ប្រមុខរដ្ឋាភិបាលកម្ពុជា ផ្តើមបំពេញទស្សនកិច្ចទៅក្រៅប្រទេស ខណៈវិបត្តិនយោបាយនៅបន្តជាប់គាំង
លោកនាយករដ្ឋមន្ត្រី ហ៊ុន សែន និងគណៈប្រតិភូជាន់ខ្ពស់កម្ពុជាជាច្រើនរូប បានចាកចេញពីប្រទេសកម្ពុជាហើយនៅព្រឹកថ្ងៃអាទិត្យនេះ ដើម្បីផ្តើមធ្វើដំណើរបំពេញទស្សនកិច្ចរយៈពេលជិត១សប្តាហ៍ ទៅកាន់សាធារណរដ្ឋអាស៊ែបៃហ្សង់ និងសាធារណរដ្ឋបេឡារុស។ ដំណើរទស្សនកិច្ចទៅក្រៅប្រទេសរបស់លោកនាយករដ្ឋមន្ត្រីនៅពេលនេះ បានធ្វើឡើងចំពេលដែលប្រមុខបក្សប្រឆាំងទាំងពីរ ក៏កំពុងបំពេញទស្សនកិច្ចទៅតំបន់អឺរ៉ុប និងសហរដ្ឋអាមេរិកផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
អមដំណើរទស្សនកិច្ចលោកនាយករដ្ឋមន្ត្រី ហ៊ុន សែន ទៅកាន់សាធារណរដ្ឋអាស៊ែបៃហ្សង់ និងសាធារណរដ្ឋបេឡារុសកាលពីព្រឹកមិញ រួមមាន រដ្ឋមន្ត្រីទីស្តីការគណៈរដ្ឋមន្ត្រីលោក សុខ អាន, រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល, លោក ជា ចាន់តូ អគ្គទេសាភិបាលធនាគារជាតិនៃកម្ពុជា, លោក អ៊ុក រ៉ាប៊ុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ និងរដ្ឋមន្ត្រីប្រតិភូអម នាយករដ្ឋមន្ត្រីចំនួន ៣ រូបទៀត រួមមាន លោកសុខចិន្តា សោភា, លោក ស្រ៊ី ថាមរុង្គ លោកកៅ គឹមហួន រួមនឹងសមាជិករាជរដ្ឋាភិបាល និងអ្នកជំនួញជាច្រើនរូបទៀត។
បើតាមគម្រោង លោកនាយករដ្ឋមន្ត្រី ហ៊ុន សែន នឹងចំណាយរយៈពេលបីថ្ងៃនៅសាធារណរដ្ឋអាស៊ែបៃហ្សង់ ចាប់ពីថ្ងៃទី២១ដល់ថ្ងៃទី២៣មេសា នឹងបន្ទាប់មក លោកនាយករដ្ឋមន្ត្រី នឹងធ្វើដំណើរទៅកាន់សាធារណរដ្ឋបេឡារុស ចាប់ពីថ្ងៃទី២៣ដល់ថ្ងៃទី២៥ ខែមេសា។ នេះ
បើតាមការបញ្ជាក់ពី លោក ស្រ៊ី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រីដែលបានថ្លែងប្រាប់ក្រុមអ្នកសារព័ត៌មាននៅឯព្រលានយន្តហោះអន្តរជាតិភ្នំពេញ កាលពីព្រឹកថ្ងៃអាទិត្យនេះ។
បើតាមលោក ស្រ៊ី ថាមរ៉ុងដដែល ក្នុងអំឡុងពេលនៃការបំពេញទស្សនកិច្ចនៅសាធារណរដ្ឋអាស៊ែបៃហ្សង់ លោកនាយករដ្ឋមន្ត្រី ហ៊ុន សែន នឹងអញ្ជើញទៅដាក់កម្រងផ្កា និងគោរពវិញ្ញាណក្ខន្ធនៅវិមានអតីតប្រធានាធិបតី និងវិមាន វីរបុរសស៊ែបៃហ្សង់។ បន្ទាប់មក ក៏មានការចរចាទ្វេភាគី រវាងនាយករដ្ឋមន្ត្រីទាំងពីរ នឹងការចុះហត្ថលេខាលើអនុស្សារណៈយោគយល់គ្នា ស្តីពី ការបង្កើតកិច្ចពិគ្រោះទ្វេភាគី រវាងក្រសួងការបរទេសទាំងពីរផងដែរ។
បន្តមក លោកនាយករដ្ឋមន្ត្រី នឹងជួបសម្តែងការគួរសមជាមួយប្រធានសភា ហើយនៅថ្ងៃទី២២មេសា លោកនាយករដ្ឋមន្ត្រី នឹងចូលជួបសម្តែងការគួរសមជាមួយប្រធានាធិបតី នៃសាធារណរដ្ឋអាស៊ែបៃហ្សង់ ហើយអញ្ជើញទៅទស្សនកិច្ចនៅមជ្ឈមណ្ឌលពាណិជ្ជកម្ម ហ៊ីដអាយឺ និងទស្សនាស្ថានីយផលិតប្រេងផងដែរ។
ដោយឡែក នៅប្រទេសបេឡារុសវិញ តាមគម្រោង លោកនាយករដ្ឋមន្ត្រី ហ៊ុន សែន នឹងធ្វើជាសាក្សីនៃការចុះហត្ថលេខា លើឯកសារចំនួន ៩ ទាក់ទងនឹងវិស័យសុខាភិបាល ឧស្សាហកម្ម រ៉ែ និងថាមពល ពាណិជ្ជកម្ម សេដ្ឋកិច្ច ការការពារវិនិយោគ ការបង្កើតទំនាក់ទំនងមិត្តភាព និងកិច្ចសហប្រតិបត្តិការរវាងក្រុងភ្នំពេញ និងទីក្រុងមិណស្ក៍ វិស័យយោធា ធនាគារ និង កិច្ចសហប្រតិបត្តិការលើវិស័យកសិកម្មជាដើម។ ហើយនៅថ្ងៃទី២៤ខែមេសា លោកនាយករដ្ឋមន្ត្រី នឹងដឹកនាំគណៈប្រតិភូចូលជួបសម្តែងការគួរសមជាមួយលោក អាឡិចសាន់ដ្រឺឡូ កាសសេនកូ ប្រធានាធិបតីបេឡារុស និងចូលជួបពិភាក្សាជាមួយលោក អាទូ លូរ៉ូ ប៊ីនណូវ ប្រធានសភានៃបេឡារុសផងដែរ។ ហើយនៅថ្ងៃទី២៥ខែមេសា លោកនាយករដ្ឋមន្ត្រី នឹងដឹកនាំគណៈប្រតិភូធ្វើមាតុភូមិនិវត្តន៍មកកាន់មាតុប្រទេសវិញ ដែលនឹងមកដល់នៅម៉ោង២និង៥០នាទីរសៀល ថ្ងៃទី២៦ខែ មេសា។
សូមបញ្ជាក់ថា ដំណើរទស្សនកិច្ចទៅក្រៅប្រទេស របស់ប្រមុខរដ្ឋាភិបាលកម្ពុជានៅពេលនេះ បានធ្វើឡើង ជួនចំពេលដែលប្រមុខបក្សប្រឆាំងទាំងពីរ គឺលោក សម រង្ស៊ី និងលោក កឹម សុខា ក៍កំពុងបំពេញទស្សកិច្ចនៅតំបន់អឺរ៉ុប និងសហរដ្ឋអាមេរិកផងដែរ។ ដំណើរចេញទៅក្រៅប្រទេសព្រមៗគ្នា នៃមេដឹកនាំកំពូលបក្សជាប់ឆ្នោតនៅក្នុងរដ្ឋសភាទាំងពីរ ក៍បានធ្វើឡើង ខណៈដែលវិបត្តិនយោបាយក្រោយការបោះឆ្នោតជាង៩ខែមកនេះ នៅមិនទាន់ដោះស្រាយចេញនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ