មេបក្សសង្គ្រោះជាតិផ្តើមបញ្ចេញសកម្មភាពឡើងវិញបន្ទាប់ពីវិបត្តិនយោបាយ
នៅថ្ងៃសុក្រ ទី ១៥ សីហា នេះ ប្រធាននិងអនុប្រធានគណបក្សសង្គ្រោះជាតិ បានបែងចែកការងារគ្នាដាច់ដោយឡែកពីគ្នា។ ប្រធានគណបក្សសង្គ្រោះជាតិទៅជួបប្រជាពលរដ្ឋដែលមានជម្លោះដីធ្លី ចំណែកឯអនុប្រធានគណបក្សចុះពង្រឹងមូលដ្ឋាននៅតាមខេត្ត។ ប៉ុន្តែអ្នកវិភាគនយោបាយបានស្នើឱ្យគណបក្សសង្គ្រោះជាតិយកបញ្ហាដែលកើតឡើងប្រើក្នុងយន្តការរបស់សភា។
ចុះផ្សាយនៅថ្ងៃ៖
ស្តាប់ - ០២:១២
ក្រោយការបិទបញ្ចប់វិបត្តិនយោបាយ មេដឹកនាំគណបក្សសង្គ្រោះជាតិ បានផ្តើមបញ្ចេញសកម្មភាពរបស់ខ្លួនឡើងវិញ។ នៅរសៀលថ្ងៃសុក្រនេះលោក សម រង្ស៊ីនឹងជួបប្រជាពលរដ្ឋដែលមានជម្លោះដីធ្លីមកពីខេត្តកំពង់ស្ពឺ។ ជាជំនួបដែលធ្វើឡើនៅក្នុងវត្តសាមគ្គីរង្សី។
ដោយឡែកអនុប្រធានគណបក្ស លោក កឹម សុខាវិញ នឹងទៅជួបជាមួយប្រជាពលរដ្ឋរងគ្រោះដោយទឹកជំនន់ ក្នុងខេត្តចំនួន៣ គឹខេត្តកំពង់ចាម ខេត្តត្បូងឃ្មុំ និងខេត្តព្រៃវែង រួមទាំងការពង្រឹងមូលដ្ឋានរបស់គណបក្សផងដែរ។
អ្នកវិភាគស្ថានការណ៍នយោបាយនៅកម្ពុជាលោកបណ្ឌិត សុខ ទូចបានមានប្រសាសន៍ថាការជួបប្រជាពលរដ្ឋរបស់មេដឹកនាំគណបក្សប្រឆាំងគឺគ្រាន់តែជាសារបញ្ជាក់ពីបក្សប្រឆាំងថា គណបក្សមិនបំភ្លេចចំពោះសកម្មភាពរបស់ខ្លួនពីមុនទេ។ ប៉ុន្តែលោកបណ្ឌិតសុខ ទូច បានសង្កត់ធ្ងន់ថា ដើម្បីដោះស្រាយបញ្ហាទាំងនេះ គណបក្សប្រឆាំងដែលសមាសភាពខ្លាំងនៅក្នុងសភារួចទៅហើយនោះ គួរតែប្រើប្រាស់យន្តការប្រព័ន្ធច្បាប់ និងលើកយកបញ្ហាទាំងនេះ ទៅក្នុងសភា។ សភាដែលជាអង្គនីតិបញ្ញត្តិ។ បើមិនដូច្នោះទេសកម្មភាពនេះ គឺគ្រាន់តែជាទង្វើដែលបង្ហាញជារូបភាព និងមិនអាចដោះស្រាយបញ្ហាបាននោះទេ។
ឆ្លើយតបនឹងការលើកឡើងនេះ អ្នកនាំពាក្យគណបក្សសង្គ្រោះជាតិលោក យ៉ែម ប៉ុញ្ញឫទ្ធិ បានអះអាងថាគណបក្សប្រឆាំងមិនដែលភ្លេចពីសកម្មភាពឆ្ពោះទៅមូលដ្ឋាន និងមិនដែលបោះបង់ និងគោលការណ៍ដើម្បីប្រយោជន៍ប្រជាពលរដ្ឋឡើយ។ សូមរំលឹកបន្តិចថា មុននឹងការចុះទៅជួបជាមួយពលរដ្ឋដែលមានទំនាស់ដីធ្លីមកពីខេត្តកំពង់ស្ពឺនេះ ប្រធានគណបក្សសង្គ្រោះជាតិលោក សម រង្ស៊ី កាលពីថ្ងៃព្រហស្បតិ៍ម្សិលមិញ បានទៅជួបប្រជាពលរដ្ឋដែលមានទំនាស់ដីធ្លីមកពីភូមិឡពាងដែលកំពុងស្នាក់នៅតំបន់បឹងកក់រួចហើយ។
យ៉ាងណាក៏ដោយទន្ទឹមនឹងការបញ្ចេញសកម្មភាពរបស់មេបក្សប្រឆាំងនេះ រដ្ឋាភិបាលដែលដឹកនាំដោយគណបក្សប្រជាជនកម្ពុជាវិញ បានអះអាងថាខ្លួនមិនបានព្រងើយកន្តើយនោះទេ។នេះបើតាមការបញ្ជាក់ពីលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី។លោកផៃស៊ីផានបានបន្តថា ចំពោះបញ្ហាដីធ្លីនៅឡពាង និងបណ្តាតំបន់ផ្សេងទៀតគឺជាដំណោះស្រាយតាមទិដ្ឋភាពតុលាការតែប៉ុណ្ណោះ ។ ដូច្នេះមិនគួរប្រើប្រាស់ទិដ្ឋភាពនយោបាយចូលឡូកឡំដែលនឹងនាំឱ្យមានបញ្ហាស្មុគស្មាញពិបាកដោះស្រាយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ