ក្រសួងមហាផ្ទៃបង្ហាញពីការខូចខាតបណ្តាលមកពីបាតុកម្មជិត ១០០លានដុល្លារ
បន្ទាប់ពីមាន កូដកម្ម បាតុកម្ម ក្រោយការបោះឆ្នោតកាលពីថ្ងៃទី ២៨ខែកក្កដាមក ក្រសួងមហាផ្ទៃនៅថ្ងៃនេះ បានចេញរបាយការណ៍ ស្តីពីការខូចខាត សរុបទាំងទ្រព្យសម្បត្តិសាធារណៈ របស់រដ្ឋ និង ឯកជន ដែលមានប្រមាណជិតមួយរយលានដុល្លារ។ ក៏ប៉ុន្តែថ្នាក់ដឹកនាំគណបក្សប្រឆាំង មិនសូវចាប់អារម្មណ៍ចំពោះការលើកឡើង នៅក្នុងរបាយការណ៍របស់ក្រសួងមហាផ្ទៃនាពេលនេះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ក្រសូងមហាផ្ទៃនៅថ្ងៃទី២៧មីនានេះ បានបង្ហាញនូវរបាយការណ៍មួយស្តីពីការខូចខាតដែល
បណ្តាលមកពីបាតុកម្មជាច្រើនចាប់តាំងពីមានការបោះឆ្នោតនីតិកាលទី៥ កាលពីថ្ងៃទី២៨ខែកក្កដាកន្លងមក។នៅក្នុងរបាយការណ៍ចំនួន៧ទំព័រ ដែលដាក់ថា សេចក្តីសំរង់របកគំហើញរបស់គណៈកម្មការវាយតម្លៃការខូចខាតដែលបង្កឡើងដោយបាតុកម្មខុសច្បាប់ដឹកនាំដោយគណបក្សសង្គ្រោះជាតិ បង្ហាញថាការខូចចខាតទ្រព្យសម្បត្តិសាធារណៈរបស់រដ្ឋ និងទ្រព្យសម្បត្តិរបស់ឯកជននៅរាជធានីភ្នំពេញមានចំនួនជាង ២៤៦លានរៀល និងជាង ២១៤ ០០០ដុល្លារ។
ចំពោះការខូចខាតទ្រព្យសម្ភារៈរបស់រោងចក្រនានា យោងតាមគេហទំព័រអគ្គស្នងការនគរបាលជាតិ ក្រសួងមហាផ្ទៃបានលើកយករបាយការណ៍របស់សមាគមរោងចក្រកាត់ដេរនៅកម្ពុជា(GMAC) ដែលបានផ្តល់ទៅក្រុមប្រឹក្សាអភិវឌ្ឍន៍កម្ពុជាគឺមានចំនួន៩៥រោងចក្រ ទទួលរងនូវការខូចខាត ដែលមានទឹកប្រាក់ប៉ាន់ស្មានសរុបប្រមាណជាង ៧២លានដុល្លារ។ ការខូចខាតនេះត្រូវបានបែងចែកដោយលម្អិត គឺខូចខាតទ្រព្យសម្បត្តិ ខូចខាតសង្វាក់ផលិតកម្ម និងការខូចខាតផ្សេងៗទៀត នេះចំពោះតែក្របខ័ណ្ឌរាជធានីភ្នំពេញ។
ដោយឡែកចំពោះការខូចខាតនៅតាមបណ្តារខេត្តវិញ ក៏មាននៅក្នុងរបាយការណ៍ដែរ គឺប៉ះពាល់ទៅដល់រោងចក្រកាត់ដេរមួយចំនួននៅខេត្តស្វាយរៀង, កំពង់ឆ្នាំង និងខេត្តកណ្តាលដែលមានតម្លៃរាប់ម៉ឺនដុល្លារដែរ។
ប្រតិកម្មទៅនឹងរបាយការណ៍របស់ក្រសួងមហាផ្ទៃនេះដែរ លោក សម រង្សី ប្រធានគណបក្សសង្គ្រោះជាតិបានថ្លែងប្រាប់វិទ្យុបារាំងអន្តរជាតិ RFI ថា លោកពុំមានការចាប់អារម្មណ៍ចំពោះការលើកឡើងទាំងនេះឡើយ។លោកថា ស្រេចតែគេចុះ មិនពាក់ពាន់ទៅនឹងគណបក្ស
សង្គ្រោះជាតិឡើយ ដោយគណបក្សង្គ្រោះជាតិតែងប្រកាន់ជំហរអហឹង្សារជានិច្ច។
សូមបញ្ជក់ថា គណបក្សសង្គ្រោះជាតិបានចាប់ផ្តើមធ្វើបាតុកម្មជាបន្តបន្ទាប់ចាប់តាំងពីមានការបោះឆ្នោត កាលពីថ្ងៃទី២៨ ខែកក្កដា ឆ្នាំ២០១៣មក ដោយគណបក្សប្រឆាំងនេះបដិសេធនូវលទ្ធផលឆ្នោត ដែលប្រកាសឡើងដោយគណៈកម្មការជាតិរៀបចំការបោះឆ្នោត គ.ជ.ប។ ជាមួយគ្នានោះដែរក្រុមអង្គការ សមាគម សហជីព ក៏បានធ្វើបាតុកម្ម លាយឡំគ្នានោះដែរ ជាពិសេសការទាមទាររបស់សហជីពដើម្បីដំឡើងប្រាក់ឈ្នួលអប្បបរមា១៦០ដុល្លារក្នុងមួយខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ