អាមេរិកចោទរុស្ស៊ី ថាបានបាញ់កាំភ្លើងធំ តម្រង់កងទ័ពអ៊ុយក្រែន
សហរដ្ឋអាមេរិក នៅថ្ងៃព្រហស្បតិ៍ បានឲ្យដឹងថា ខ្លួនមានភស្តុតាងច្បាស់លាស់ ដែលអាចបញ្ជាក់ថា រុស្ស៊ីបានបាញ់កាំភ្លើងធំពីក្នុងទឹកដីរុស្ស៊ី ទៅកាន់កងទ័ពអ៊ុយក្រែន។ ទង្វើនេះត្រូវបានមន្ដ្រីអាមេរិកហៅថា ជាការឡើងកម្ដៅនៅក្នុងជម្លោះរវាងអ៊ុយក្រែន និងរុស្ស៊ី។ យ៉ាងណាក៏ដោយ មន្ដ្រីនាំពាក្យសហរដ្ឋអាមេរិក មិនបានបង្ហាញពីភស្ដុតាងដែលខ្លួនអះអាងនោះទេ។
ចុះផ្សាយនៅថ្ងៃ៖
ស្តាប់ - ០១:២៨
អ្នកនាំពាក្យក្រសួងការបរទេសអាមេរិក លោកស្រី Marie Harf បានចោទប្រកាន់រុស្ស៊ីថា បានបាញ់កាំភ្លើងធំពីក្នុងទឹកដីរុស្ស៊ី ដើម្បីវាយប្រហារកងទ័ពអ៊ុយក្រែន។ ហើយថា ក្រុងមូស្គូក៏មានគម្រោងបញ្ជូនសព្វាវុធធុនធ្ងន់ និងខ្លាំង ដូចជាកាំភ្លើងបាញ់រ៉ូកែតជាដើម ទៅឲ្យក្រុមឧទ្ទាមនៅអ៊ុយក្រែន ដែលគាំទ្ររុស្ស៊ីផងដែរ។
លោកស្រីគូសបញ្ជាក់ថា ការចោទប្រកាន់របស់អាមេរិក ធ្វើឡើងដោយមានភស្តុតាងគ្រប់គ្រាន់។ ជាភស្ដុតាងដែលផ្អែកលើព័ត៌មានស៊ើបការណ៍សម្ងាត់ បង្ហាញពីការបញ្ជូនអាវុធឆ្លងកាត់ព្រំដែនរុស្ស៊ី ចូលទៅទឹកដីអ៊ុយក្រែន បន្ទាប់ពីការធ្លាក់យន្តហោះម៉ាឡេស៊ី ជើងហោះហើរ MH17 កាលពីសប្ដាហ៍មុនមក។ ទោះជាយ៉ាងនេះក្ដី អ្នកនាំពាក្យរូបនេះ មិនបានបង្ហាញពីភស្តុតាង ឬព័ត៌មានលម្អិតបន្ថែមនោះទេ។
មន្ត្រី របស់អង្គការអូតង់ និងអាមេរិកបានសំដែងការព្រួយបារម្ភដែលឃើញរុស្ស៊ីនៅតែបន្តផ្តល់សព្វាវុធទៅឲ្យក្រុមឧទ្ទាម នៅក្រោយ យន្តហោះម៉ាឡេស៊ី ផ្ទុះធ្លាក់ នៅតំបន់ភាគខាងកើត អ៊ុយក្រែន។
ប្រទេសលោកខាងលិច ជាពិសេសអាមេរិកបានចោទក្រុមឧទ្ទាមថា ជាអ្នកបាញ់មីស៊ីលទម្លាក់យន្តហោះម៉ាឡេស៊ីដឹកអ្នកដំណើរ កាលពីថ្ងៃព្រហស្បតិ៍សប្តាហ៍មុន។ ប៉ុន្តែ រុស្ស៊ីបានបដិសេធតាំងពីដំបូងទីថា ខ្លួនមិនជាប់ពាក់ព័ន្ធនឹងរឿងផ្ទុះធ្លាក់យន្តហោះម៉ាឡេស៊ីទេ។ ផ្ទុយទៅវិញ ក្នុងរឿងផ្ទុះធ្លាក់ឆេះយន្តហោះដែលសម្លាប់អ្នកដំណើរទាំងអស់ ២៩៨នាក់ រុស្ស៊ីនៅតែចោទប្រកាន់ថា គឺយន្តហោះចម្បាំងរបស់រដ្ឋាភិបាលអ៊ុយក្រែនដែលជាអ្នកបាញ់យន្តហោះម៉ាឡេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ