លោកហ៊ុន សែនថានៅកម្ពុជាមិនអាចផ្ទេរអំណាចពីឪទៅកូនបាននោះទេ
ក្រោយមានការសង្ស័យថា និងការចុះផ្សាយរបស់កាសែតឌឹណេស៊ិនរបស់ថៃថា នឹងអាចមានសន្តតិវង្សផ្ទេរអំណាចពីឪពុកមកកូននៅកម្ពុជា ក្នុងត្រកូលលោកនាយករដ្ឋមន្ត្រីហ៊ុន សែននោះ ប្រមុខរដ្ឋាភិបាលអាណត្តិទី៥រូបនេះបានច្រានចោល នៅថ្ងៃទី ៦ សីហានេះថា មិនអាចទៅរួចនោះទេ។ ព្រោះថាកម្ពុជាការឡើងកាន់អំណាចនោះត្រូវធ្វើតាមរយៈការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
“ដំណើរការប្រជាធិបតេយ្យមិនអាចផ្ទេរអំណាចពីឪពុកទៅកូនតាមចិត្តចង់នោះទេ”។ នេះជាការបញ្ជាក់ពីលោកនាយករដ្ឋមន្ត្រី ហ៊ុន សែន ទៅកាន់សាធារណៈជន និងជាការឆ្លើយតបទៅកាន់ការចុះផ្សាយរបស់កាសែតឌឹណេស៊ិនរបស់ថៃ។ ការសែតដែលបានចុះផ្សាយកាលពីពេលថ្មីៗនេះថា កូនប្រុសលោកនាយករដ្ឋមន្ត្រីគឺលោក ហ៊ុន ម៉ាណែតដែលបច្ចុប្បន្នបម្រើការងារជាឧត្តមសេនីយ៍ឋានៈផ្កាយបីនៅក្រសួងការពារជាតិនោះ គឺនឹងឡើងជំនួសតំណែងជានាយករដ្ឋមន្ត្រី ហ៊ុន សែន។ ការថ្លែងទាត់ចោលក្នុងសំដីទន់ភ្លន់យ៉ាងដូចនេះ គឺធ្វើឡើងនៅក្នុងសន្និសឹទអន្តរជាតិលើកទី៥ ស្ពីពីភាពជាអ្នកដឹកនាំបញ្ញវន្តឆ្នើម ២០១៤ ក្នុងសណ្ឋាគារស៊ូភីតែល ទីក្រុងភ្នំពេញ។
ថ្លែងទៅកាន់យុវជនប្រមាណជាង ៦រយនាក់មកពីប្រទេសចំនួន៤៧ លើសកលលោក លោកនាយករដ្ឋមន្ត្រីបានលើកឡើងថា ក្នុងនាមជាប្រមុខរដ្ឋាភិបាលកម្ពុជា លោកពិតជាមានការលំបាកណាស់សម្រាប់លោក នឹងកូនផ្ទាល់ដែលមានសមត្ថភាពខ្ពស់ៗប៉ុន្តែមិនអាចបញ្ចូលទៅជាសមាជិករដ្ឋាភិបាលបាននោះទេ ពីព្រោះខ្លាចថានឹងមានការរិះគន់ថាជាបក្សពួកនិយមនោះ។ លោកនាយករដ្ឋមន្ត្រីអះអាងថា បានត្រឹមតែឱ្យកូនធ្វើការងារមនុស្សធម៌ជំនួសវិញ និងតែងតាំងកូនមន្ត្រីជាន់ខ្ពស់គណបក្សប្រជាជនចូលកាន់តំណែងក្នុងរដ្ឋាភិបាលតែប៉ុណ្ណោះ។
ក្នុងសុន្ទរកថារយៈពេលជាង១ម៉ោងនោះ លោកនាយករដ្ឋមន្ត្រីក៏បានលើកឡើងពីការជំរុញឱ្យមានការផ្លាស់ប្តូរផ្នត់គំនិតរវាងមនុស្សចាស់ និងមនុស្សក្មេងដោយអនុញ្ញាតឱ្យយុវជនក្នុងជួរគណបក្សប្រជាជនកម្ពុជា អាចកាន់តំណែងធំៗសំខាន់ៗក្នុងរដ្ឋាភិបាល ដូចជាតំណែងរដ្ឋមន្ត្រី រដ្ឋលេខាធិការ និងអនុរដ្ឋលេខាធិការជាដើម។ ជាល្បាយដែលលោកនាយករដ្ឋមន្ត្រីបានអះអាងថា ដើម្បីនាំទៅដល់ការរីកចម្រើនក្នុងសង្គមកម្ពុជា។
យ៉ាងណាក៏ដោយអ្នកវិភាគបញ្ហាសង្គម លោកបណ្ឌិត កែម ឡី បានលើកឡើងថា មន្ត្រីជាន់ខ្ពស់ភាគច្រើននៅកម្ពុជាគឺជាកូនចៅសែស្រឡាយរបស់អ្នកធំ អ្នកមានអំណាច។ ដូចនេះ លោក កែម ឡី បានស្នើឱ្យទាំងបក្សកាន់អំណាច បក្សប្រឆាំង និងសង្គមស៊ីវិលត្រូវតែជ្រើសរើសមនុស្សមានសមត្ថភាពពិតប្រាកដឱ្យកាន់ធ្វើការងារបម្រើប្រទេសជាតិ។ព្រោះថាស្ថាប័នរដ្ឋរបស់ជាតិមិនមែនជាកម្មសិទ្ធរបស់ជនណាម្នាក់នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ