កម្ពុជា - 
អត្ថបទចុះ​ផ្សាយ​នៅ​ថ្ងៃ សៅរ៍ 28 មករា 2012 - ព័ត៌មានទើប​កែប្រើ​លើកចុងក្រោយ​ ថ្ងៃ សៅរ៍ 28 មករា 2012

ឧត្តមក្រុមប្រឹក្សា​នៃ​អង្គចៅក្រម​ពន្យល់​ពី​ការ​មិន​តែងតាំង​លោក Laurent

សហចៅក្រមស៊ើបអង្កេត​អន្តរជាតិបម្រុង លោក Laurent Kasper Ansermet
សហចៅក្រមស៊ើបអង្កេត​អន្តរជាតិបម្រុង លោក Laurent Kasper Ansermet
RFI/Leang Delux

ដោយ ប៉ែន បូណា

ឧត្តមក្រុមប្រឹក្សា​នៃ​អង្គចៅក្រម​បាន​ចេញ​ផ្សាយ​ជា​សាធារណៈ​នៅ​ថ្ងៃ​សៅរ៍​នេះ នូវ​របាយការណ៍​សង្ខេប​ដើម្បី​ពន្យល់​ពី​ការ​បដិសេធ​មិន​ព្រម​តែងតាំង​លោក​ Laurent Kasper-Ansermet ជា​សហចៅក្រម​ស៊ើបអង្កេត​អន្តរជាតិ។ ​ការ​ផ្សព្វផ្សាយ​របាយការណ៍​នេះ​បាន​ធ្វើ​ឡើង​ ក្រោយ​ពី​មាន​ការ​ប្រឈមមុខ​ដាក់គ្នា​ដ៏​តានតឹង​រវាង​ភាគី​កម្ពុជា​ និង​សហប្រជាជាតិ។ បើ​យោង​តាម​ឧត្តមក្រុមប្រឹក្សា​នៃ​អង្គចៅក្រម​ លោក​ចៅក្រម​ជនជាតិ​ស្វីស​រូប​នេះ​បាន​ប្រព្រឹត្ត​ខុស​ក្រមសីលធម៌​ចៅក្រម​នៃ​សាលាក្តី​ខ្មែរក្រហម។

សេចក្តីរាយការណ៍​របស់ ប៉ែន បូណា ពីទីក្រុង​ភ្នំពេញ
 

28/01/2012 by ប៉ែន បូណា

ក្រោយ​ការ​មិន​ចុះ​សម្រុង​គ្នា​ដ៏​តឹងតែង​រវាង​សហប្រជាជាតិ​ និង​រដ្ឋាភិបាល​កម្ពុជា​ស្តីពី​ការ​តែង​តាំង​លោក​ Laurent Kasper-Ansermet​ ជា​សហចៅក្រម​ស៊ើបអង្កេត​អន្តរជាតិ​ ឧត្តម​ក្រុមប្រឹក្សា​នៃ​អង្គចៅក្រម​បាន​ចេញ​ផ្សាយ​របាយការណ៍​សង្ខេប​មួយ​ជា​សាធារណៈ ដើម្បី​ពន្យល់​ពី​ការ​បដិសេធ​មិន​តែងតាំង​ចៅក្រម​ជនជាតិ​ស្វីស​រូប​នេះ។ ​របាយការណ៍​បាន​ឲ្យ​ដឹង​ថា ​នៅ​ក្នុង​កិច្ច​ប្រជុំ​កាល​ពី​ថ្ងៃ​ទី​១៣ ​ខែ​មករា​ ឧត្តមក្រុមប្រឹក្សា​នៃ​អង្គចៅក្រម​បាន​ពិភាក្សា​អំពី​សំណើ​របស់​អគ្គលេខាធិការ​នៃ​អង្គការ​សហប្រជាជាតិ​ស្តីពី​ការ​សុំ​តែងតាំង​លោក​ Laurent Kasper-Ansermet ​ជា​សហចៅក្រម​ស៊ើបអង្កេត​អន្តរជាតិ​នៅ​សាលាក្តី​ខ្មែរក្រហម។

ប៉ុន្តែ ​បន្ទាប់​ពី​ការ​ពិភាក្សា ​អង្គប្រជុំ​បាន​យល់​ថា​ លោក​ចៅក្រម​រូបនេះ​បាន​ចុះ​ផ្សាយ​អត្ថបទ​ជា​ច្រើន​តាមរយៈ​Twitter​ របស់​ខ្លួន​ទាក់ទង​នឹង​សាលាក្តី ជា​ពិសេស ទាក់​ទង​នឹង​សំណុំ​រឿង​០០៣​ និង​០០៤​ ចាប់​តាំង​ពី​រូបលោក​ត្រូវ​បាន​តែងតាំង​ជា​សហចៅក្រម​ស៊ើបអង្កេត​បម្រុង​អន្តរជាតិ​រួច​មក​។ សកម្មភាព​ទាំង​នេះ​ត្រូវ​បាន​ឧត្តមក្រុមប្រឹក្សា​នៃ​អង្គចៅក្រម​ចាត់​ទុក​ថា ​ជា​ការ​ឆ្លុះ​បញ្ចាំង​ឲ្យ​ឃើញ​ពី​ការ​រំលោភ​លើ​ក្រមសីលធម៌​នៃ​វិធាន​ផ្ទៃក្នុង ​និង​បទបញ្ញត្តិ​ច្បាប់​ផ្សេងៗ​ ដូច​ជា​ការ​ធ្វើ​ឲ្យ​ប៉ះពាល់​ដល់​ការ​សម្ងាត់​ និង​សុចរិតភាព​នៃ​ការស៊ើបសួរ ​តាម​រយៈ​ការ​ផ្សព្វផ្សាយ​ជា​សាធារណៈ​នូវ​ឈ្មោះ​មនុស្ស ៥​នាក់​ទាក់ទង​នឹង​សំណុំរឿង​០០៣ ​និង​ ០០៤​ ជា​ដើម។
 
មិន​តែ​ប៉ុណ្ណោះ ​បើ​យោង​តាម​ឧត្តមក្រុមប្រឹក្សា​នៃ​អង្គចៅក្រម ​លោក​ Laurent Kasper-Ansermet​ ថែម​ទាំង​បាន​វាយប្រហារ​ទៅ​លើ​សហសេវិក​របស់​ខ្លួន​គឺ​សហចៅក្រម​ស៊ើបអង្កេត ​យូ ប៊ុនឡេង ​និង​លោក ​Siegfried Blunk ​តាម​រយៈ​ការ​បញ្ចេញ​ទស្សនៈ​របស់​ខ្លួន​ដោយ​ផ្សព្វផ្សាយ​បន្ត​ព័ត៌មាន​ ដែល​ជា​ការ​រំលោភ​លើ​គោលការណ៍​នៃ​ក្រមសីលធម៌​ចៅក្រម​របស់​សាលាក្តី។​ ទាំង​នេះ​ជា​ហេតុផល​ដែល​នាំ​ឲ្យ​សមាជិក​ឧត្តមក្រុមប្រឹក្សា​នៃ​អង្គចៅក្រម​មិន​យល់​ព្រម​តែង​តាំង​លោក ​Laurent​ ជា​សហចៅក្រម​ស៊ើបអង្កេត​អន្តរជាតិ​តាម​សំណើ​របស់​សហប្រជាជាតិ។​
 
នេះ​ជា​លើក​ដំបូង​ហើយ​ដែល​ឧត្តម​ក្រុមប្រឹក្សា​នៃ​អង្គ​ចៅក្រម​បាន​ពន្យល់​ជា​សាធារណៈ​អំពី​បញ្ហា​នេះ។ ​ការ​ពន្យល់​នេះ​បាន​ធ្វើ​ឡើង បន្ទាប់​ពី​ភាគី​សហប្រជាជាតិ​បាន​ប្រកាស​ថា នឹង​ឲ្យ​លោក​ Laurent​ ចូល​ធ្វើ​ការ​ដោយ​មិន​ចាំ​បាច់​មាន​ការ​តែងតាំង។ ​អង្គការ​សហប្រជាជាតិ​តាមរយៈ​លោក​ David Scheffer​ និង​រដ្ឋាភិបាល​កម្ពុជា តំណាង​ដោយ​លោក​ឧបនាយករដ្ឋមន្ត្រី​ សុខ អាន ​បាន​ជួប​ពិភាក្សា​គ្នា​កាល​ពី​ថ្ងៃ​២៤ មករា ដើម្បី​ដោះស្រាយ​ការ​មិន​ចុះ​សម្រុង​គ្នា​នេះ។ ​ប៉ុន្តែ បញ្ហា​មិន​អាច​ដោះស្រាយ​បាន​ឡើយ ដោយ​តំណាង​អង្គការ​សហប្រជាជាតិ​មិន​ទទួល​យក​ការ​ពន្យល់​របស់​កម្ពុជា៕

tags: កម្ពុជា - តុលាការខ្មែរក្រហម
ទាក់ទងនឹងប្រធានបទនេះ​ដែរ :
អត្ថាធិប្បាយ
ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close