សង្គមស៊ីវិលនឹងផ្ញើក្តីព្រួយបារម្ភដល់ប្រទេសឡាវម្តងទៀតស្តីពីទំនប់ដនសាហុង
អង្គការសង្គមស៊ីវិលមិនទុកចិត្តប្រទេសឡាវ បន្ទាប់ពីការផ្អាកសាងសង់ទំនប់ដនសាហុងរយៈពេល៦ខែ គិតចាប់តាំងពីចុងខែមេសាឆ្នាំ២០១៤កន្លងទៅនេះ។ ការមិនទុកចិត្តដោយសារតែប្រទេសឡាវកំពុងបន្តសកម្មភាពសាងសង់ស្ពានមួយចំនួននៅតំបន់នោះ។ ជាមួយគ្នានេះក្រុមអង្គការសង្គមស៊ីវិលក៏បានអំពាវនាវដល់រដ្ឋាភិបាលប្រទេសដងទន្លេមេគង្គទាំង៤ និងជំរុញឲ្យម្ចាស់គម្រោងសិក្សាឲ្យហ្មត់ចត់បន្ថែមទៀតពីផលប៉ះពាល់។
ចុះផ្សាយនៅថ្ងៃ៖
ស្តាប់ - ០២:១៩
ទោះជាមានការសន្យាពីភាគីឡាវស្តីពីការផ្អាកការអភិវឌ្ឍន៍ទំនប់វារីអគ្គីសនីដនសាហុង ក៏ដោយ ក៏អង្គការសង្គមស៊ីវិលនៃបណ្តាប្រទេសប្រជាជាតិទន្លេមេគង្គ នៅតែសម្តែងការព្រួយ
បារម្ភដដែល ដោយហេតុថា ផុតពីការផ្អាករយៈពេល៦ខែទៅតើភាគីឡាវ នឹងបញ្ឈប់
សកម្មភាពសាងសង់ឬយ៉ាងណា?
លោក តឹក វណ្ណារ៉ា នាយកប្រតិបត្តិនៃវេទិកាមិនមែនរដ្ឋាភិបាលស្ដីពីកម្ពុជាបានលើកឡើងថា
គេមិនអាចជឿជាក់បានទេថា ប្រទេសឡាវនឹងបញ្ឈប់គម្រោងសាងសង់របស់ខ្លួន នៅពេលដែលគេរកឃើញថា សំណង់វារីអគ្គីសនីនោះមានផលប៉ះពាល់ឆ្លងដែនធ្ងន់ធ្ងរ។
ពាក់ព័ន្ធទៅនឹងភាពមិនច្បាស់លាស់របស់ភាគីឡាវនាពេលនេះ ក្រុមអង្គការសង្គមស៊ីវិលគ្រប់បណ្តាប្រទេសនៅតាមដងទន្លេមេគង្គនឹងធ្វើការសិក្សានិងស្រង់យកមតិយោបល់ព្រួយបារម្ភពីប្រជាពលរដ្ឋដែលរស់នៅតាមដងទន្លេមេគង្គ ហើយធ្វើជារបាយការណ៍បញ្ជូនទៅកាន់រដ្ឋាភិបាលឡាវ ម្ចាស់គម្រោងដនសាហុង និងគណៈកម្មការទន្លេមេគង្គ។
ជាមួយគ្នានេះ ពួកគេក៏គ្រោងសរសេរលិខិតទៅប្រមុខរដ្ឋាភិបាលនៃប្រទេសទាំង៤ ដែលស្ថិតនៅជាប់ទន្លេមេគង្គ មានកម្ពុជា វៀតណាម ឡាវ និងថៃ ថែមទាំងចង់ឲ្យភាគីឡាវយកក្តីព្រួយបារម្ភ ទាំងនេះ ទៅបញ្ចូលក្នុងផែនការអភិវឌ្ឍន៍ផងដែរ។
កាលពីពេលថ្មីៗនេះ នៅក្នុងជំនួបជាមួយឯកអគ្គរដ្ឋទូតឡាវថ្មី លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា ក៏បានរំលឹកភាគីឡាវពីការប្រើប្រាស់ទឹកដោយចីរភាពនៅតាមដងទន្លេមេគង្គដែរ ដោយភាគីឡាវបានសម្រេចផ្អាកការសាងសង់បន្ទាប់ពីមានកិច្ចប្រជុំមួយកាលពីចុងខែមេសាកន្លងទៅនេះនៅប្រទេសថៃ។
ក៏ប៉ុន្តែលោក តឹក វណ្ណារ៉ា យល់ថានេះគឺគ្រាន់តែជាការរំលឹកមួយប៉ុណ្ណោះ ក៏ប៉ុន្តែគម្រោងអភិវឌ្ឍន៍នៅលើទីតាំងជាក់ស្តែង ឃើញថាភាគីឡាវនៅបន្តមានសកម្មភាពនៅឡើយ ដោយគេកំពុងធ្វើស្ពានពីចំណុចហួសាដាំ ភ្ជាប់ទៅចំណុចហួសាហុង នៃប្រទេសឡាវ ដែលជាផ្នែកមួយសម្រួលដល់ការសាងសង់ទំនប់ដនសាហុង។
ទោះជាយ៉ាងនេះ ក្តី ការសាងសង់ទំនប់ដនសាហុងរបស់ភាគីឡាវ នៅលើទីតាំងទន្លេមេនៃទន្លេមេគង្គ នៅតែបង្កផលប៉ះពាល់ធ្ងន់ធ្ងរដល់ខ្សែទឹកខាងក្រោម ដូចជាធនធានជលផល ការ
ប៉ះពាល់ដល់ប្រព័ន្ធជីវៈចម្រុះ និងការប្រកបការងារកសិកម្មរបស់ពលរដ្ឋដែលរស់នៅតាមដងទន្លេមេគង្គជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ