គណបក្សសង្គ្រោះជាតិប្រារព្ធខួប១ឆ្នាំនៃការបង្កើតគណបក្ស
គណបក្សសង្គ្រោះជាតិនឹងរៀបចំអបអរសាទរខួប១ឆ្នាំ នៃការបង្កើតគណបក្សនេះ នៅថ្ងៃចន្ទទី៧ មេសា ខាងមុខនេះ។ គណបក្សសង្គ្រោះជាតិ ដែលបានបង្កើតឡើងដោយការច្របាច់បញ្ចូលគ្នារវាងគណបក្សសម រង្ស៊ី និង គណបក្សសិទ្ធិមនុស្ស តាមរយៈអង្គសមាជមួយ កាលពីថ្ងៃទី៧ ខែមេសា ឆ្នាំ២០១៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
ការប្រារព្ធខួបអបអរសាទរថ្ងៃកំណើត១ឆ្នាំរបស់គណបក្សសង្គ្រោះជាតិនេះ នឹងធ្វើឡើងនៅទីស្នាក់ការគណបក្សស្ថិតនៅសង្កាត់ចាក់អង្រែលើ ខណ្ឌមានជ័យ ដោយមានអ្នកចូលរួមប្រមាណជា២០០០នាក់ ដែលភាគច្រើន គឺជាតំណាងសកម្មជនរបស់គណបក្សមកពីតាមបណ្តាខេត្តនានា នៅទូទាំងប្រទេស។
តាមកម្មវិធី សកម្មជនទាំងអស់នឹងជួបជុំគ្នាប្រមាណជាម៉ោង៧ព្រឹក ដោយមានការថ្លែងពីប្រវត្តិនៃការឈានទៅដល់ការបង្កើតគណបក្សសង្គ្រោះជាតិ និងរបាយការណ៍ស្តីពីសមិទ្ធផលរយៈពេល១ឆ្នាំនៃវត្តមានរបស់គណបក្សនៅក្នុងឆាកនយោបាយកម្ពុជា បន្ទាប់មក ក៏មានការថ្លែងសុន្ទរកថារបស់លោក កឹម សុខា អនុប្រធានគណបក្សសង្ក្រោះជាតិ តាមរយៈវីដេអូខនហ្វើរ៉េន ពីសហរដ្ឋអាមេរិក និងចុងក្រោយគឺជាសារនយោបាយរបស់លោក សម រង្ស៊ី ប្រធានគណបក្សសង្គ្រោះជាតិ។ នេះបើតាមការបញ្ជាក់ពីលោក ហូរ វ៉ាន់ មន្ត្រីជាន់ខ្ពស់គណបក្សសង្គ្រោះជាតិ។
លោក ហូរ វ៉ាន់ បានបន្ថែមថា ការប្រារព្ធខួប១ឆ្នាំនៃកំណើតរបស់គណបក្សសង្គ្រោះជាតិនេះ នឹងផ្តល់សារៈសំខាន់មួយទៀត សំរាប់គណបក្សក្នុងការបន្តប្រឡូកក្នុងឆាកនយោបាយនៅកម្ពុជា។
គួររម្លឹកឡើងវិញថា គណបក្សសង្គ្រោះជាតិ ត្រូវបានបង្កើតឡើងដោយការច្របាច់បញ្ចូលគ្នារវាងគណបក្ស សម រង្ស៊ី និង គណបក្សសិទ្ធិមនុស្ស តាមរយៈអង្គសមាជមួយកាលពីថ្ងៃទី៧មេសាឆ្នាំ២០១៣។ គណបក្សសង្គ្រោះជាតិ ក៏បានកើតឡើងចេញពីចលនាសង្គ្រោះជាតិ តាមរយៈកិច្ចព្រមព្រៀងមួយ ដោយមានលោក សម រង្ស៊ី ជាប្រធាន និងលោក កឹម សុខា ជាអនុប្រធាន នៅឯទីក្រុងម៉ានីលប្រទេសហ្វីលីពីន កាលពីថ្ងៃទី៧ខែកក្កដា ឆ្នាំ២០១៣ដែរ។ មកទល់នឹងថ្ងៃចន្ទទី៧មេសាខាងមុខ គណបក្សសង្គ្រោះជាតិ មានអាយុត្រឹម១ឆ្នាំគត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ