គណបក្សប្រឆាំងថា យុទ្ធនាការរបស់ខ្លួននៅខេត្តកំពង់ចាម រងការគម្រាមកំហែង
គណបក្សសង្គ្រោះជាតិបានចោទប្រកាន់ថា អាជ្ញាធរមានការចល័តទ័ពដើម្បីគម្រាមកំហែងគណបក្សប្រឆាំង នៅខេត្តកំពង់ចាម ខណៈដែលគណបក្សប្រឆាំងនេះផ្តើមធ្វើការឃោសនាបោះឆ្នោតទ្រង់ទ្រាយធំដើម្បីជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ។ ជាមួយគ្នានេះទាំងមន្ត្រីរៀបចំការបោះឆ្នោតខេត្ត ក៏ដូចជាអាជ្ញាធរមូលដ្ឋាន បានថ្លែងថា ការឃោសនារបស់គណបក្សសង្គ្រោះជាតិ បានប្រព្រឹត្តទៅជាធម្មតា មិនមានឧបសគ្គអ្វីកើតឡើងឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
បន្ទាប់ពីសំណេះសំណាលជាមួយសមាជិកក្រុមប្រឹក្សារបស់ខ្លួន លោក សម រង្ស៊ី និងលោកកឹម សុខា ប្រធាននិងអនុប្រធានគណបក្សសង្គ្រោះជាតិ បានដឹកនាំដង្ហែក្បួនឃោសនាបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ នៅខេត្តកំពង់ចាម ដោយនៅព្រឹកថ្ងៃអាទិត្យទី០៤ឧសភានេះ បានឈានចូលថ្ងៃទីបីហើយនៃយុទ្ធនាការ។ មន្ត្រីគណបក្សសង្គ្រោះជាតិប្រាប់ថា មានមនុស្សប្រមាណជា១ម៉ឺននាក់ចូលរួម។
ជាមួយគ្នានេះគេពិនិត្យឃើញថា ពុំមានអំពើហិង្សាណាមួយកើតឡើងនោះទេ។ ក៏ប៉ុន្តែលោក ម៉ៅ មុនីវណ្ណ តំណាងរាស្ត្រជាប់ឆ្នោតមណ្ឌលកំពង់ចាម បានថ្លែងថា អាជ្ញាធរមានការបង្ហាញកំលាំងដូចគេធ្វើសមយុទ្ធ កាលពីយប់មិញ ដោយកងកម្លាំងបំពាក់ដោយឯកសណ្ឋានទាហានប្រយុទ្ធនិងអាវុធស្វ័យប្រវត្តិ ក្នុងគោលបំណងបំបាក់ស្មារតីគណបក្សប្រឆាំង។
គណបក្សសង្គ្រោះជាតិនៅថ្ងៃទី ០៤ ឧសភាដែរ បានចេញសេចក្តីប្រកាសព័ត៌មានមួយដែលថា មានការចល័តទ័ពជាច្រើននៅក្បែរទីតាំងដែលគណបក្សសង្គ្រោះជាតិគ្រោងរៀបចំយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២នេះ។
ជាមួយគ្នានេះ អធិការប៉ូលិសស្រុកកំពង់សៀម លោក ប៉ាក ជាតិ ដែលមានភារកិច្ចសម្រួលការងារសន្តិសុខសណ្តាប់ធ្នាប់នៅទីតាំងជាមួយគ្នានៃស្នាក់ការធំរបស់គណបក្សសង្គ្រោះជាតិប្រចាំខេត្តកំពង់ចាម បានឲ្យដឹងថា លោកមិនឃើញមានអ្វីកើតឡើងក្រៅពីការថ្លែងសារនយោបាយ របស់មេបក្សប្រឆាំងនិងការហែក្បួនតាមផ្លូវមួយចំនួនរបស់ខេត្តឡើយ។
ដោយឡែក លោក មាន ម៉េងហួន ប្រធានគណៈកម្មការរៀបចំការបោះឆ្នោតខេត្តកំពង់ចាមក៏បានថ្លែងប្រាប់វិទ្យុបារាំងអន្តរជាតិ RFI ដែរថា លោកមិនឃើញមានការគម្រាមកំហែងអ្វីជាក់ស្តែង ខណៈពេលដែលមានការឃោសនារបស់គណបក្សសង្គ្រោះជាតិនោះទេ ក៏ប៉ុន្តែលោកថា វាជាការធ្មតាដែលមានការដាក់សមត្ថកិច្ចជួយរៀបចំសណ្តាប់ធ្នាប់នៅពេលដែលមានការហែក្បួនធំដុំដូច្នេះ។
សូមបញ្ជាក់ថា ការបោះឆ្នោតដើម្បីជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ នឹងប្រព្រឹត្តទៅ នៅថ្ងៃទី១៨ខែឧសភា ឆ្នាំ២០១៤។ ក៏ប៉ុន្តែ យុទ្ធនាការឃោសនាគឺចាប់ពីថ្ងៃទី២ដល់ថ្ងៃទី ១៦ខែឧសភា។ សម្រាប់ខេត្តកំពង់ចាម អង្គបោះឆ្នោតមានចំនួន ៨១៧នាក់ ហើយត្រូវជ្រើសរើសសមាជិកក្រុមប្រឹក្សាក្រុង ស្រុក ចំនួន១៨២នាក់ និងសមាជិកខេត្តចំនួន២១នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ