តំណាងរាស្ត្របក្សប្រឆាំង៥៥នាក់បានស្បថចូលកាន់តំណែងជាផ្លូវការ
តំណាងរាស្ត្រ គណបក្សសង្គ្រោះជាតិទាំង ៥៥នាក់ដឹកនាំដោយលោក សម រង្ស៊ី និងលោក កឹម សុខា បានធ្វើសច្ចាប្រណិធានរួចរាល់ហើយ នៅរសៀលថ្ងៃអង្គារនេះ ដើម្បីក្លាយជា អ្នកតំណាងរាស្ត្រពេញសិទ្ធិ នៅក្នុងរដ្ឋសភា។ ពិធីសច្ចាប្រណិធាន ធ្វើឡើងនៅក្នុងព្រះបរមរាជវាំង នៅចំពោះ ព្រះភ័ក្ត្រព្រះមហាក្សត្រ និងដោយមានវត្តមានលោក ហេង សំរិន ប្រធានរដ្ឋសភាផង។ តំណាងរាស្ត្របក្សប្រឆាំងទាំង ៥៥នាក់ គ្រោងចូលទៅធ្វើការក្នុងរដ្ឋសភានៅ ថ្ងៃទី៨សីហាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ក្នុងសម្លៀកបំពាក់ពិធីការ អាវសដៃវែង និងសំពត់ពណ៌ស្វាយចងក្បិន តំណាងរាស្ត្រជាប់ឆ្នោតគណបក្សសង្គ្រោះជាតិទាំង ៥៥ នាក់ដឹកនាំដោយលោក សម រង្ស៊ី និងលោក កឹម សុខា បានមកជួបជុំគ្នានៅមន្ទីររដ្ឋសភាមុននឹងចេញដំណើររួមគ្នាទៅកាន់ព្រះបរមរាជវាំង។
ពិធីសច្ចាប្រណិធានដើម្បីចូលកាន់តំណែងជាតំណាងរាស្ត្រពេញសិទ្ធិបានធ្វើឡើងកាលពីវេលាម៉ោង៤រសៀលនៅចំពោះព្រះភ័ក្ត្រព្រះមហាក្សត្រសម្តេចព្រះបរមនាថ នរោត្តម សីហមុនី។ លោក ហេង សំរិន ប្រធានរដ្ឋសភាក៏មានវត្តមាននៅក្នុងពិធីនោះដែរ។
ពិធីស្បថចូលកាន់តំណែងរបស់តំណាងរាស្ត្រជាប់ឆ្នោតគណបក្សសង្គ្រោះជាតិបានធ្វើឡើងរយៈពេលពីរសប្តាហ៍បន្ទាប់ពីគណបក្សប្រឆាំងនិងបក្សកាន់អំណាចបានរកឃើញកិច្ចព្រមព្រៀងបញ្ចប់វិបត្តិនយោបាយក្រោយការបោះឆ្នោតដែលបានអូសបន្លាយរយៈពេលពេញមួយឆ្នាំ។
កិច្ចព្រមព្រៀងដំណោះស្រាយនយោបាយកាលពីថ្ងៃទី២២កក្កដាបានធ្វើឲ្យស្ថានការណ៍ដ៏តានតឹងវិលទៅរកភាពធូរស្រាលឡើងវិញ។ តំណាងរាស្ត្រគណបក្សសង្គ្រោះជាតិ៧នាក់និងសកម្មជនគណបក្សម្នាក់ទៀតដែលត្រូវបានតុលាការចោទប្រកាន់ដាក់ពន្ធនាគារពីបទញុះញង់ឲ្យកើតអំពើហិង្សាត្រូវបានដោះលែងឲ្យមានសេរីភាពវិញ។
ព្រឹត្តិការណ៍នេះបានទទួលការសាទរពីសហគមន៍ជាតិនិងអន្តរជាតិយ៉ាងកងរំពង។ ប៉ុន្តែ វាក៏ជាប្រធានបទនៃការរិះគន់និងការខឹងសម្បារពីសំណាក់អ្នកគាំទ្រគណបក្សសង្គ្រោះជាតិជាច្រើនដែរ។ អ្នករិះគន់និងអ្នកខឹងសម្បារបានហៅកិច្ចព្រមព្រៀងដំណោះស្រាយនយោបាយនោះថាបានធ្វើឡើងក្រោមគំនាបរបស់គណបក្សកាន់អំណាច។
យ៉ាងណាក៏ដោយ កំណែទម្រង់ គ.ជ.ប និងរដ្ឋសភាត្រូវបានគណបក្សទាំងពីរជជែកគ្នាយ៉ាងសកម្មនិងបានទទួលលទ្ធផលវិជ្ជមានគួរឲ្យកត់សម្គាល់។ ប៉ុន្តែ នៅមានកិច្ចការជាច្រើនទៀតដែលគណបក្សទាំងពីរបន្តពិភាក្សាបន្ទាប់ពីតំណាងរាស្ត្រគណបក្សសង្គ្រោះជាតិចូលអង្គុយក្នុងរដ្ឋសភា។ ថ្លែងប្រាប់ក្រុមអ្នកកាសែតនៅពេលចេញពីព្រះបរមរាជវាំង លោក កឹម សុខា អនុប្រធានគណបក្សសង្គ្រោះជាតិបានបញ្ជាក់ដោយខ្លីថា ក្រុមរបស់លោកនឹងបន្តការតស៊ូក្នុងរដ្ឋសភាស្របតាមលទ្ធិប្រជាធិបតេយ្យដើម្បីការពារផលប្រយោជន៍ប្រជាជន។
តំណាងរាស្ត្រទាំង ៥៥ នាក់របស់គណបក្សសង្គ្រោះជាតិនឹងចូលទៅធ្វើការក្នុងរដ្ឋសភានៅថ្ងៃទៅទី៨សីហាខាងមុខនេះ។ នេះបើតាមលោក សុន ឆ័យ ដែលបានប្រាប់ឲ្យដឹងនៅមុនពិធីសច្ចាប្រណិធាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ