កម្ពុជា -

អត្ថបទចុះផ្សាយនៅថ្ងៃ សៅរ៍ 19 វិច្ឆិកា 2011 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 19 វិច្ឆិកា 2011

ដោយសារទឹកជំនន់រដ្ឋាភិបាលកម្ពុជាបង្កើនថវិកាដល់ ២៦០០លានដុល្លារសម្រាប់ឆ្នាំ២០១២

ទិដ្ឋភាពអង្គប្រជុំពេញអង្គនៃរដ្ឋសភាកម្ពុជា

RFI/Ly Meng Hour

ដោយ គី សុខលីម

រដ្ឋាភិបាលនៃប្រទេសកម្ពុជាសម្រេចបង្កើនថវិកាជាតិដល់ ២៦០០លានដុល្លារអាមេរិក សម្រាប់ឆ្នាំ២០១២ខាងមុខនេះ ពោលគឺ កើនឡើងប្រមាណជា ៧០០លានដុល្លារអាមេរិកបើប្រៀបធៀបទៅនឹងថវិកាឆ្នាំ២០១១។ ការបង្កើនថវិកាជាតិនេះគឺដោយសារប្រទេសកម្ពុជាបានរងផលប៉ះពាល់យ៉ាងធ្ងន់ធ្ងរពីគ្រោះមហន្តរាយទឹកជំនន់។

សេចក្តីរាយការណ៍របស់ គី សុខលីម ពីភ្នំពេញ

ស្តាប់ (02:26)

19/11/2011

រដ្ឋសភាជាតិនៃប្រទេសកម្ពុជាគ្រោងនឹងអនុម័តសេចក្តីព្រាងច្បាប់ថវិកាជាតិឆ្នាំ២០១២ នៅថ្ងៃពុធសប្តាហ៍ក្រោយនេះ។ ថវិកានេះមានចំនួន ២៦០០លានដុល្លារអាមេរិក ពោលគឺ មានទំហំធំជាងឆ្នាំ២០១១ ប្រមាណជា ៧០០លានដុល្លារអាមេរិក។

លោក ជាម យៀប ប្រធានគណៈកម្មការសេដ្ឋកិច្ចនិងហិរញ្ញវត្ថុនៃរដ្ឋសភាជាតិបានថ្លែងប្រាប់តាមទូរស័ព្ទនៅថ្ងៃសៅរ៍នេះថា ការដំឡើងថវិកានៅឆ្នាំ២០១២នេះ គឺដោយសារប្រទេសកម្ពុជាបានទទួលរងគ្រោះទឹកជំនន់យ៉ាងធ្ងន់ធ្ងរ កាលពីពេលកន្លងមកថ្មីៗនេះ។

តួលេខរបស់គណៈកម្មាធិការជាតិគ្រប់គ្រងគ្រោះមហន្តរាយបានបញ្ជាក់ថា ទឹកជំនន់ទឹកភ្លៀង និងទឹកទន្លេមេគង្គបានសម្លាប់ប្រជាជនខ្មែរអស់២៥០នាក់ និងបានបំផ្លាញទ្រព្យសម្បត្តិ-ហេដ្ឋារចនាសម្ព័ន្ធរបស់ជាតិ ក្នុងទឹកប្រាក់ប្រមាណជា ៥០០លានដុល្លារអាមេរិក។

លោក ជាម យៀប បានបញ្ជាក់ថា ថវិកាបន្ថែមក្នុងឆ្នាំ២០១២ខាងមុខនេះ គឺក្នុងគោលដៅជួសជុល និងកសាងហេដ្ឋារចនាសម្ព័ន្ធដែលខូចខាតឡើងវិញ។ ប៉ុន្តែ លោកមិនបានបញ្ជាក់ប្រាប់អោយច្បាស់ថា តើទឹកប្រាក់ចំនួនប៉ុន្មានភាគរយ ដែលត្រូវយកទៅកសាងជួសជុលហេដ្ឋារចនាសម័្ពន្ធឡើងវិញនោះ។

តំណាងរាស្រ្តគណបក្សប្រជាជនកម្ពុជា លោក ជាម យៀប បានបន្ថែមទៀតថា ថវិកាឆ្នាំ២០១២នេះនឹងផ្តោតសារៈសំខាន់យ៉ាងខ្លាំងទៅលើវិស័យអប់រំ និងវិស័យសុខាភិបាល។

សំណួរចោទឡើងថា បើចំនួនថវិកាមានការកើនឡើងច្រើនបែបនេះ តើរដ្ឋាភិបាលអាចមានទឹកប្រាក់គ្រប់គ្រាន់ សម្រាប់សម្រេចគោលដៅរបស់ខ្លួនបានដែរឬទេ?

ឆ្លើយតបទៅនឹងសំណួរនេះ លោក ជាម យៀម បានបញ្ជាក់ប្រាប់ថា ដោយសារតម្រូវការចាំបាច់ក្នុងការកសាងហេដ្ឋារចនាសម្ព័ន្ធឡើងវិញនោះ ច្បាប់ថវិកាបានអនុញ្ញតអោយរដ្ឋាភិបាលអាចខ្ចីលុយពីបរទេសក្នុងចំនួនទឹកប្រាក់ប្រមាណជា ១០០០លានដុល្លារអាមេរិក។ រីឯកាលពីឆ្នាំមុនៗ រដ្ឋាភិបាលមានសិទ្ធិខ្ចីតែក្នុងកម្រិតប្រមាណជា ៥០០លានដុល្លារអាមេរិកប៉ុណ្ណោះ។

រហូតមកដល់ពេលនេះ ប្រទេសកម្ពុជាជំពាក់បំណុលបរទេសប្រមាណជា ៣២០០លានដុល្លារអាមេរិក ពោលគឺ ប្រជាជនខ្មែរម្នាក់ៗត្រូវជំពាក់បំណុលបរទេស ប្រមាណជា២៣០ដុល្លារអាមេរិក។ ចំនួនបំណុលនេះត្រូវបានអ្នករិះគន់គិតគូរឃើញថា មានចំនួនច្រើនគួរអោយព្រួយបារម្ភ។ ប៉ុន្តែអ្នកជំនាញសេដ្ឋកិច្ចឯករាជ្យខ្លះនិយាយថា បំណុលនេះនៅមិនទាន់មានសភាពធ្ងន់ធ្ងរនៅឡើយទេ៕