តុលាការនឹងបើកសវនាការពេញអង្គលើសំណុំរឿងជនជាប់ចោទទាំង២១នាក់ នៅថ្ងៃទី២៥មេសា
តុលាការសាលាដំបូងរាជធានីភ្នំពេញ នឹងបើកសវនាការពេញអង្គលើសំណុំរឿង របស់ជន ជាប់ចោទទាំង ២១នាក់ រួមទាំងលោក វន់ ពៅផង នៅព្រឹកថ្ងៃសុក្រ ទី២៥ មេសាខាងមុខ។ ជាការបើកសវនាការ ដែលទាំងសង្គមស៊ីវិល និងមេធាវីការពារកូនក្តីសង្ឃឹមថា នឹងមានសញ្ញាវិជ្ជមានច្រើន សម្រាប់ជនជាប់ចោទទាំង ២១នាក់នោះ។ នៅក្នុងសវនាការថ្ងៃទី ២៥មេសានោះផងដែរ ជនចាប់ចោទទាំង ២១នាក់ ក៏នឹងបង្ហាញវត្តមាននៅក្នុងសវនាការព្រមគ្នាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ជនជាប់ចោទទាំង២១នាក់ ដែលជាសកម្មជនសិទ្ធិមនុស្ស និងកម្មករ ដែលបានជាប់បណ្តឹង នៅក្នុងហេតុការណ៍ប៉ះទង្គិចគ្នា កាលពីថ្ងៃទី២ និងទី៣ ខែមករាកន្លងទៅ នឹងត្រូវចូលខ្លួន ក្នុងបន្ទប់សវនាការ នៅថ្ងៃទី២៥មេសាខាងមុខ ដើម្បីឲ្យចៅក្រមសម្រេចថា ពួកគេត្រូវទទួលការកាត់ទោស ឬត្រូវឲ្យរួចទោសពីបទចោទប្រកាន់ទាំងអស់។
លោក អំ សំអាត ប្រធានបច្ចេកទេសស៊ើបអង្គេតអង្គការលីកាដូ បានឲ្យដឹងថា លោកមានសុទិដ្ឋិនិយមច្រើន ចំពោះសវនាការនេះ ថាជនជាប់ចោទទាំង២១នាក់ នឹងអាចទទួលបានការដោះលែងឲ្យមានសេរីភាពឡើងវិញ។ តំណាងមន្ត្រីសង្គមស៊ីវិលដដែល បានបញ្ជាក់ថា ជនជាប់ចោទទាំង ២១នាក់ ដោយរួមមានទាំងលោក វន់ ពៅ ប្រធានសមាគមសេដ្ឋកិច្ចក្រៅប្រព័ន្ធផង ក៏នឹងមានវត្តមាន នៅក្នុងបន្ទប់សវនាការនេះផងដែរ ព្រោះថានៅព្រឹកថ្ងៃពុធនេះ ពួកគេត្រូវបានបញ្ជូនមកដល់មណ្ឌល ម១ ក្នុងទីក្រុងភ្នំពេញហើយ។
លោក អាត់ ធន់ ប្រធានសហភាពការងារកម្ពុជា ក៏បានសម្តែងក្តីសង្ឃឹម ចំពោះសវនការនៅថ្ងៃសុក្រដែរ ដោយលោកលើកឡើងថា ប្រសិនបើ មិនមានពាក់ព័ន្ធនឹងរឿងនយោបាយ អ្នកទាំង ២១នោះ ប្រាកដជាអាចមានសេរីភាពឡើងវិញ ព្រោះយោងតាមការពិនិត្យអង្គសេចក្តីទាំងមូល ពួកគេគួរតែត្រូវបានដោះលែង។
មេធាវីការពារក្តីលោក វន់ ពៅ គឺលោក គឹម សុជាតិ បានប្រាប់វិទ្យុបារាំងអន្តរជាតិថា លោកបានរៀបចំសេចក្តីសន្និដ្ឋានការពារមួយចំនួន សម្រាប់ចោទសួរជនពាក់ព័ន្ធ រួមទាំងរៀបចំអង្គច្បាប់រួចរាល់ហើយ ដើម្បីបង្ហាញចៅក្រម។ លោក សុជាតិ បានឲ្យដឹងថា អ្វីដែលលោកបានសិក្សាកន្លងមក គឺលោកសង្ឃឹមថាកូនក្តី របស់លោកអាចមានសេរីភាពបាន ប្រសិនបើតុលាការពិនិត្យ និងពិចារណាលើហេតុការណ៍ពិត នោះលោកវ៉ន ពៅ នឹងមិនមានកំហុស ហើយតុលាការនឹងអាចដោះលែងគាត់បាន។
សូមបញ្ជាក់ថា បន្ទាប់ពីមានការប៉ះទង្គិចគ្នា រវាងក្រុមកម្មករ និងកងកម្លាំងទ័ពឆ័ត្រយោង៩១១ នៅរោងចក្រយ៉ាកជីង កាលពីថ្ងៃទី០២ និងទី០៣ មករាមក សមត្ថកិច្ចយោធា និងមន្ត្រីកងរាជអាវុធហត្ថ បានចាប់ខ្លួនសកម្មជនសិទ្ធិមនុស្ស សកម្មជនដីធ្លី និងកម្មករចំនួន២៣នាក់ ព្រមទាំងបានបញ្ជូន ទៅដាក់ក្នុងមន្ទីរឃុំឃាំង ត្រពាំងផ្លុង ឬ ម៣ នៅក្នុងខេត្តកំពង់ចាម។ តុលាការសាលាដំបូងរាជធានី បានចោទប្រកាន់ពួកគេ ពីបទហិង្សា និងធ្វើឲ្យខូចខាត ដោយចេតនា មានស្ថានទម្ងន់ទោស។
ប៉ុន្តែបន្ទាប់ពីបានធ្វើការស៊ើបសួរចប់ តុលាការបានប្តូរបទចោទពួកគេ ពីបទល្មើសខាងលើ ទៅជាការញុះញង់ឲ្យប្រព្រឹត្តបទល្មើសវិញ។ គួរជម្រាបជូនថា ក្នុងចំណោមជនជាប់ចោទទាំង២៣នាក់ គឺមានតែ២នាក់ប៉ុណ្ណោះ ដែលត្រូវបានតុលាការសម្រេចដោះលែងឱ្យនៅក្រៅឃុំបណ្តោះអាសន្នកាលពីខែកុម្ភៈកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ