មេដឹកនាំជាន់ខ្ពស់គណបក្សទាំងពីរអវត្តមានពីប្រទេសព្រមគ្នាចាប់ពីថ្ងៃចន្ទតែមន្ត្រីបដិសេធការជួបចរចាក្រៅប្រទេស
លោកនាយករដ្ឋមន្ត្រី ហ៊ុន សែន នឹងធ្វើដំណើរទៅទស្សនកិច្ចនៅប្រទេសបង់ក្លាដែសរយៈពេលបីថ្ងៃគឺពីថ្ងៃទី ១៦ ដល់១៨ មិថុនា ឆ្នាំ ២០១៤។ កាលពីថ្ងៃសៅរ៍ទី១៤ មិថុនា លោក សម រង្ស៊ី ប្រធានគណបក្សសង្គ្រោះជាតិ បានចេញដំណើរទៅប្រទេសអឺរ៉ុប ហើយលោក កឹម សុខា អនុប្រធាន បានចាកចេញទៅប្រទេសណូវែលសេឡង់ កាលពីថ្ងៃព្រហស្បតិ៍។អវត្តមានមេដឹកនាំគណបក្សទាំងពីរព្រមគ្នាពីប្រទេសនាំឲ្យមានការសង្ស័យថា អាចនឹងមានការសម្របសម្រួលនយោបាយណាមួយនៅក្រៅប្រទេស។ ក៏ប៉ុន្តែអ្នកនាំពាក្យនៃគណបក្សប្រឆាំងបានបដិសេធពីដំណឹងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
យោងតាមសេចក្តីប្រកាសរបស់ក្រសួងការបរទេសកម្ពុជា កាលពីថ្ងៃចន្ទទី០៩មិថុនា
លោកនាយករដ្ឋមន្ត្រី ហ៊ុន សែន នឹងធ្វើដំណើរទៅទស្សនកិច្ចនៅប្រទេសបង់ក្លាដែសរយៈ
ពេលបីថ្ងៃគឺពីថ្ងៃទី ១៦ ដល់១៨ មិថុនា ឆ្នាំ ២០១៤។ការចាកចេញទៅកាន់បរទេសរបស់ប្រមុខរដ្ឋាភិបាលកម្ពុជានៅពេលនេះ ធ្វើឲ្យមេដឹកនាំជាន់ខ្ពស់ ដែលមានជម្លោះគ្នានៃគណបក្សទាំងពីរមិនមានវត្តមាននៅក្នុងប្រទេសឡើយបន្ទាប់ពីលោក សម រង្ស៊ី ប្រធានគណបក្សសង្គ្រោះជាតិ បានចេញដំណើរទៅប្រទេសអឺរ៉ុបនៅថ្ងៃសៅរ៍ទី១៤មិថុនា ហើយលោក កឹម សុខា អនុប្រធានគណបក្ស បានចាកចេញទៅប្រទេសណូវែលសេឡង់ កាលពីថ្ងៃព្រហស្បតិ៍។
ការចេញទៅក្រៅប្រទេសព្រមៗគ្នារបស់មេដឹកនាំបក្សទាំងពីរ ធ្វើឲ្យមានការសង្ស័យថា អាចនឹងមានការជួបទាក់ទងនយោបាយគ្នាដោយមធ្យោបាយណាមួយជាសម្ងាត់នៅខាងក្រៅ។ក៏ប៉ុន្តែអ្នក នាំពាក្យគណបក្សសង្គ្រោះជាតិលោក យ៉ែម ប៉ុញ្ញរិទ្ធ បានប្រាប់វិទ្យុបារាំងអន្តរជាតិRFI ថា លោកមិនបានដឹងពីការទាក់ទងគ្នារវាងមេដឹកនាំគណបក្សទាំងពីរនោះឡើយ។
លោក យ៉ែម ប៉ុញ្ញរិទ្ធ គ្រាន់តែដឹងថាលោក សម រង្ស៊ី ចាកចេញទៅកាន់អឺរ៉ុបគឺដើម្បីជួបជាមួយមន្ត្រីជាន់ខ្ពស់និងសមាជិកសភាអឺរ៉ុប ដើម្បីថ្លែងពីស្ថានភាពនយោបាយនៅក្នុងប្រទេសកម្ពុជា។ ហើយការចាកចេញរបស់លោក កឹម សុខា គឺដើម្បីជួបជាមួយអ្នកគាំទ្រគណបក្សសង្គ្រោះជាតិនៅប្រទេសនូវែលសេឡង់។
មន្ត្រីគណបក្សប្រជាជនកម្ពុជាមិនមានអត្ថាធិប្បាយអ្វីទេទាក់ទងទៅនឹងការចាកចេញទៅកាន់បរទេសរបស់លោក ហ៊ុន សែន។ ក៏ប៉ុន្តែបើតាមខ្លឹមសារនៃសេចក្តីជូនដំណឹងរបស់ក្រសួងការបរទេស ឲ្យដឹងថា គឺជាដំណើរទស្សនកិច្ចតបតាមការអញ្ជើញរបស់នាយករដ្ឋមន្ត្រីបង់ក្លាដេសលោកស្រី ហ្សេក ហាស៊ីណា (Sheikh Hasina)។
នាយករដ្ឋមន្ត្រីនៃប្រទេសទាំងពីរនឹងជួបពិភាក្សាការងារជាផ្លូវការនិងធ្វើជាអធិបតីនៃពិធីចុះហត្ថលេខាលើឯកសារចំនួន៤ គឺទី១ កិច្ចព្រមព្រៀងរវាងរដ្ឋាភិបាលកម្ពុជានិងរដ្ឋាភិបាលបង់ក្លាដែស ស្តីពីការបង្កើតគណៈកម្មការចម្រុះសម្រាប់ជម្រុញកិច្ចសហប្រតិបត្តិការទ្វេរភាគី។ ទី២ អនុស្សរណៈយោគយល់ ស្តីពីកិច្ចសហប្រតិបត្តិការវិទ្យាសាស្ត្រ និងបច្ចេកទេសក្នុងវិស័យឧស្សាហកម្ម។ កិច្ចព្រមព្រៀងស្តីពីវប្បធម៌ និងកិច្ចព្រមព្រៀងស្តីពីការជម្រុញនិងការការពារវិនិយោគរវាងប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ