រដ្ឋសភាព្រមានចាត់វិធានការតាមច្បាប់បោះឆ្នោត លើគណបក្សសង្គ្រោះជាតិ
ព្រឹត្តិការណ៍បាតុកម្មរបស់គណបក្សសង្គ្រោះជាតិ កើតមានអំពើហិង្សាលើកងកម្លាំងសន្តិសុខ កាលពីព្រឹកថ្ងៃទី១៥កក្កដា ត្រូវបានរដ្ឋសភា ថ្លែងការណ៍ថ្កោលទោស ដោយចាត់ទុកជាអំពើហិង្សាដ៏ឃោឃៅព្រៃផ្សៃ អមនុស្សធម៌ និងរំលោភសិទ្ធិមនុស្សយ៉ាងធ្ងន់ធ្ងរ។ អំពើហិង្សា ក្នុងបាតុកម្មនោះ ត្រូវបានរដ្ឋសភា ដែលសព្វថ្ងៃមានតែសមាជិកគណបក្សប្រជាជនកម្ពុជា លើកឡើងថា បង្កឡើងដោយជនអនាធិបតេយ្យ មានការចាត់តាំង ដឹកនាំដោយឈ្មោះ មូរសុខហួរ ហូរវ៉ាន់ ម៉ែនសុថាវរិន្ទ្រ កែវ ភារម្យ រៀលខេមរិន្ទ្រ និងបក្ខពួក។ លោក ឈាង វុន សមាជិកគណៈកម្មាធិការអចិន្ត្រៃយ៍រដ្ឋសភា ក៏បានព្រមានក្នុងសន្និសីទកាសែត នៅព្រឹកថ្ងៃសុក្រនេះថា រដ្ឋសភា នឹងអនុវត្តច្បាប់បោះឆ្នោត ខណៈដែលគណបក្សសង្គ្រោះជាតិ បោះបង់ចោលអាសនៈរដ្ឋសភា រយៈពេលជិត ១ ឆ្នាំមកហើយ គិតចាប់ពីការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
ប្រតិកម្មរបស់រដ្ឋសភា ទើបតែធ្លាក់មក នៅថ្ងៃ១៧កក្កដានេះ តាមរយៈសេចក្តីថ្លែងការណ៍ និងសម្តីផ្ទាល់មាត់របស់សមាជិកគណៈកម្មការអចិន្ត្រៃយ៍រដ្ឋសភា និងជាប្រធានគណៈកម្មការកិច្ចការបរទេស និងព័ត៌មាន របស់រដ្ឋសភា លោកតំណាងរាស្ត្រ ឈាង វុន។
ក្នុងសន្និសីទកាសែត នៅរដ្ឋសភា នាព្រឹកនេះ លោក ឈាង វុន ដែលអះអាងថា នៅថ្ងៃ១៥កក្កដា លោកស្ថិតនៅក្នុងសិក្ខាសាលាមួយ នៅខេត្តសៀមរាប បានរៀបរាប់ អមដោយរូបភាពវិដេអូ នៃការប៉ះទង្គិចរវាងបាតុករ និងក្រុមសន្តិសុខ នៅជិតទីលានប្រជាធិបតេយ្យ កាលពីថ្ងៃ១៥កក្កដា។ ក្រុមសន្តិសុខខណ្ឌដូនពេញ ដែលធ្លាប់តែវាយបង្ក្រាបដោយដំបងយ៉ាងឃោរឃៅ គ្មានរើសមុខលើអ្នកតវ៉ា និងអ្នកកាសែត នាពេលកន្លងមក រាប់ភ្លេចនោះ។
ប៉ុន្តែអំពើហិង្សា រវាងបាតុករ និងកងសន្តិសុខ កាលពីថ្ងៃ១៥កក្កដា ត្រូវបានរដ្ឋសភា និងលោក ឈាង វុន អះអាងថា ជាអំពើហិង្សា បង្កឡើងដោយជនអនាធិបតេយ្យ មានការចាត់តាំង ដឹកនាំដោយបេក្ខជនជាប់ឆ្នោតតំណាងរាស្ត្រច្រើនរូម រួមទាំងលោកស្រី មួរ សុខហួរ និងបក្ខពួក។ អំពើហិង្សានោះ បានធ្វើឲ្យមានចលាចល ប៉ះពាល់ដល់សន្តិសុខ សណ្តាប់ធ្នាប់សាធារណៈ ប្រជាពលរដ្ឋ ដែលកំពុងរស់នៅយ៉ាងសុខសាន្ត មានការភ័យខ្លាច ហើយទ្រព្យសម្បត្តិសាធារណៈ និងឯកជន ត្រូវបានបំផ្លិចបំផ្លាញ។
ក្រៅពីថ្កោលទោស និងចាត់ទុកបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ ថាជាជនអនាធិបតេយ្យពេញទី ហើយស័ក្តិសមនឹងត្រូវចាប់ខ្លួន ដោយវ៉ៃខ្នោះដៃស្លាបសេកនោះ លោក ឈាង វុន ក៏បានព្រមានថា រដ្ឋសភា នឹងអនុវត្តនូវច្បាប់បោះឆ្នោត ចំពោះគណបក្សសង្គ្រោះជាតិ ដែលបោះបង់អាសនៈ និងការមិនគោរពតាមសេចក្តីសម្រេចរបស់ក្រុមប្រឹក្សាធម្មនុញ្ញ ជាដើម។
តាមលោកឈាងវុន បន្ទាប់ពីការបោះឆ្នោតជិត ១ឆ្នាំ គិតរហូតដល់ពេលនេះ គឺដល់ពេលដែលរដ្ឋាភិបាល និងរដ្ឋសភា ត្រូវអនុវត្តវិធានការច្បាប់ ដើម្បីកុំឲ្យប្រទេសកម្ពុជា ធ្លាក់ចូលសភាពការណ៍ ដូចឆ្នាំ១៩៧។
អ្នកនាំពាក្យគណបក្សសង្គ្រោះជាតិ លោក យឹមសុវណ្ណ អះអាងថា មិនខ្វល់នឹងប្រតិកម្មរបស់រដ្ឋសភា និងអ្នកតំណាងរាស្ត្រ នៅពេលនេះទេ ព្រោះប្រតិកម្មនោះ ជាជំហររបស់គណបក្សប្រជាជនកម្ពុជា។ ផ្ទុយទៅវិញ លោក យឹម សុវណ្ណ កត់សម្គាល់ថា ហេតុការណ៍បង្ក្រាបបាតុកម្ម នាំឲ្យរបួស និងស្លាប់ ចាប់តាំងពីការបោះឆ្នោត បែរជារដ្ឋសភានៅស្ងៀម។
គណបក្សប្រឆាំង ក៏មិនខ្វល់នឹងការព្រមានដកហូតអាសនៈរដ្ឋសភា របស់គណបក្សសង្គ្រោះជាតិនោះទេ ព្រោះលោក យឹមសុវណ្ណ លើកឡើងថា ពេលនេះ គណបក្សប្រជាជនកម្ពុជា បានធ្វើតាមអំពើចិត្ត ដើម្បីសម្លាប់ប្រជាធិបតេយ្យ នៅកម្ពុជា។
យ៉ាងណាក៏ដោយ ទាំងលោក ឈាង វុន និងទាំងលោក យឹម សុវណ្ណ បានអះអាងថា គណបក្សប្រជាជនកម្ពុជា និងគណបក្សសង្គ្រោះជាតិ នៅតែបើកចំហរ និងរង់ចាំជានិច្ច ដើម្បីចូលរួមតុចរចាឡើងវិញ។ ប៉ុន្តែគ្រាន់តែថា មកដល់ថ្ងៃនេះ គណបក្សទាំងពីរ មិនបានទាក់ទងគ្នាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ