសង្គ្រោះជាតិ អះអាងថា បក្សប្រឆាំង នៅតែរក្សាគម្រោងធ្វើមហាសន្និបាត នៅថ្ងៃ២៧កក្កដា នៅដីមួយកន្លែង ក្នុងខណ្ឌឫស្សីកែវ ទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០២:០៧
លិខិតចុះថ្ងៃទី១៧ ខែកក្កដា ឆ្នាំ២០១៤ ចុះហត្ថលេខាដោយលោក យឹម សុវណ្ណ ប្រធានគណៈកម្មាធិការប្រតិបត្តិ គណបក្សសង្គ្រោះជាតិ បានជម្រាបជូនលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ដើម្បីជូនដំណឹងអំពីសន្និបាតក្រុមប្រឹក្សាជាតិ លើកទី១ របស់គណបក្សសង្គ្រោះជាតិ នៅថ្ងៃទី២៧ ខែកក្កដា ឆ្នាំ២០១៤ នៅរាជធានីភ្នំពេញ។
លោក យឹម សុវណ្ណ លើកឡើងថា សន្និបាតក្រុមប្រឹក្សាជាតិ លើកទី១ របស់គណបក្សសង្គ្រោះជាតិ នៅថ្ងៃ២៧កក្កដា នឹងមានអ្នកចូលរួមប្រមាណជា ៥ ពាន់នាក់ ដើម្បីរាយការណ៍អំពីកិច្ចការរយៈពេល ១ ឆ្នាំកន្លងមក លើកឡើងពីផែនការសកម្មភាពរបស់គណបក្សនៅពេលខាងមុខ លើកឡើងពីស្ថានការណ៍នយោបាយ និងរួមគ្នាពិនិត្យលើសម្រេចពាក់ព័ន្ធនឹងស្ថានការណ៍នយោបាយ នៅពេលពេលខាងមុខ។
មន្ត្រីក្រសួងមហាផ្ទៃ មិនព្រមទទួលលិខិតរបស់គណបក្សសង្គ្រោះជាតិ ហើយក៏មិនបានបញ្ជាក់ពីហេតុផលទេ។ លោក ខៀវ សុភ័គ អ្នកនាំពាក្យក្រសួងមហាផ្ទៃ នៅល្ងាចថ្ងៃទី១៨កក្កដានេះ ក៏មិនអាចទាក់ទងបាន។
ប៉ុន្តែសមាជិករដ្ឋសភា លោក ឈាង វុន ប្រធានគណៈកម្មការកិច្ចការបរទេស ឃោសនាការ និងព័ត៌មាន របស់រដ្ឋសភា បានបញ្ជាក់ក្នុងសន្និសីទកាសែត នៅព្រឹកថ្ងៃសុក្រនេះថា វិធានការផ្លូវច្បាប់ប្រឆាំងបាតុកម្ម នៅក្បែរទីលានប្រជាធិបតេយ្យ នាព្រឹកថ្ងៃទី១៥កក្កដា តាមរយៈការចាប់ខ្លួនបេក្ខជនតំណាងរាស្ត្រគណបក្សសង្គ្រោះជាតិ ជាច្រើនរូប ដាក់ពន្ធនាគារ គឺជាការទប់ស្កាត់ កុំឲ្យគណបក្សប្រឆាំង ប្រមូលផ្តុំធ្វើសន្និបាតក្រុមប្រឹក្សាជាតិ នៅថ្ងៃទី២៧កក្កដា។
សន្និបាតប្រមូលផ្តុំមនុស្សប្រមាណ ៥០០០ នាក់នោះ ត្រូវបានលោក ឈាង វុន អះអាងថា អាជ្ញាធររដ្ឋាភិបាល ក្តាប់ព័ត៌មានបាន គឺបើគណបក្សសង្គ្រោះជាតិ បិទផ្លូវបានសម្រេចនៅថ្ងៃ១៥កក្កដា នៅស្ពាននាគ ជិតទីលានប្រជាធិបតេយ្យ នោះការជួបជុំ ក្រោមរូបភាពសន្និបាត នៅថ្ងៃ២៧កក្កដា គឺគណបក្សសង្គ្រោះជាតិ នឹងធ្វើមហាបាតុកម្ម។
យ៉ាងណាក៏ដោយ លោក យឹម សុវណ្ណ នៅតែអះអាងថា គណបក្សសង្គ្រោះជាតិ នឹងរៀបចំការជួបជុំ សន្និបាតក្រុមប្រឹក្សាជាតិ នៅថ្ងៃ២៧កក្កដា នៅដីមួយកន្លែង ក្នុងខណ្ឌឫស្សីកែវ ក្រុងភ្នំពេញ។ គណបក្សប្រឆាំង ក៏នឹងដាក់លិខិតជូនដំណឹងអំពីសន្និបាតនោះ ទៅកាន់សាលាក្រុង នៅពេលឆាប់ៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ