គណៈមេធាវីបារាំង រៀបចំជំនួបប្រជុំអន្ដរជាតិអាស៊ី៣ថ្ងៃ នៅទីក្រុងភ្នំពេញ
ចាប់ពីថ្ងៃទី១៦ ដល់ថ្ងៃទី១៨កុម្ភៈ មេធាវីជនជាតិបារាំងជាង១០០នាក់ និងសមាជិកគណៈមេធាវីកម្ពុជាជាង២០នាក់ ត្រូវជួបជុំគ្នា នៅក្នុងជំនួបប្រជុំអន្ដរជាតិអាស៊ីលើកទី២ នៅទីក្រុងភ្នំពេញ។ ជាកិច្ចប្រជុំ ដែលអនុញ្ញាតឲ្យមេធាវីបារាំង និងខ្មែរ ពិភាក្សា ស្វែងយល់ និងផ្លាស់ប្ដូរយោបល់គ្នា អំពីតម្រូវការ និងការប្រឈមនានា ជុំវិញវិស័យគតិយុត្តិនៃធុរកិច្ច នៅកម្ពុជា និងអាស៊ាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
គណៈមេធាវីបារាំង រៀបចំជំនួបប្រជុំអន្ដរជាតិអាស៊ី លើកទីពីរ នៅទីក្រុងភ្នំពេញ។ កម្មវិធីនេះ មានការចូលរួមពីមេធាវីបារាំងជាង១០០នាក់ និងមេធាវីខ្មែរប្រមាណ២០នាក់។ នៅក្នុងកិច្ចប្រជុំ ពីថ្ងៃទី១៦ ដល់ថ្ងៃទី១៨កុម្ភៈ មេធាវីទាំងជាង១០០នាក់នេះ នឹងពិភាក្សា ស្វែងយល់ និងផ្លាស់ប្ដូរយោបល់គ្នា អំពីបរិយាកាសគតិយុត្តិនៃធុរកិច្ចនៅកម្ពុជា និងអាស៊ាន ការប្រកបអាជីពមេធាវីនៅបរទេស ក៏ដូចជាតម្រូវការរបស់សហគ្រាស និងវិនិយោគិនបរទេស ក្នុងផ្នែកការផ្ដល់ប្រឹក្សាច្បាប់។
កិច្ចសហការយ៉ាងសម្បូរបែបរវាងបារាំង និងកម្ពុជា ក្នុងវិស័យគតិយុត្តិ បានធ្វើឲ្យគណៈមេធាវីបារាំង សម្រេចចិត្តប្រារព្ធធ្វើកិច្ចប្រជុំឆ្នាំនេះនៅកម្ពុជា។ នេះបើតាមលោក Pierre-Olivier Sur ប្រធានគណៈមេធាវីបារាំង។
លោក Pierre-Olivier Sur ដែលធ្លាប់ធ្វើជាសហមេធាវីការពារក្ដីក្នុងសំណុំរឿង០០១ នៃសាលាក្ដីខ្មែរក្រហមកម្ពុជា បានឲ្យដឹងផងដែរថា កម្ពុជា ជាប្រទេសដែលអនុវត្តប្រព័ន្ធច្បាប់ Civil Law និងជាប្រទេសដែលស្ថិតនៅត្រង់ចំណុចកណ្ដាលនៃទ្វីបអាស៊ី។ កត្តាទាំងនេះ អនុគ្រោះច្រើនណាស់ ដល់ការជួបជុំ របស់មេធាវីបារាំង ដែលកំពុងតែធ្វើការនៅតាមបណ្ដាប្រទេសជាច្រើនផ្សេងៗគ្នា នៅអាស៊ី។
នៅក្នុងជំនួបប្រជុំក្នុងទីក្រុងភ្នំពេញនៅឆ្នាំនេះ ប្រធានគណៈមេធាវីបារាំង លោក Pierre-Oliver Sur សម្ដែងសុទិដ្ឋិនិយមថា សមាជិករបស់ខ្លួន ដែលជាមេធាវីបារាំង ប្រាកដជាទទួលបានបទពិសោធល្អៗជាច្រើន ពាក់ព័ន្ធនឹងបរិយាកាសគតិយុត្តិនៅកម្ពុជា និងអាស៊ាន ដើម្បីជាទុនក្នុងការបង្កើតបណ្ដាញការងារនៅទីនេះ។
សូមជម្រាបជូនថា គណៈមេធាវីបារាំង ធ្លាប់រៀបចំកម្មវិធីជំនួបប្រជុំអន្ដរជាតិអាស៊ីនេះ នៅប្រទេសវៀតណាមម្ដងហើយ កាលពីឆ្នាំ២០១៣កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ