វេទិកាជាតិលើកទី៣ស្តីពីការប្រែប្រួលអាកាសធាតុបិទបញ្ចប់ថ្ងៃនេះ
កិច្ចពិភាក្សាស្តីពីវិធានការទប់ទល់នឹងការប្រែប្រួលអាកាសធាតុរយៈពេលបីថ្ងៃបានឈានដល់ទីបញ្ចប់ហើយនៅថ្ងៃព្រហស្បតិ៍នេះ។ ក្រុមអ្នកជំនាញជាតិនិងអន្តរជាតិជាង ៧០០ នាក់បានចូលរួមពិភាក្សានិងផ្តល់ការគាំទ្រដល់កម្ពុជាដើម្បីចាត់វិធានការទប់ទល់នឹងការប្រែប្រួលអាកាសធាតុ។ នៅឯក្រៅវេទិកាឯណេះវិញសាធារណៈមតិបាននាំគ្នាស្តីបន្ទោសលើការកាប់បំផ្លាញព្រៃឈើថាជាចំណែកដ៏សំខាន់ដែលធ្វើឲ្យកម្ពុជាទទួលរងគ្រោះមហន្តរាយធម្មជាតិយ៉ាងគំហុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅក្នុងកិច្ចពិភាក្សារយៈពេលបីថ្ងៃនេះ ក្រុមអ្នកជំនាញបានលើកឡើងអំពីវិធានការជាច្រើនដើម្បីទប់ទល់ជាមួយការប្រែប្រួលអាកាសធាតុ។ ក្រៅពីមតិយោបល់នានា សហភាពអឺរ៉ុបក៏បានសន្យាគាំទ្រគោលនយោបាយរបស់កម្ពុជាក្នុងការទប់ទល់និងការប្រែប្រួលអាកាសធាតុផងដែរ។ លោក ហ្សង់ហ្វ្រង់ស័រ កូតាំង ឯកអគ្គរដ្ឋទូតសហភាពអឺរ៉ុបប្រចាំកម្ពុជាបានថ្លែងឲ្យដឹងកាលពីថ្ងៃពុធថា សហភាពអឺរ៉ុបនិងដៃគូរបស់ខ្លួននឹងគាំទ្រកម្ពុជាក្នុងការបន្សាំនិងកាត់បន្ថយផលប៉ះពាល់ពីការប្រែប្រួលអាកាសធាតុ។
វេទិកាជាតិលើកទី៣ស្ដីពីការប្រែប្រួលអាកាសធាតុបានបើកធ្វើឡើងកាលពីថ្ងៃទី ៥ ខែ វិច្ឆិកា នៅវិមានសន្តិភាព។ វេទិកានេះក៏ជាឱកាសដែលលោកនាយករដ្ឋមន្ត្រី ហ៊ុន សែន ប្រកាសឲ្យប្រើផែនការយុទ្ធសាស្ត្រលើកដំបូងស្តីពីការទប់ទល់ជាមួយនឹងការប្រែប្រួលអាកាសធាតុ។ ផែនការយុទ្ធសាស្ត្រនេះមានគោលដៅដោះស្រាយបញ្ហាប្រឈមដែលបង្កឡើងដោយ គ្រោះមហន្តរាយធម្មជាតិដែលកើតឡើងដោយសារការប្រែប្រួលអាកាសធាតុជាពិសេសបញ្ហាទឹកជំនន់ដែលកម្ពុជាកំពុងទទួលរងគ្រោះ។ ផែនការយុទ្ធសាស្ត្រនេះនឹងត្រូវអនុវត្តចន្លោះពីឆ្នាំ ២០១៤ ដល់ ឆ្នាំ ២០២៣ ។
វេទិកាជាតិលើកទី ៣ ស្ដីពីការប្រែប្រួលអាកាសធាតុនេះ បានបើកឱកាសឲ្យក្រុមអ្នកជំនាញជាតិនិងអន្តរជាតិពិភាក្សាគ្នាអំពីបញ្ហាជាច្រើនទាក់ទងនឹងការងារគ្រប់គ្រងការប្រែប្រួលអាកាសធាតុ។ អ្នកជំនាញជាង ៧០០ នាក់មកពីរដ្ឋាភិបាល ដៃគូអភិវឌ្ឍន៍ អង្គការសង្គមស៊ីវិល និងស្ថាប័នជាច្រើនទៀតបានចូលរួមពិភាក្សាក្នុងវេទិកានេះ។
ខណៈដែលក្រុមអ្នកជំនាញកំពុងពិភាក្សាគ្នានៅក្នុងវេទិកា នៅឯក្រៅវេទិកាឯណេះវិញគេបាននាំគ្នាស្តីបន្ទោសទៅលើការកាប់បំផ្លាញព្រៃឈើ។ ក្រុមអង្គការសង្គមស៊ីវិលដែលធ្វើការងារទាក់ទងនឹងព្រៃឈើ រួមទាំងប្រជាពលរដ្ឋសហគមន៍ផងបានស្នើឲ្យរដ្ឋាភិបាលចាត់វិធានការជាបន្ទាន់ដើម្បីទប់ស្កាត់ការកាប់បំផ្លាញព្រៃឈើ។ ពួកគេយល់ថា នេះគឺជា ផ្នែកមួយដ៏សំខាន់ក្នុងការធ្វើឲ្យមានគ្រោះធម្មជាតិទឹកជំនន់ដែលសម្លាប់មនុស្សរាប់រយនាក់ជារៀងរាល់ឆ្នាំ។ ជាក់ស្តែង ឆ្នាំ ២០១៣ នេះ ទឹកជំនន់បានសម្លាប់ពលរដ្ឋខ្មែរ ១៦៨ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ