កម្ពុជានឹងចុះMOUព្រមទទួលជនភៀសខ្លួនអូស្ត្រាលីនៅចុងសប្តាហ៍នេះ
ក្រសួងការបរទេសកម្ពុជា នៅថ្ងៃពុធទី២៤ កញ្ញានេះ បានជូនដំណឹងថាថ្នាក់ដឹកនាំរដ្ឋាភិបាលប្រទេសអូស្ត្រាលី និងកម្ពុជា នឹងចុះហត្ថលេខាលើអនុស្សរណៈនៃការយោគយល់គ្នាស្តីពីការតាំងទីលំនៅនៃជនភៀសខ្លួនពីប្រទេសអូស្ត្រាលីមកកាន់កម្ពុជានៅចុងសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:១២
នៅបំផុតរដ្ឋាភិបាលកម្ពុជានឹងចុះហត្ថលេខាព្រមទទួលយកជនភៀសខ្លួនពីអូស្ត្រាលីជាផ្លូវការណ៍នៅរសៀលថ្ងៃសុក្រទី២៦កញ្ញាចុងសប្តាហ៍នេះ។ ជាការកិច្ចព្រមព្រៀងដែលទាំងឧត្តមស្នងការជាន់ខ្ពស់ទទួលបន្ទុកសិទ្ធមនុស្សរបស់អង្គការសហប្រជាជាតិ និងក្រុមអង្គការសង្គមស៊ីវិល បានរិះគន់។ រដ្ឋមន្ត្រីក្រសួងមហាផ្ទៃកម្ពុជា លោក ស ខេង និងរដ្ឋមន្ត្រីក្រសួងអន្តោប្រវេសន៍អូស្ត្រាលី លោក ស្កុត ម៉ូរីសុន (Scott MORRISON) គឺជាអ្នកចុះហត្ថលេខាលើអនុស្សារណៈនៃការយោគយល់គ្នាស្តីពីការបញ្ជូនជនភៀសខ្លួនលើទឹកដីអូស្ត្រាលីមកកាន់កម្ពុជានេះ។
សូមរំលឹកបន្តិចថា សំណើរបញ្ជូនជនភៀសខ្លួនពីអូស្ត្រាលីនេះ គឺបានធ្វើឡើងក្នុងដំណើរទស្សនៈកិច្ចមកកាន់កម្ពុជារបស់រដ្ឋមន្ត្រីការបរទេសអូស្ត្រាលី លោកស្រី ជូលៀ បីស៊ប (Julie Bishop) កាលពីចុងខែកុម្ភៈ ដើមឆ្នាំ២០១៤នេះ។ នៅមិនទាន់មានការបញ្ជាក់ណាមួយថា តើជនភៀសខ្លួនពីអូស្ត្រាលីទាំងនោះមានចំនួនប៉ុន្មាននាក់ នឹងត្រូវបញ្ជូនមកកាន់កម្ពុជានៅពេលណា ហើយនឹងត្រូវទៅរស់នៅតំបន់ណាក្នុងប្រទេសកម្ពុជានៅឡើយទេ។ ប៉ុន្តែសារព័ត៌មានអូស្ត្រាលី ធ្លាប់បានចេញផ្សាយថា ជនភៀសខ្លួនទាំងគឺប្រមាណជា១ពាន់នាក់ដែលកំពុងរស់នៅក្នុងជំរុំជនភៀសខ្លួនរបស់អូស្ត្រាលី។
ដោយឡែកគណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធមនុស្សកម្ពុជា អះអាងក្នុងរបាយការណ៍របស់ខ្លួនកាលពីខែសីហាថា ជនភៀសខ្លួនទាំងនោះនឹងត្រូវបញ្ជូនទៅរស់លើកោះមួយក្នុងខេត្តព្រះសីហនុ។
អង្គការសហប្រជាជាតិទទួលបានបន្ទុកសិទ្ធមនុស្ស បានរិះគន់ប្រទេសអូស្ត្រាលីថា ការបញ្ជូនជនភៀសខ្លួននេះគឺរឿងអាម៉ាសរបស់រដ្ឋាភិបាលអូស្ត្រាលីព្រោះថា កម្ពុជាជាប្រទេសនៅក្រីក្រនៅឡើយ និងជាការរំលោភសិទ្ធដល់អ្នកសុំសិទ្ធជ្រកកោណទាំងនោះ។ ដោយឡែក លោក សួន ប៉ុនសក្តិអគ្គលេខា គណៈកម្មាធិការការពារសិទ្ធមនុស្សកម្ពុជា បានរិះគន់ថារដ្ឋាភិបាលកម្ពុជាបានចូលរួមរំលោភសិទ្ធអ្នកសុំសិទ្ធជ្រកកោណជាមួយនឹងអូស្ត្រាលីដែរ។ ហើយថាការទទួលជនភៀសខ្លួននេះ ជាបន្ទុកដ៏ធ្ងន់ធ្ងរសម្រាប់ប្រទេសកម្ពុជា។
ក្រសួងការបរទេសកម្ពុជា តាមរយៈលោកកុង គួងអ្នកនាំពាក្យ បានអះអាងថាអ្វីដែលរដ្ឋាភិបាលកម្ពុជាបានធ្វើគឺបានពិចារណាអស់ហើយថា មិនបានប៉ះពាល់ដល់សង្គមជាតិកម្ពុជានោះទេ។ ប្រធានគណៈកម្មការកិច្ចការបរទេសរបស់រដ្ឋសភា លោក ឈាង វុន បានបញ្ជាក់ថា កម្ពុជានឹងទទួលបានផលចំណេញផ្នែកសេដ្ឋកិច្ច និងការអភិវឌ្ឍ ចេញពីកិច្ចព្រមព្រៀងទទួលជនភៀសខ្លួនពីប្រទេសអូស្ត្រាលីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ