កម្ពុជា

និស្សិតកម្ពុជា២រូប ត្រូវបានឃាត់ខ្លួន ពីបទចូលលុកលុយក្នុងគេហទំព័រស្ថាប័នជាតិសំខាន់ៗ

ក្រសួងមហាផ្ទៃ បានឃាត់ខ្លួននិស្សិតឆ្នាំទី ៣ នៃសកលវិទ្យាល័យមួយក្នុងទីក្រុងភ្នំពេញ ចំនួន២រូប ពីបទជាប់ពាក់ព័ន្ធនឹងការវាយប្រហារទ្រង់ទ្រាយធំទៅលើបណ្តាញបច្ចេកវិទ្យាព័ត៌មានរបស់ស្ថាប័នជាតិសំខាន់ៗ កាលពីថ្ងៃទី ០៧ មេសាកន្លងទៅនេះ។ បច្ចុប្បន្ន ជនសង្ស័យទាំងពីរនាក់នេះ ត្រូវបានបញ្ជូនទៅកាន់សាលាដំបូង ដើម្បីចាត់ការតាមនីតិវិធី។

ចុះផ្សាយនៅថ្ងៃ៖ 22/04/2014 - 08:49កែប្រែថ្ងៃទី៖ 22/04/2014 - 11:51

ផ្សាយពាណិជ្ជកម្ម

និស្សិតឆ្នាំ ទី ៣ ចំនួន ២រូប នៃសាកលវិទ្យាមួយក្នុងទីក្រុងភ្នំពេញត្រូវបានឃាត់ខ្លួន កាលពីថ្ងៃទី១១ មេសា ឆ្នាំ ២០១៤កន្លងទៅនេះ ដោយការិយាល័យប្រឆាំងបទល្មើសបច្ចេកវិទ្យាព័ត៌មាន នៃនាយកដ្ឋានសន្តិសុខផ្ទៃក្នុង អគ្គស្នងការដ្ឋាននគរបាលជាតិ ក្រសួងមហាផ្ទៃ។ នេះបើតាមការបញ្ជាក់ពីលោក គៀត ច័ន្ទថារិទ្ទ អ្នកនាំពាក្យអគ្គស្នងការដ្ឋាននគរបាលជាតិ នៅថ្ងៃអង្គារ ទី ២២មេសានេះ។

អ្នកនាំពាក្យរូបនេះ បានបន្តថា អ្នកទាំងពីរ ត្រូវបានឃាត់ខ្លួន ពីបទជាប់ពាក់ព័ន្ធនឹងការវាយប្រហារទ្រង់ទ្រាយធំទៅលើបណ្តាញបច្ចេកវិទ្យាព័ត៌មានរបស់ស្ថាប័នជាតិសំខាន់ៗ ដែលមានដូចជា គណៈកម្មាធិការជាតិរៀបចំការបោះឆ្នោត អង្គភាពប្រឆាំងអំពើពុករលួយ ក្រសួងការបរទេស ក្រសួងការពារជាតិនិងសាលារាជធានីភ្នំពេញ ជាដើម។

និស្សិតទាំងពីរនាក់ ត្រូវបានគេស្គាល់ថា ជាសមាជិកនៃក្រុម ហេគឃឺអនាមិកកម្ពុជា រឺ Anonymous Cambodia ដែលតែងតែធ្វើការវាយប្រហារ លើគេហទំព័រនៃស្ថាប័នជាតិសំខាន់ៗ ចាប់តាំងពីមុនការបោះឆ្នោតជាតិជ្រើសរើសតំណាងរាស្ត្រ កាលពីខែកក្កដា ឆ្នាំ២០១៣។ ការវាយប្រហារទាំងអស់នោះមានដូចជា ធ្វើឲ្យគេហទំព័ររអាក់រអួល មិនអាចដំណើរការបាន ជ្រៀតចូលបណ្តាញព័ត៌មានវិទ្យាដោយខុសច្បាប់ និងលួចទិន្នន័យជាតិ សំងាត់ៗ ពីប្រព័ន្ធព័ត៌មាន និងការកែទំព័រដើមនៃគេហទំព័រ ជាដើម។

សូមបញ្ជាក់ថា សមត្ថកិច្ចនាយកដ្ឋានសន្តិសុខផ្ទៃក្នុង នៃក្រសួងមហាផ្ទៃ បានធ្វើការតាមដាន និងសហការស្រាវជ្រាវជាមួយស្ថាប័នFBI ប្រចាំកម្ពុជាអស់រយៈពេលប្រមាណ០៨ខែ ទើបកំណត់ និងឃាត់ខ្លួនជនសង្ស័យទាំងពីរខាងលើបាន។ ទន្ទឹមនោះ សមត្ថកិច្ចកំពុងបន្តស្រាវជ្រាវរកមុខសញ្ញាហេគឃឺជាបក្សពួកនៅសេសសល់ ដើម្បីនាំខ្លួនមកចាត់វិធានការតាមផ្លួវច្បាប់ជាបន្តទៀត។ ហើយបច្ចុប្បន្ននេះ ជនសង្ស័យទាំងពីរនាក់ ត្រូវបានឃុំខ្លួនជាបណ្តោះអាសន្ន ដើម្បីរង់ចាំការសម្រេចពីតុលាការ នៅពេលដែលជំនះជម្រះក្តីរួច។