ចំណោទ ដែលមិនគ្រប់គ្រាន់ត្រឹមការពន្យល់
ចុះផ្សាយនៅថ្ងៃ៖
ស្តាប់ - ១១:០៧
សម្ពាធរបស់ម្ចាស់ឆ្នោតស្ថិតលើគណបក្សសង្គ្រោះជាតិ ដែលត្រូវធ្វើសន្និបាតក្រុមប្រឹក្សាជាតិលើកទី១ របស់ខ្លួន នៅថ្ងៃអាទិត្យនេះ ខាងមុខវត្តបទុមវត្ដី ក្រុងភ្នំពេញ។ សន្និបាតនោះជាឱកាសសម្រាប់ពន្យល់អ្នកគាំទ្រអំពីការសម្រេចចិត្តថ្មីៗរបស់មេដឹកនាំ ប៉ុន្តែប្រធានសមាគមសេដ្ឋកិច្ច ប្រធានសហជីពកម្មករ និងតំណាងសហគមន៍ដីធ្លី ដែលធ្លាប់បានចូលរួមក្នុងបាតុកម្មយ៉ាងគគ្រឹកគគ្រេង ដើម្បីគាំទ្រគោលនយោបាយគណបក្សនេះ រម្លឹកពាក្យសន្យានានារបស់លោក សម រង្ស៊ី និងលោក កឹម សុខា។ ពួកគេបញ្ចេញទស្សនៈចំពោះកិច្ចព្រមព្រៀងរវាងគណបក្សសង្គ្រោះជាតិ និងគណបក្សប្រជាជនកម្ពុជា។ ថ្ងៃនេះ ពួកគេមិនត្រឹមតែជម្រុញឱ្យគណបក្សសង្គ្រោះជាតិគោរពការសន្យាប៉ុណ្ណោះទេ ថែមទាំងលើកឡើងអំពីឱសានវាទសម្រាប់មន្ត្រីគណបក្សប្រឆាំង ដែលត្រូវចូលធ្វើការក្នុងរដ្ឋសភា និងក្នុងគណៈកម្មាធិការជាតិរៀបចំការបោះឆ្នោត ជាមួយមន្ត្រីគណបក្សកាន់អំណាចផងដែរ។