មេដឹកនាំសហជីពនឹងទៅបង់ប្រាក់តម្កល់នៅថ្ងៃចន្ទបើទោះជាមិនពេញចិត្តនឹងការបង្គាប់របស់តុលាការក៏ដោយ
លោក អាត់ ធន់ ប្រធានសហជីព ស៊ីខៅឌូ ប្រកាសថាលោក នឹងទៅបង់ប្រាក់តម្កល់ចំនួន២៥.០០០ ដុល្លារ នៅសាលាដំបូងរាជធានីភ្នំពេញនៅថ្ងៃចន្ទស្អែកដើម្បីបាននៅក្រៅឃុំ។ មេដឹកនាំសហជីពរូបនេះ ឲ្យដឹងថាថវិកាដែលប្រមូលបានពីសប្បរសជន និងកម្មករបានជិតគ្រប់ចំនួនហើយគិតមកត្រឹមថ្ងៃសៅរ៍ម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
ថវិកាដែលប្រមូលពីកម្មករតាមបណ្តាររោងចក្រនានា និងសប្បរសជនជាតិនិងអន្តរជាតិបានជិតគ្រប់ចំនួនប្រាក់តម្កល់ដែលត្រូវបង់ឲ្យតុលាការហើយ។ នេះបើតាមការឲ្យដឹងរបស់មេដឹកនាំសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាហៅកាត់ថាស៊ីខៅឌូ។ហើយថវិកាដែលប្រមូលបានទាំងអស់នឹងត្រូវយកទៅបង់ឲ្យតុលាការទុកជាប្រាក់តម្កល់នៅរសៀលថ្ងៃទី១២ខែឧសភា ស្អែកនេះ មួយសប្តាហ៍មុនកាលកំណត់ចុងក្រោយរបស់តុលាការនៅថ្ងៃទី១៩ឧសភា។
លោក អាត់ ធន់ ប្រធានសហជីព ស៊ីខៅឌូ ដែលរងនូវពាក្យបណ្តឹងពីថៅកែរោងចក្របោកគក់ សម្លៀកបពាក់ SL បានថ្លែងថា លោកប្រមូលថវិកាបាន ៩០ ភាគរយហើយ ក្នុងចំណោមថវិកាសរុប ដែលត្រូវតម្កល់នៅតុលាការចំនួន ២៥.០០០ ដុល្លារ។ ក្នុងនោះដែរថវិកាដែលបានពីការរៃអង្គាសពីកម្មករកាត់ដេរមានប្រមាណជិតមួយម៉ឺនដុល្លារ ។ក្រៅពីនោះក៏មានថវិការបស់សហជីពបរទេសនានាពីបរទេសដែរ។
ការដែលចាំបាច់ត្រូវតែដាក់លុយតម្កល់នេះ ត្រូវលោក អាត់ ធន់ ឲ្យដឹងថាគឺដើម្បីចៀសវាងពី
ការឃុំខ្លួនដោយតុលាការ ទាក់ទងទៅនឹងបណ្តឹងមួយចំនួនពីថៅកែរោងចក្រSL ហើយដែលត្រូវចោទប្រកាន់ដោយតុលាការពីបទញុះញង់ឲ្យប្រព្រឹត្តិអំពើហិង្សានៅក្នុងការតវ៉ារបស់កម្មកររោងចក្រSL កន្លងមក។ ក៏ប៉ុន្តែមេដឹកនាំសហជីពដែលរងនូវបណ្តឹងញាំញីរូបនេះបដិសេធ។លោក អាត់ ធន់ ថាអង្គហេតុនៃការចោទប្រកាន់មិនត្រឹមត្រូវ ហើយថែមទាំងបង្គាប់ឲ្យមានការបង់ប្រាក់តម្កល់ហួសពីសមត្ថភាពទៀត។
ទោះយ៉ាងណា លោក អាត់ ធន់ ចាំបាច់ត្រូវតែមានការតម្កល់ប្រាក់ដើម្បីបាននៅក្រៅឃុំ ចៀសវាងការចោទប្រកាន់បន្ថែមទៀតថាមិនគោរពការសម្រេចរបស់តុលាការ។ ក្រៅពីនេះតុលាការក៏បានបង្គាប់ឲ្យលោក អាត់ ធន់ ស្ថិតនៅក្រោមការត្រួតពិនិត្យរបស់តុលាការ ដោយឲ្យដកហូតសិទ្ធិសហជីព សិទ្ធិជួបជុំជាមួយកម្មករដូចសព្វមួយដងជាដើម។
សូមបញ្ជាក់ថា សហជីពស៊ីខៅឌូ និងរោងចក្រ SL បានចុះកិច្ចព្រមព្រៀងកាលពីថ្ងៃ៣ ខែធ្នូ ឆ្នាំ២០១៣ ថាមិនមានការគុំគួរ ឬរើសអើងសហជីព និងមិនប្តឹងតំណាងសហជីពទៅតុលាការទេ។ក៏ប៉ុន្តែក្រោយមកថៅកែរោងចក្រ SL បានសើរើរឿងនេះមកប្តឹងឡើងវិញ ដែលសហជីពនិយាយថា ជាការរំលោភលើកិច្ចព្រមព្រៀង។
ទាក់ទងទៅនឹងបណ្តឹងប្រឆាំងមេសហជីពនេះដែរ សហជីពអន្តរជាតិបានសម្តែងនូវប្រតិកម្មជាបន្តបន្ទាប់។ កាលពីថ្ងៃទី ២៥ខែមេសាកន្លងទៅនេះ សហជីព Industri All ជាសហជីពអន្តរជាតិ តំណាងកម្មករជាង៥០លាននាក់ មានសមាជិក១៤០ប្រទេសនៅពេញពិភពលោក បានផ្ញើលិខិតទៅ លោកនាយករដ្ឋមន្ត្រី ហ៊ុន សែន ដោយសម្តែងពីការបិទសិទ្ធិសេរីភាពសហជីព រំលោភសិទ្ធិកម្មករជាដើម។ សហជីពអន្តរជាតិបានលើកឡើងជាក់ស្តែងករណីរោងចក្រ SL បានប្តឹង លោក អាត់ ធន់ ប្រធានសម្ព័ន្ធសហជីពស៊ីខៅឌូ ទៅតុលាការរាជធានីភ្នំពេញ និងបិទសិទ្ធិសេរីភាព មិនមានការជួបជុំ ឬដឹកនាំកម្មករបានទេ ជាពិសេសបង្គាប់បង់់ប្រាក់២៥.០០០ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ