ប្រធានមជ្ឈមណ្ឌលសិទ្ធិមនុស្ស ស្នើរដ្ឋមន្ត្រីក្រសួងមហាផ្ទៃ អនុវត្តច្បាប់បាតុកម្ម
ប្រធានមជ្ឈមណ្ឌលសិទ្ធិមនុស្សកម្ពុជា បានស្នើដល់លោក ស ខេង រដ្ឋមន្ត្រីក្រសួងមហាផ្ទៃ ឲ្យអនុវត្តច្បាប់បាតុកម្ម ដោយជំរុញឲ្យអាជ្ញាធរមូលដ្ឋាន បញ្ឈប់លក្ខខណ្ឌតម្រូវឲ្យសុំការអនុញ្ញាត ចំពោះការរៀបចំវគ្គបណ្តុះបណ្តាល និងព្រឹត្តិការណ៍ជួបជុំនានាស្រដៀងគ្នា។ តាមប្រធានអង្គការសង្គមស៊ីវិល ការរៀបចំធ្វើបាតុកម្មដោយសន្តិវិធី ឬការជួបជុំ នៅទីកន្លែងសាធារណៈណាមួយ គ្រាន់តែជាការជូនដំណឹង មិនមែនត្រូវសុំច្បាប់ដូចកន្លងមកនោះទេ។
ចុះផ្សាយនៅថ្ងៃ៖
ស្តាប់ - ០២:២៣
មជ្ឈមណ្ឌលសិទ្ធិមនុស្សកម្ពុជា បានសម្តែងក្តីបារម្ភទាក់ទិនទៅនឹងការអនុវត្តច្បាប់ស្តីពីការធ្វើបាតុកម្មដោយសន្តិវិធី។ ក្តីបារម្ភនោះ ត្រូវបានលោកស្រី ចក់ សុភាព នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា យោងលើព្រឹត្តិការណ៍ កាលពីថ្ងៃអាទិត្យ ទី១៧សីហា ដែលប៉ូលិស និងអាជ្ញាធររាជធានីភ្នំពេញ បានរារាំងគម្រោងជិះកង់ ដើម្បីលើកកម្ពស់ការយល់ដឹងពីបរិស្ថាន និងប្រឆាំងផែនការសាងសង់ទំនប់វារីអគ្គិសនី ស្ទឹងអារ៉ែង នៅខេត្តកោះកុង។
តាមលិខិត មជ្ឈមណ្ឌលសិទ្ធិមនុស្សកម្ពុជាក៏ធ្លាប់ជួបប្រទះបញ្ហាលំបាកជាមួយអាជ្ញាធរមូលដ្ឋាន នាពេលកន្លងទៅ។ អាជ្ញាធរ បានប្រាប់មជ្ឈមណ្ឌលសិទ្ធិមនុស្សកម្ពុជា ថាចាំបាច់ត្រូវមានការសុំអនុញ្ញាតច្បាប់ចំពោះអង្គការទាំងឡាយណា ដែលមានបំណងរៀបចំវគ្គបណ្តុះបណ្តាល និងព្រឹត្តិការណ៍នានាស្រដៀងគ្នានេះ។
លោកស្រី ចក់ សុភាព នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លើកឡើងថា មាត្រា ៥ នៃច្បាប់ស្តីពីការធ្វើបាតុកម្មដោយសន្តិវិធីចែងថា “ក្រុមបុគ្គលណា ដែលមានបំណងរៀបចំធ្វើបាតុកម្មដោយសន្តិវិធី នៅទីកន្លែងសាធារណៈណាមួយ ត្រូវជូនដំណឹងជាលាយលក្ខ ណ៍អក្សរ ទៅអាជ្ញាធរដែនដីរាជធានី ឬខេត្តមានសមត្ថកិច្ចគ្រប់គ្រងទីកន្លែងនោះ។ រីឯមាត្រា ១០ ចែងថា “ប្រសិនបើអាជ្ញាធរដែនដីរាជធានី ឬខេត្តមានសមត្ថកិច្ចខកខានមិនបានឆ្លើយតប រហូតដល់ពេលកំណត់ដែលនឹងត្រូវធ្វើបាតុកម្មដោយសន្តិវិធី មានន័យថា អាជ្ញាធរដែនដីរាជធានី ឬខេត្តមានសមត្ថកិច្ចបានព្រមព្រៀងហើយ។
លោកស្រី ចក់ សុភាព គូសបញ្ជាក់ថា ច្បាប់បាតុកម្ម មិនបានតម្រូវឲ្យបាតុករសុំការអនុញ្ញាតពីសំណាក់អាជ្ញាធរមូលដ្ឋាននោះទេ។ ច្បាប់នេះ គ្រាន់តែតម្រូវឲ្យបាតុករជូនដំណឹងទៅអាជ្ញាធរពាក់ព័ន្ធនានាតែប៉ុណ្ណោះ។
មិនទាន់មានការឆ្លើយតបបែបណាពីលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជុំវិញការលើកឡើងខាងលើនៅឡើយទេ។ ប៉ុន្តែលោកឡុងឌីម៉ង់ អ្នកនាំពាក្យសាលារាជធានីភ្នំពេញ ដែលស្ថិតក្រោមការគ្រប់គ្រងរបស់ក្រសួងមហាផ្ទៃ បានលើកឡើងថា អាជ្ញាធរមូលដ្ឋាន បានគោរពតាមមាត្រាកំណត់ក្នុងច្បាប់បាតុកម្ម។ តែការជួបជុំរៀបចំព្រឹត្តិការណ៍ជិះកង់ផ្សព្វផ្សាយតាមផ្លូវ មិនមែនជាបាតុកម្មទេ។ ដូច្នេះត្រូវសុំច្បាប់ ប៉ុន្តែចំពោះការជួបជុំធ្វើបាតុកម្ម គឺអាជ្ញាធរមិនបានតម្រូវឲ្យសុំច្បាប់ទេ។
បន្ទាប់ពីការបោះឆ្នោត គឺចាប់តាំងពីដើមឆ្នាំ២០១៤ សិទ្ធិជួបប្រជុំដោយសន្តិវិធី និងការធ្វើបាតុកម្ម ត្រូវបានរឹតបន្តឹង។ រហូតដល់ដើមខែសីហា ទើបទីលានប្រជាធិបតេយ្យ បើកឡើងវិញ ហើយអាជ្ញាធរបានដកបម្រាមជួបប្រជុំនានា។
ប្រធានមជ្ឈមណ្ឌលសិទ្ធិមនុស្សកម្ពុជា បានស្នើដល់លោករដ្ឋមន្ត្រីក្រសួងមហាផ្ទៃ ជំរុញក្រសួងពាក់ព័ន្ធ និងអាជ្ញាធរមូលដ្ឋាននានា ឲ្យបញ្ឈប់លក្ខខណ្ឌតម្រូវឲ្យសុំការអនុញ្ញាត ដែលមានចែងនៅក្នុងច្បាប់កម្ពុជា ចំពោះការរៀបចំបាតុកម្មដោយសន្តិវិធីនានា។ ក្នុងនោះ លោកស្រីនាយិកា ក៏បានស្នើសូមលោករដ្ឋមន្ត្រី មេត្តាធានាថា រដ្ឋាភិបាលកម្ពុជាស្តារឡើងវិញនូវសិទ្ធិជួបប្រជុំដោយសន្តិវិធីរបស់ប្រជាពលរដ្ឋកម្ពុជា ជាពិសេសធានាថា គ្មានការប្រើកំលាំងដ៏ហួសហេតុទៅលើការតវ៉ាសន្តិវិធីនានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ