ក្រោមឥទ្ធិពលនយោបាយ ទីលានប្រជាធិបតេយ្យត្រូវបានបើកឡើងវិញ
ចុះផ្សាយនៅថ្ងៃ៖
ស្តាប់ - ០៨:០៤
អ្វីៗហាក់បានដំណើរការទៅដោយរលូន នៅក្រោយពេលដែលកិច្ចព្រមព្រៀងនយោបាយ រវាងគណបក្សប្រជាជនកម្ពុជា និងគណបក្សសង្គ្រោះជាតិជិតដល់ទីបញ្ចប់។ ការចូលទៅស្បថ របស់បេក្ខជនជាប់ឆ្នោតទាំង៥៥រូបរបស់គណបក្សសង្គ្រោះជាតិនៅក្នុងព្រះបរមរាជវាំង កាលពីល្ងាចថ្ងៃទី៥សីហា និង ការត្រៀមចូលប្រជុំសភានៅថ្ងៃទី៨សីហារបស់អ្នកតំណាងរាស្ត្របក្សសង្គ្រោះជាតិ គឺជាជំហានថ្មីមួយទៀត ដែលបានបើកផ្លូវឲ្យអាជ្ញាធរក្រុងភ្នំពេញ យល់ព្រមបើកទីលានប្រជាធិបតេយ្យឡើងវិញនាព្រឹកថ្ងៃទី៦សីហាម្សិលមិញនេះ។ បើទោះជាមានការពន្យល់ថា ការបិទទីលានប្រជាធិបតេយ្យកន្លងមកក្រោមហេតុផលសន្តិសុខសណ្តាប់ធ្នាប់ក្តី ប៉ុន្តែការចរចាបញ្ចប់ជម្លោះនយោបាយរវាងគណបក្សជាប់ឆ្នោតទាំងពីរ គឺជាហេតុផលសំខាន់មួយដែលមិនអាចប្រកែកបាន។
