រដ្ឋាភិបាលពន្យល់តំណាងទូតបរទេស ថាបាតុកម្មហិង្សា មិនពាក់ព័ន្ធដល់កិច្ចចរចានយោបាយឡើយ
ស្របពេលដែលតុលាការចោទប្រកាន់អ្នកតំណាងរាស្ត្រ និងសកម្មជនបក្សប្រឆាំងបញ្ជូនទៅឃុំខ្លួននៅពន្ធនាគារ រដ្ឋាភិបាលក៏បានជួបប្រជុំជាមួយតំណាងទូតបរទេសប្រចាំកម្ពុជាផងដែរ ដើម្បីពន្យល់អំពីចំណាត់ការរបស់ខ្លួនចំពោះបញ្ហានេះ។ កិច្ចប្រជុំ បានប្រព្រឹត្តទៅនៅឯក្រសួងយុត្តិធម៌ដោយមានរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍនា និងមន្ត្រីក្រសួងមហាផ្ទៃជាច្រើននាក់ចូលរួមផង។
ចុះផ្សាយនៅថ្ងៃ៖
ស្តាប់ - ០២:២៦
កិច្ចប្រជុំ បានចាប់ផ្តើមនៅម៉ោង ៤ រសៀល ថ្ងៃទី១៦កក្កដានេះ ដោយមានវត្តមាន លោក អង្គវង្ស វឌ្ឍនា រដ្ឋមន្ត្រីក្រសួងយុត្តិធម៌ លោក ព្រំ សុខា និង លោក សក់ សេដ្ឋា រដ្ឋលេខាធិការក្រសួងមហាផ្ទៃ រួមទាំងមន្ត្រីជាន់ខ្ពស់រដ្ឋាភិបាលជាច្រើនរូបផ្សេងទៀត។
ចំណែកឯតំណាងស្ថានទូតបរទេស ប្រចាំកម្ពុជា ដែលបានចូលរួមកិច្ចប្រជុំ នេះមានដូចជា តំណាងស្ថានទូតអាមេរិក ទូតបារាំង និងតំណាងទូតប្រទេសសំខាន់ៗមួយចំនួនទៀត រួមទាំងតំណាងអង្គការសហប្រជាជាតិ និងសហភាពអឺរ៉ុបផងដែរ។
នេះជាកិច្ចប្រជុំបិទទ្វារ ដែលក្រុមអ្នកកាសែត មិនត្រូវបានអនុញ្ញាតឲ្យចូលស្តាប់នោះទេ លើកលែងតែស្ថាប័នទូរទស្សន៍ដែលពាក់ព័ន្ធ ។ បន្ទាប់ពីបិទបញ្ចប់កិច្ចប្រជុំ ដែលមានរយៈពេលជាងពីរម៉ោង លោក ព្រំ សុខា បានថ្លែងប្រាប់អ្នកសារព័ត៌មានថា នេះគ្រាន់តែជាការជួបពន្យល់ ដល់ក្រុមតំណាងស្ថានទូតបរទេស ព្រោះថាតំណាងស្ថានទូតទាំងនោះ មានការព្រួយបារម្ភ និងថែមទាំងបានលើកជាសំណួរថា តើការប៉ះទង្គិចគ្នាក្នុងបាតុកម្មទាមទារ «រំដោះទីលានប្រជាធិបតេយ្យ» អាចប៉ះពាល់ ដល់កិច្ចចរចានយោបាយ រវាងគណបក្សទាំងពីរ ឬទេ?
លោក ព្រំ សុខា តំណាងឲ្យគណបក្សប្រជាជនកម្ពុជាដែរនោះ បានពន្យល់ប្រាប់តំណាងភាគីអន្តរជាតិថា អំពើហិង្សា រហូតឈានដល់ការចាប់ឃុំខ្លួនអ្នកតំណាងរាស្ត្រទាំង ៥ របស់គណបក្សសង្គ្រោះជាតិ និងសកម្មជនម្នាក់ផងនោះ មិនបានធ្វើឲ្យកិច្ចចរចានយោបាយរវាងគណបក្សជាប់ឆ្នោតទាំងពីរ ត្រូវរាំងស្ទះនោះទេ។
ក្នុងនោះដែរ លោកព្រំ សុខា បានបដិសេធថា អំពើហិង្សាដែលបានកើតឡើងកាលពីថ្ងៃ១៥កក្កដា មិនមែនជាការរៀបចំ ដោយគណបក្សប្រជាជនកម្ពុជា ក្នុងន័យបង្ខំឲ្យមានកិច្ចព្រមព្រៀងនយោបាយនោះទេ។
លោក ព្រំ សុខា បានបញ្ជាក់ថា គណបក្សប្រជាជន នៅតែបើកទ្វារចំហរជានិច្ចសម្រាប់ការចរចា។ លោកបញ្ជាក់ថា មានតែការចរចាទេ ដែលជាជម្រើសល្អបំផុតសម្រាប់ឈានទៅបញ្ចប់បញ្ហាដោយសន្តិវិធី។ ទាក់ទងនឹងការចាប់ខ្លួនតំណាងរាស្ត្រ និងសកម្មជនបក្សប្រឆាំងវិញ តំណាងរដ្ឋាភិបាល បានប្រាប់តំណាងទូតបរទេសថា វាអាស្រ័យទៅលើការសម្រេចតាមផ្លូវច្បាប់ ដោយតុលាការ។ ហើយក៏នឹងមិនមានថ្នូរណាមួយ ដើម្បីដោះដូរសម្រាប់ការចរចានោះដែរ។
ស្របពេលជាមួយគ្នានេះដែរ រដ្ឋមន្ត្រីក្រសួងមហាផ្ទៃ លោក ស ខេង ក៏បានចេញសេចក្តីណែនាំមួយ នៅថ្ងៃទី១៦កក្កដានេះ ដោយស្នើឲ្យអភិបាលរាជធានី និងខេត្តទូទាំងប្រទេសត្រូវណែនាំ ដល់សមត្ថកិច្ចគ្រប់លំដាប់ថ្នាក់ឲ្យស្រាវជ្រាវ និងចាត់វិធានការតាមផ្លូវច្បាប់ចំពោះសកម្មភាពញុះញង់ អុជអាលបង្កអំពើហិង្សានិងចលាចលសង្គម។ លោក ស ខេង ក៏បានប្រាប់ឲ្យអាជ្ញាធរណែនាំប្រជាជនឲ្យថែរក្សាសន្តិភាពស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈក្នុងមូលដ្ឋានរៀងៗខ្លួនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ