លោក សម រង្ស៊ី ប្រកាសពីការរួបរួមរបស់គណបក្សជាតិនិយម
ក្នុងពិធីរម្លឹកខួប ១ ឆ្នាំ នៃការបង្កើតគណបក្សសង្គ្រោះជាតិ ដែលជាការច្របាច់បញ្ចូលគ្នា រវាងគណបក្សសម រង្ស៊ី និងគណបក្សសិទ្ធិមនុស្ស របស់លោក កឹម សុខា នាព្រឹកថ្ងៃទី៧មេសានេះ លោកសម រង្ស៊ី បានប្រកាសពីការរួបរួមរបស់គណបក្សជាតិនិយម។ គណបក្សជាតិនិយម ដែលជាអតីតគណបក្ស នរោត្តម រណឫទ្ធិ បានសម្រេច គាំទ្រគណបក្សសង្គ្រោះជាតិ ពោល គឺការបោះឆ្នោតអសកល ដើម្បីជ្រើសតាំងសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ នាថ្ងៃទី១៨ ឧសភា គឺគណបក្សជាតិនិយម ដែលមានសមាជិកក្រុមប្រឹក្សាឃុំសង្កាត់ ជាអង្គបោះឆ្នោត ចំនួន ៥២ នាក់ ប្រកាសបោះឆ្នោតគាំទ្រគណបក្សសង្គ្រោះជាតិ។
ចុះផ្សាយនៅថ្ងៃ៖
ស្តាប់ - ០២:៣២
ជាដំណឹងនៃការរួបរួមថ្មី នៅមុនការបោះឆ្នោតក្រុមប្រឹក្សារាជធានីខេត្ត ក្រុងស្រុកខណ្ឌ អាណត្តិទី២ នាថ្ងៃទី១៨ឧសភាខាងមុខ។ នោះ គឺក្នុងខួបគម្រប់មួយឆ្នាំ នៃការរួមគ្នា បង្កើតគណបក្សសង្គ្រោះជាតិ នាថ្ងៃទី៧មេសា លោកសមរង្ស៊ី បានប្រកាសនូវជំហររបស់គណបក្សជាតិនិយម ដែលជាអតីតគណបក្សនរោត្តមរណឫទ្ធិ សព្វថ្ងៃ មានលោក ផេង ហេង ជាប្រធាន និងលោក មុត ចន្ថា ជាអគ្គលេខាធិការ បានសម្រេច ងាកមកគាំទ្រគណបក្សសង្គ្រោះជាតិ។
មេដឹកនាំគណបក្ស ដែលអះអាងថា ជាគណបក្សរាជានិយម ក៏បានចូលរួមក្នុងពិធីរម្លឹកខួបបង្កើតគណបក្សសង្គ្រោះជាតិ នាព្រឹកថ្ងៃទី៧មេសា នៅទីស្នាក់ការ ចាក់អង្រែលើ តាមផ្លូវជាតិលេខ២ ផងដែរ។
លោក សម រង្ស៊ី បានហៅការគាំទ្ររបស់គណបក្សជាតិនិយម ពេលនេះ ថានាំឲ្យគណបក្សសង្គ្រោះជាតិ ក្លាយជាគណបក្សរួបរួមដ៏ធំ រវាងកម្លាំងស្នេហាជាតិ និងកម្លាំងប្រជាធិបតេយ្យ គ្រប់និន្នាការទាំងអស់។
ចំណែកលោក មុត ចន្ថា អគ្គលេខាធិការគណបក្សជាតិនិយម បានបញ្ជាក់ថា គណបក្សជាតិនិយម បានប្រកាសរួចហើយ ប្រាប់ថ្នាក់ដឹកនាំទូទាំងប្រទេស ឲ្យបោះឆ្នោតគាំទ្រគណបក្សសង្គ្រោះជាតិ នាថ្ងៃទី១៨ឧសភា ដើម្បីផ្លាស់ប្តូររដ្ឋបាលមូលដ្ឋាន។ លោក មុត ចន្ថា បានបន្ថែមថា ក្រៅពីការគាំទ្រគណបក្សសង្គ្រោះជាតិ នាពេលនេះ គឺនៅក្នុងការបោះឆ្នោត ឃុំសង្កាត់នៅឆ្នាំ២០១៧ និងការបោះឆ្នោតជាតិ នៅឆ្នាំ២០១៨ គណបក្សជាតិនិយម នឹងរួមច្របាច់បញ្ចូលជាមួយនឹងគណបក្សសង្គ្រោះជាតិតែម្តង។
ចំពោះការរួបរួមថ្មីនេះ គណបក្សជាតិនិយម ដែលមានសមាជិកក្រុមប្រឹក្សាឃុំសង្កាត់ ជាអង្គបោះឆ្នោត ចំនួន ៥២ នាក់ បានសម្រេចថា នឹងបោះឆ្នោតឲ្យគណបក្សសង្គ្រោះជាតិ ក្នុងការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ នាថ្ងៃទី១៨ឧសភាខាងមុខ។
គណបក្សសង្គ្រោះជាតិ ដែលជាការរួបបង្កើតដោយគណបក្សសមរង្ស៊ី និងគណបក្សសិទ្ធិមនុស្ស មានសមាជិកក្រុមប្រឹក្សាឃុំសង្កាត់ ដែលជាអង្គបោះឆ្នោត សរុបចំនួន ២៩៥៥ នាក់។
ក្នុងករណីគណបក្សជាតិនិយម សម្រេចគាំទ្រគណបក្សសង្គ្រោះជាតិ នោះលទ្ធផលនៃការបោះឆ្នោតក្រុមប្រឹក្សារាជធានីខេត្តក្រុងស្រុកខណ្ឌ អាណត្តិទី២ នាថ្ងៃទី១៨ឧសភា ត្រូវបានខុមហ្វ្រែល ប៉ាន់ស្មានថា គណបក្សសង្គ្រោះជាតិ នឹងទទួលបាន ៦៩០ អាសនៈ ក្នុងចំណោមអាសនៈក្រុមប្រឹក្សារាជធានី ខេត្ត ក្រុង ស្រុក ខណ្ឌ សរុប ៣៣២៤ អាសនៈ។
ប៉ុន្តែទោះបីជាមានការរួបរួមដូច្នេះ តែបើតាមខុមហ្វ្រែល គណបក្សប្រជាជនកម្ពុជា នៅតែមានសំឡេងនាំមុខដាច់ឆ្ងាយ។ នោះគឺគណបក្សប្រជាជនកម្ពុជា ដែលមានសមាជិកក្រុមប្រឹក្សាឃុំសង្កាត់ ចំនួន ៨២៩២ នាក់ នឹងទទួលបាន ២២០៨ អាសនៈ សម្រាប់ការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ នាខែក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ