កម្ពុជារៀបចំឯកសាររារាំងគម្រោងសាងសង់អង្គរវត្តនៅឥណ្ឌា
ទីបំផុតកម្ពុជាកម្ពុជានឹងមិននៅស្ងៀម ចំពោះគម្រោងសាងសង់អង្គរវត្តនៅក្នុងប្រទេសឥណ្ឌានោះទេ។ រដ្ឋមន្ត្រីក្រសួងពាណិជ្ជកម្ម លោកចម ប្រសិទ្ធបានថ្លែងប្រាប់អ្នកសារព័ត៌មានថា ក្រសួងពាណិជ្ជកម្មរបស់លោកគឺជាអ្នករៀបចំឯកសារដើម្បីទប់ស្កាត់គម្រោងដ៏គួរអោយភ្ញាក់ផ្អើលនេះរបស់អង្គការក្រៅរដ្ឋាភិបាលមួយរបស់ឥណ្ឌាដែលកំពុងចាប់ផ្តើមសាងសង់អង្គរវត្តអោយធំជាងប្រាសាទអង្គរវត្តដើមរបស់កម្ពុជាទៅទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
រដ្ឋមន្ត្រីក្រសួងពាណិជ្ជកម្មលោកចម ប្រសិទ្ធបានបញ្ជាក់នៅថ្ងៃចន្ទទី១៩មីនានេះថា ក្រសួងពាណិជ្ជកម្មរបស់លោកកំពុងរៀបចំឯកសារដើម្បីទប់ស្កាត់គម្រោងសាងសង់អង្គរវត្តដ៏ធំមួយនៅប្រទេសឥណ្ឌា។ The Mahavir Mandir Trust គឺជាអង្គការក្រៅរដ្ឋាភិបាលមួយនៅឥណ្ឌាដែលបានប្រកាសសាងសង់អង្គរវត្តចម្លងពីប្រាសាទអង្គរវត្តចំណាស់១០០០ឆ្នាំរបស់កម្ពុជា។ អង្គការនេះគ្រោងប្រើរយៈពេល១០ឆ្នាំ និងទឹកប្រាក់២០លានដុល្លារដើម្បីសាងសង់ប្រាសាទហិណ្ឌូមួយនេះអោយធំជាងគេក្នុងពិភពលោក។
ក្នុងពេលកន្លងមក មិនមានប្រតិកម្មផ្លូវការណាមួយពីរដ្ឋាភិបាលកម្ពុជានោះឡើយ។ ផ្ទុយទៅវិញមន្ត្រីរដ្ឋាភិបាលបានបញ្ចេញគំនិតផ្ទាល់ខ្លួនដែលបង្ហាញពីការយល់ឃើញខុសគ្នាចំពោះគម្រោងសាងសង់អង្គរវត្តនេះ។ នៅពេលរដ្ឋមន្ត្រីមួយចំនួនថ្លែងថា ការសាងសង់អង្គរវត្តចម្លងនេះនឹងធ្វើអោយអង្គរវត្តពិតប្រាកដកាន់តែមានតម្លៃនោះ រដ្ឋមន្ត្រីផ្សេងទៀតបានបញ្ចេញទស្សនៈប្រឆាំងដាច់អហង្ការ។ មតិប្រឆាំងគម្រោងសាងសង់អង្គរវត្តទំនងអាចក្លាយជាប្រតិកម្មផ្លូវការរបស់កម្ពុជាហើយនេះបើគេស្តាប់លឺប្រសាសន៍របស់លោកចម ប្រសិទ្ធ ទេសរដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្ម។
ថ្លែងប្រាប់អ្នកកាសែតនៅក្រោយជំនួបជាមួយប្រតិភូអាមេរិកនៅថ្ងៃនេះ លោកចម ប្រសិទ្ធ បានថ្លែងចាត់ទុកគម្រោងសាងសង់អង្គរវត្តគឺជាការចម្លងកម្មសិទ្ធិបញ្ញានៃប្រាសាទអង្គរវត្តរបស់កម្ពុជា។ រដ្ឋមន្ត្រីក្រសួងពាណិជ្ជកម្មបានបន្តថា បើទោះជាប្រាសាទអង្គរវត្តមានរចនាបទហិណ្ឌូដែលមានកំណើតនៅឥណ្ឌាមែន ប៉ុន្តែថា រចនាបទហិណ្ឌូនៅលើប្រាសាទអង្គរវត្តនេះជារចនាបទដែលកម្ពុជាបានច្នៃក្លាយជារបស់ខ្លួនតាំងពី១០០០ឆ្នាំមុន។ ទោះយ៉ាងណាក៏ដោយ លោករដ្ឋមន្ត្រីបានបញ្ជាក់ថា ក្រសួងរបស់លោកនឹងធ្វើការងារប្រតិកម្មនេះដោយប្រយ័ត្នប្រយែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ