បក្សប្រជាជនឆ្លើយតបសំណើរបស់លោក សម រង្ស៊ីនៅថ្ងៃនេះ
បន្ទាប់ពីប្រធានគណបក្សសង្គ្រោះជាតិបានផ្ញើលិខិតទៅគណបក្សប្រជាជនកម្ពុជា តាមរយៈលោក ស ខេង កាលពីម្សិលមិញ នៅថ្ងៃនេះ គណបក្សប្រជាជនកម្ពុជា បានអះអាងថា គណបក្សនឹងឆ្លើយតបវិញនៅថ្ងៃនេះតែម្តង។ ប៉ុន្តែគណបក្សសង្គ្រោះជាតិបដិសេធមិនធ្វើអត្ថាធិប្បាយនោះទេ។
ចុះផ្សាយនៅថ្ងៃ៖
ស្តាប់ - ០២:០០
ភ្លាមៗក្រោយការផ្ញើលិខិតសុំវិសោធនកម្មរដ្ឋធម្មនុញ្ញនូវមាត្រាមួយចំនួននោះ គណបក្សប្រជាជនកម្ពុជាបានអះអាងថា ខ្លួននឹងឆ្លើយទៅកាន់គណបក្សប្រឆាំងវិញនៅថ្ងៃព្រហស្បតិ៍នេះតែម្តង។ មន្ត្រីការិយាល័យនយោបាយគណបក្សប្រជាជនកម្ពុជា លោក ជាម យៀប បានបញ្ជាក់ថា បើទោះបីមិនទាន់មានការឆ្លើយតបប៉ុន្តែយ៉ាងយូរនៅល្ងាចនេះ គណបក្សកាន់អំណាចនឹងឆ្លើយតបវិញ។ ព្រោះថាការស្នើសុំរបស់ប្រធានគណបក្សប្រឆាំង នូវសេចក្តីព្រាងច្បាប់រដ្ឋធម្មនុញ្ញ ស្តីពី វិសោធនកម្មមាត្រា ៧៦ និងការបង្កើតជំពូកថ្មី ទាក់ទងនឹងអង្គការរៀបចំការបោះឆ្នោតនោះ គណបក្សប្រជាជនកម្ពុជាត្រូវការពិនិត្យពិច័យ។
ដោយឡែក លោក ព្រុំ សុខា វិញ បានលើកឡើងថា សំណើដែលគណបក្សសង្គ្រោះជាតិស្នើនេះ គឺជាអ្វីដែលគណបក្សរបស់លោក បាននិងកំពុងតែធ្វើរួចរាល់ហើយ។ លោកបញ្ជាក់ថា មាត្រា ៧៦ និងមាត្រា ១៥០ ១៥១ជាដើមក្តី គឺជាកិច្ចការដែលត្រូវការពេលវេលាច្រើន។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មិនបានធ្វើអត្ថាធិប្បាយអ្វីនោះទេ ព្រោះត្រូវទុកពេលវេលាឲ្យក្រុមការងារបក្សទាំងពីរធ្វើការជាមួយគ្នាជាមុនសិន។
សូមបញ្ជាក់ថា ក្នុងលិខិតផ្ញើទៅកាន់លោក ស ខេង រដ្ឋមន្ត្រីក្រសួងមហាផ្ទៃ និងជាគណៈអចិន្ត្រៃយ៍គណបក្សប្រជាជន លោក សម រង្ស៊ី បានស្នើឲ្យលោក ស ខេងពិនិត្យលើសេចក្តីព្រាងដែលបានផ្ញើជូន។ បើតាមលិខិតដដែលនោះ សមាជិកទាំង៥៥រូបរបស់គណបក្សសង្គ្រោះជាតិ នឹងអាចកំណត់ថ្ងៃចូលស្បថសច្ចាប្រណិធានក្នុងព្រះបរមរាជវាំង បើគណបក្សប្រជាជនកម្ពុជា ទទួលយកនូវខ្លឹមសារនៃសេចក្តីព្រាងនេះ។
តាំងពីក្រោយការបិទបញ្ចប់ជម្លោះនយោបាយដោយការចរចាថ្នាក់កំពូលតាំងពីថ្ងៃទី២២ កក្កដាមក គណបក្សសង្គ្រោះជាតិនៅមិនទាន់កំណត់ថ្ងៃចូលស្បថកាន់តំណែងនៅឡើយនោះទេ។ មិនទាន់ចូលស្បថព្រោះគណបក្សសង្គ្រោះជាតិនៅបន្តទាមទារឲ្យមានការព្រមព្រៀងជាគោលការណ៍រវាងក្រុមការងារកំណែទម្រង់ស្ថាប័នរដ្ឋសភា ស្ថាប័នគណៈកម្មាធិការជាតិរៀបចំការបោះឆ្នោត និងស្ថាប័នរដ្ឋធម្មនុញ្ញជាមុនសិន។ រហូតមកដល់ពេលនេះ ក្រុមការងារទាំងពីរគណបក្ស សម្រេចបានជាគោលការណ៍ចំនួន២រួចហើយ គឺគោលការណ៍កំណែទម្រង់រដ្ឋសភា និង កំណែទម្រង់គ.ជ.ប។
គួរកត់សម្គាល់ថា បើទោះបីជាមានការស្នើសុំការព្រមព្រៀងជាបន្តបន្ទាប់ពីគណបក្សសង្គ្រោះជាតិនេះ គណបក្សប្រជាជនកម្ពុជាក៏នៅតែបន្តយុទ្ធសាស្ត្រត្រជាក់ថ្នមស្ថានការណ៍ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ