លោកអាត់ ធន់ ត្រូវតុលាការដាក់ឲ្យស្ថិតក្រោមការត្រួតពិនិត្យដូចមេសហជីពពីររូបទៀត
មិនខុសពីមេសហជីពពីររូបផ្សេងទៀតដែរ បន្ទាប់ធ្វើការសាកសួរពេញមួយព្រឹកនៅថ្ងៃព្រហស្បតិ៍នេះ ចៅក្រមតុលាការសាលាដំបូងរាជធានីភ្នំពេញ បានសម្រេចដាក់ឲ្យលោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាហៅកាត់ ស៊ីខៅឌូ ស្ថិតក្រោមការត្រួតពិនិត្យតាមផ្លូវតុលាការដោយភ្ជាប់នូវលក្ខខណ្ឌ។
ចុះផ្សាយនៅថ្ងៃ៖
ស្តាប់ - ០១:៤៥
លោក អាត់ ធន់ គឺជាមេសហជីពកម្មករទីបីហើយដែលត្រូវបានតុលាការសាលាដំបូងរាជធានីភ្នំពេញបានកម្រិតសិទ្ធសេរីភាព ព្រោះតែពាក់ព័ន្ធរឿងរ៉ាវហិង្សានៅលើផ្លូវវេងស្រេង កាលពីដើមឆ្នាំ២០១៤នេះ។
តុលាការបានចោទប្រកាន់លោក អាត់ ធន់ បួនករណី រួមមាន ហិង្សាដោយចេតនាមានស្ថានទម្ងន់ទោស ធ្វើឲ្យខូចខាតដោយចេតនាមានស្ថានទម្ងន់ទោស កម្រាមកំហែងថានឹងធ្វើឲ្យខូចខាតដែលភ្ជាប់នូវបញ្ហាអ្វីមួយ និង ប្រើមធ្យោបាយដើម្បីជាឧបសគ្គដល់ចរាចរណ៍សាធារណៈ។ ប្រឈមនឹងបទចោទនេះ តុលាការបានកំណត់មិនឲ្យ លោកអាត់ ធន់ ប្តូរលំនៅស្ថាន ត្រូវចូលមកកាន់តុលាការតាមការកោះហៅ ត្រូវចូលទៅបង្ហាញខ្លួននៅសាលាសង្កាត់បឹងទំពន់មួយខែម្តង មិនឲ្យទៅកាន់ចំណុចសួនឧស្សាហកម្មកាណាឌីយ៉ា និង មិនឲ្យជួបជាមួយកម្មករនៅសួនឧស្សាហកម្មកាណាឌីយ៉ានៅផ្លូវវេងស្រេងជាដើម។
លោក អាត់ ធន់ បានហៅការសម្រេចរបស់តុលាការនេះថា មានចេតនាបិទសិទ្ធសេរីភាពមិនឲ្យលោក ដែលជាមេសហជីពមួយរូបធ្វើសកម្មភាពនានាដើម្បីជួយដល់កម្មករ រួមទាំងការចរចាដំឡើងប្រាក់ឈ្នួលដល់កម្មករផងដែរ។ យ៉ាងណាក៏ដោយ ប្រធានសហជីពស៊ីខៅឌូ រូបនេះ បានប្រកាសជំហរថា នឹងមិនគោរពតាមការសម្រេចរបស់តុលាការទាំងស្រុងនោះទេ គឺ នៅតែធ្វើសកម្មភាពជួយដល់កម្មករដដែលតាមដែលអាចធ្វើទៅបាន។
សូមបញ្ជាក់ថា កន្លងមកសាលាដំបូងរាជធានីភ្នំពេញបានដាក់ឲ្យមេសហជីពពីរនាក់រួចមកហើយឲ្យស្ថិតក្រោមការត្រួតពិនិត្យតាមផ្លូវតុលាការដោយភ្ជាប់ជាមួយលក្ខខណ្ឌ។ នោះគឺ លោក ប៉ាវ ស៊ីណា ប្រធានសហព័ន្ធសហជីពចលនាកម្មករ និង លោក ជា មុន្នី ប្រធានសហជីពសេរីកម្មករកម្ពុជាពាក់ព័ន្ធនឹងបទចោទស្រដៀងគ្នានេះដែរ ។ ដោយឡែក មេសហជីពកម្មករផ្សេងទៀត ដែលរូមមាន លោកស្រីម៉ម ញឹម ប្រធានសហព័ន្ធសហជីពជាតិនៃឧស្សាហកម្មវាយនភ័ណ្ឌកាត់ដេរកម្ពុជា លោកស្រីយ៉ាង សុភ័ណ្ឌ ប្រធានសម្ព័ន្ធសហជីពកម្ពុជា និង លោក រ៉ុង ឈុន ប្រធានសហភាពសហជីពកម្ពុជា ក៏ត្រូវបានតុលាការកោះហៅឲ្យចូលបំភ្លឺជាបន្តបន្ទាប់នៅពេលខាងមុខផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ