ពិព័រណ៍ម្ហូបអាហារខ្មែរ នៅខេត្តសៀមរាប ទទួលបានការចាប់អារម្មណ៍ច្រើនពីភ្ញៀវបរទេស
បន្ទាប់ពីបានបង្កើត កម្មវិធីបង្ហាញម្ហូបអាហារខ្មែរលើកទី១ ប្រកបដោយភាពជោគជ័យ នៅពហុកីឡាដ្ឋានជាតិអូឡាំពិក រាជធានីភ្នំពេញ អង្គការដើម្បីភាពញញឹមនៃកុមារ ដែលហៅថា PSE បានរៀបចំកម្មវិធីនេះជាថ្មី នៅក្នុងខេត្តសៀមរាប។ ជាការរៀបចំ លក្ខណៈសប្បុរសធម៌ ដើម្បីរៃអង្គាសប្រាក់ ជួយដល់កុមារកំព្រា នៃអង្គការ PSE មួយនេះ។ កម្មវិធីនេះ មានរយៈពេល ២ថ្ងៃ ចាប់ពីថ្ងៃទី ០៦ ដល់០៧ ធ្នូ នៅភូមិវប្បធម៌កម្ពុជា ក្នុងទីក្រុងសៀមរាប ចាប់ពីម៉ោង ៥ល្ងាច រហូតដល់ពេលយប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
នេះគឺជាលើកទី២ហើយ ដែលអង្គការភាពញញឹមនៃកុមារ ឬហៅថា PSE បានរៀបចំការបង្ហាញមុខម្ហូបខ្មែរ។ ប៉ុន្តែវាជាលើកទី១ សម្រាប់ការរៀបចំ នៅក្នុងទីរួមខេត្តសៀមរាប។ ការរៀបចំ ត្រូវបានគេធ្វើឡើង រយៈពេល២ថ្ងៃ គឺថ្ងៃទី៦ និងថ្ងៃទី៧ធ្នូ នៅភូមិវប្បធម៌អង្គរសៀមរាប។ អ្នកទស្សនាខ្មែរ អាចចូលរួមទស្សនា ដោយសេរី ប៉ុន្តែសម្រាប់ជនបរទេស គឺត្រូវចំណាយវិភាគទាន ៤ដុល្លារម្នាក់ ក្នុងការចូលទស្សនា។
លោក អ៊ុក ផល្លា នាយករងនៃអង្គការ PSE បានប្រាប់វិទ្យុបារាំងអន្តរជាតិថា ការរៀបចំកម្មវិធីនេះឡើង គឺក្នុងគោលបំណងផ្សព្វផ្សាយឲ្យប្រជាជនក្នុងខេត្តសៀមរាប និងភ្ញៀវទេសចរបរទេស ដែលមកទស្សនាខេត្តទេសចរណ៍នេះ បានស្គាល់ និងភ្លក់ រសជាតិម្ហូបអាហារខ្មែរ។ កម្មវធីនេះ ក៏ជាសកម្មភាពសប្បុរសធម៌មួយ ដើម្បីរៃអង្គាសប្រាក់ ជួយដល់កុមារកំព្រា និងក្រីក្រ ប្រមាណជា ៦៥០០នាក់ នៅក្នុងអង្គការភាពញញឹមនៃកុមារ។
តាមនាយករងនៃកម្មវិធីនេះដដែល បានបន្ថែមថា មុខម្ហូបចំនួន ៤៦ប្រភេទ ត្រូវបានគេដាក់តាំង និងលក់ ដោយមានការចំអិនពីចុងភៅនៃសាលាសណ្ឋាគារ និងទេសចរណ៍ មកពីតាមបណ្តាខេត្តចំនួន ១៦ និងចុងភៅចំអិនអាហារឲ្យកុមារ នៅក្នុងអង្គការ PSE។ ក្រៅពីការបង្ហាញមុខម្ហូប ក៏មានផងដែរ នៅការប្រគុំតន្ត្រី ដែលមានការចូលរួមស្ម័គ្រចិត្ត ពីសិល្បករមួយចំនួន ការសម្តែងរបាំប្រពៃណីខ្មែរ ការបង្ហាញម៉ូតសក់ និងសម្លៀកបំពាក់ ការបង្ហាញក្បាច់គុនខម និងល្បុក្កតោ។ ជាពិសេស គេក៏បានតាំងវេទិកា សម្រាប់ឲ្យសាធារណជន រាំកម្សាន្ត ជាមួយនឹងចម្រៀងប្រពៃណីខ្មែរ និងសម័យផងដែរ។
សូមបញ្ជាក់ថា កាលពីពេលរៀបចំពិធីនេះ នៅភ្នំពេញ អង្គការ PSE ទទួលបានទឹកប្រាក់ ៤ម៉ឺនដុល្លារ។ ដោយសារតែទទួលបានការគាំទ្រច្រើន អ្នករៀបចំកម្មវិធីក៏គ្រោងនឹងបង្កើតកម្មវិធីរបៀបនេះ ជាប្រចាំឆ្នាំ នៅថ្ងៃទី២៩ មិនា រៀបចំនៅទីក្រុងភ្នំពេញ។ ហើយថ្ងៃទី ៦ និង៧ ខែធ្នូ រាល់ឆ្នាំ ធ្វើនៅខេត្តសៀមរាប។
គួរជម្រាបថា អង្គការភាពញញឹមនៃកុមារ កំពុងផ្តល់ជំនួយ ដល់កុមារជាង ៦៥០០នាក់ ក្នុងនោះប្រមាណ ៣០០០នាក់ នៅតាមសាលារដ្ឋ, ១៥០០នាក់ នៅក្នុងកម្មវិធីអប់រំការពារ និង ១៥០០នាក់ទៀត នៅក្នុងកម្មវិធីបណ្តុះបណ្តាលវិជ្ជាជីវៈ។ ហើយអ្វីដែលអង្គការនេះខិតខំ ស្វែងរកជំនួយសប្បុរសធម៌បន្ថែម គឺដើម្បីផ្គត់ផ្គង់ ដែលផ្តោតសំខាន់ដល់ការសិក្សារបស់កុមារខ្វះខាតទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ