តម្លៃធ្វើដំណើរនៅក្នុងអំឡុងបុណ្យចូលឆ្នាំនៅតែកើនខ្ពស់បើទោះបីនាយករដ្ឋមន្ត្រីអំពាវនាវក៏ដោយ
ក្រុមហ៊ុនដឹកអ្នកដំណើរ និង រថយន្តឈ្នួលឯកជននៅតែបន្តដំឡើងថ្លៃឈ្នួលក្នុងការដឹកអ្នកដំណើរទៅកាន់ស្រុកកំណើតដើម្បីចូលរួមបុណ្យចូលឆ្នាំថ្មី។ក្រុមហ៊ុន និង រថយន្តឈ្នួលមួយចំនួនសុទ្ធតែបានដំឡើងថ្លៃចាប់ពីប្រាំពាន់រៀលឡើងទៅបន្ថែមពីលលើតម្លៃធម្មតា។យ៉ាងណាក៏ដោយការដំឡើងថ្លៃនេះហាក់ផ្ទុយទៅនឹងការប្រកាសរបស់ប្រមុខរាជរដ្ឋាភិបាលកម្ពុជាដែលបានអំពាវនាវកុំឲ្យមានការឡើងថ្លៃខ្ពស់ពេក។
ចុះផ្សាយនៅថ្ងៃ៖
ស្តាប់ - ០២:៤៤
ក្រុមហ៊ុនដឹកអ្នកដំណើរ និងរថយន្តឈ្នួលឯកជននៅតែបានដំឡើងថ្លៃឈ្នួលខ្ពស់ក្នុងការដឹកជញ្ជូនអ្នកដំណើរទៅស្រុកកំណើតក្នុងអំឡុងបុណ្យចូលឆ្នាំថ្មីប្រពៃណីខ្មែរនេះ។ក្រុមហ៊ុនដឹកអ្នកដំណើរ និងរថយន្តឈ្នួលឯកជនមួយចំនួនបានសារភាពថាខ្លួនបានដំឡើងថ្លៃប្រមាណចាប់ពីប្រាំពាន់រៀលឡើងទៅបន្ថែមពីលើតម្លៃឈ្នួលធម្មតា។
ការដំឡើងថ្លៃនេះហាក់ផ្ទុយទៅនឹងការអំពាវនាវរបស់ប្រមុខរាជរដ្ឋាភិបាលកម្ពុជា។សូមជំរាបជូនថា កាលពីថ្ងៃទី០៧មេសាកន្លងទៅ លោកនាយករដ្ឋមន្ត្រី ហ៊ុន សែន បានអំពាវនាវកុំឲ្យក្រុមហ៊ុនដឹកអ្នកដំណើរដំឡើងថ្លៃឈ្នួលខ្ពស់ពេកក្នុងអំឡុងបុណ្យចូលឆ្នាំខ្មែរនេះ។
ការដំឡើងថ្លៃឈ្នួលបន្ថែមរបស់បណ្តាក្រុមហ៊ុនដឹកអ្នកដំណើរ និង រថយន្តឈ្នួលបានប៉ះពាល់យ៉ាងខ្លាំងដល់ជីវភាពរស់នៅរបស់ប្រជាពលរដ្ឋខ្មែរទូទៅ។កញ្ញា វណ្ណ នីតា និស្សិតឆ្នាំទី បួននៃសាកលវិទ្យាល័យន័រតុនដែលកំពុងឈចាំរថយន្តឈ្នួលនៅម្តុំរង្វង់មូលស្តាត ចាស់បានត្អូញត្អែរថា ការដំឡើងថ្លៃរបស់រថយន្តឈ្មួលនេះបានប៉ះពាល់យ៉ាងខ្លាំងទាំងកញ្ញាជានិស្សិត និងប្រជាពលរដ្ឋទូទៅ ពីព្រោះត្រូវចំណាយច្រើន។និស្សិតស្រីមានស្រុកកំណើតក្នុងខេត្តកំពង់ចាមរូបនេះបានឲ្យដឹងដែរថា រថយន្តឈ្នួលខ្លះបានដំឡើងថ្លៃស្ទើរតែពាក់ កណ្តាល បន្ថែមពីលើតម្លៃធម្មតា។
ជុំវិញការដំឡើងថ្លៃនេះ លោក ផាន់ សុផលប្រធានប្រតិបត្តិរបស់ក្រុមហ៊ុនដឹកអ្នកដំណើរភ្នំពេញសូរិយាបានឲ្យដឹងថាសម្រាប់ឆ្នាំនេះក៏ដូចរាល់ឆ្នាំដែរ ក្រុមហ៊ុនរបស់លោកបានដំឡើងថ្លៃឈ្នួលចាប់ពីប្រាំពាន់រៀលទៅប្រាំបីពាន់រៀលលើគ្រប់ទិសដៅទាំងអស់។ ប្រធានប្រតិបត្តិរូបនេះបកស្រាយថា មូលហេតុនៃការឡើងថ្លៃនេះ គឺដោយសារត្រូវចំណាយច្រើន ហើយរថយន្តដឹកបានតែភ្ញៀវទៅតែប៉ុណ្ណោះពេលត្រឡប់មកវិញមិនមានភ្លៀវនោះទេ។
ទាក់ទងនឹងការដំឡើងថ្លៃឈ្នួលនេះដែរ លោក ប៉ា សុជាតិវង្ស អភិបាលរាជធានីភ្នំពេញ បានប្រាប់អ្នកកាសែតកាលពីថ្ងៃ សុក្រ ទី១១ មេសា ថាលោកមិនមានវិធានការណាមួយដើម្បីទប់ស្កាត់ការឡើងថ្លៃរថយន្តឈ្នួលនោះទេ ដោយសារកន្លងមកការអំពាវនាវរបស់អាជ្ញាធរមិនមានប្រសិទ្ធភាពនោះឡើយ ហើយការដំឡើងថ្លៃឈ្នួលនេះជារឿងឯកជនមិនស្ថិតក្រោមការគ្រប់គ្រងរបស់រដ្ឋនោះទេ។
គួរកត់សម្គាល់ថា នៅថ្ងៃសៅរ៍ ទី ១២ មេសានេះ ប្រជាពលរដ្ឋ សិស្ស និស្សិត កម្មករ កម្មការិនី បានសម្រុកធ្វើដំណើរទៅស្រុកកំណើតយ៉ាងច្រើនកុះករ ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីខ្មែរនៅថ្ងៃ ទី ១៤ ១៥ ១៦ មេសាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ