ភូមា -

អត្ថបទចុះផ្សាយនៅថ្ងៃ ព្រហស្បតិ៍ 01 វិច្ឆិកា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 01 វិច្ឆិកា 2012

រដ្ឋាភិបាលភូមា៖ អំពើហិង្សារវាងសហគមន៍សាសនាអាចបង្កចេញនូវទង្វើភេរវកម្ម

លោកប្រធានាធិបតីភូមា ថេនសេន

REUTERS/Tomohiro

ដោយ គួច គន្ធារ៉ា

នៅថ្ងៃពុធ ទី៣១ តុលាម្សិលមិញ រដ្ឋាភិបាលនៃប្រទេសភូមាបានព្រមានទុកជាមុនថា អំពើហិង្សាសម្លាប់គ្នារវាងសហគមន៍អ្នកកាន់ព្រះពុទ្ធសាសនា និងសាសនាអ៊ីស្លាមនៅប៉ែកខាងលិចប្រទេសអាចនឹងបង្កចេញនូវទង្វើភេរវកម្មប្រដាប់អាវុធ។ ការព្រួយបារម្ភនេះបានកើតមានឡើង ក្រោយពីមានការវាយប្រហារលើកម្លំាងសន្តិសុខ ដោយក្រុមជនដៃដល់បានប្រើប្រាស់គ្រឿងផ្ទុះ និងអាវុធធ្វើដោយដៃ។ រដ្ឋអំណាចបានរឹបអូសអាវុធធ្វើដោយដៃចំនួន ១៨០ដើម និងបានឃាត់ខ្លួនមនុស្សជាច្រើននាក់ដែលបានចូលរួមផលិត។

សេចក្តីរាយការណ៍របស់ គួច គន្ធារ៉ា

ស្តាប់ (03:03)

01/11/2012 by គួច គន្ធារ៉ា

តំាងពីមានការផ្ទុះអំពើហិង្សាសម្លាប់គ្នារវាងសហគមន៍អ្នកកាន់ព្រះពុទ្ធសាសនា និងសាសនាអ៊ីស្លាមនៅក្នុងរដ្ឋរ៉ាក់ឃីនកាលពីខែមិថុនាមក នេះជាលើកទីមួយហើយដែលរដ្ឋាភិបាលភូមាបានសម្តែងក្តីបារម្ភរបស់ខ្លួន។ គឺបារម្ភខ្លាចអំពើហិង្សានេះប្រែរូបភាពទៅជាការបង្កអំពើភេរវកម្មប្រដាប់អាវុធទៅវិញ។ បន្ទាប់ពីបានស្គាល់ភាពស្ងប់ស្ងាត់អស់រយៈពេលប៉ុន្មានសប្តាហ៍កន្លងទៅមក រដ្ឋរ៉ាក់ឃីនដែលបានស្ថិតក្នុងភាពអាសន្នតំាងពីថ្ងៃផ្ទុះអំពើហិង្សាដំបូងក្នុងខែមិថុនានោះ ក៏បានស្គាល់ភាពវឹកវរជាថ្មីកាលពីថ្ងៃទី២១ តុលារវាងក្រុមអ្នកកាន់ព្រះពុទ្ធសាសនា និងក្រុមអ្នកកាន់សាសនាអ៊ីស្លាមដែលជាជនជាតិភាគតិច រ៉ូហ៊ីងយ៉ា។ ភាពវឹកវរថ្មីនេះបានបណ្តាលឲ្យមានមនុស្សស្លាប់ចំនួន ៨៩នាក់ និងរងរបួសចំនួន ១៣៦នាក់ ព្រមទំាងមានការដុតបំផ្លាញផ្ទះសម្បែងអស់ជាង ៥ ០០០ខ្នង ដោយបន្សល់ទុកអ្នកអត់មានទីជម្រកជាង ៣២ ០០០នាក់។

នៅក្នុងភាពវឹកវរចុងក្រោយនេះ រដ្ឋអំណាចទីក្រុងណៃពីដ៏បានទទួលស្គាល់ថា មានជនរងគ្រោះភាគច្រើនបានស្លាប់ដោយគ្រាប់កំាភ្លើងបាញ់ដោយកម្លំាងសន្តិសុខដើម្បីរារំាង ទប់ស្កាត់កុំឲ្យមានការប៉ះទង្គិចគ្នារវាងសហគមន៍សាសនាទំាងពីរ។ ទន្ទឹមគ្នានេះ រដ្ឋអំណាចក៏បានចោទអង្គការជាតិ និងអន្តរជាតិមួយចំនួនពីបទបានចូលរួម និងញុះញង់ឲ្យមានអំពើហិង្សារវាងសហគមន៍សាសនាទំាងពីរ ដោយមិនបានបញ្ចេញឈ្មោះអង្គការណាមួយទេ។ ប៉ុន្តែបានសន្យាថា នឹងចាត់វិធានការចាស់ដៃទៅលើអង្គការណាដែលបានចូលរួម។

ក្តីបារម្ភក៏មានដែរ ពីសំណាក់សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ដែលភូមាជាសមាជិក។ លោកអគ្គលេខាធិការអាស៊ាន ស៊ូរិន ពិតស៊ូវ៉ាន់បានព្រមានទុកជាមុនពីការផ្ទុះឡើងនូវអស្ថិរភាពនៅក្នុងតំបន់ ប្រសិនបើរដ្ឋាភិបាលភូមាមិនប្រញាប់ដោះស្រាយបញ្ហានេះឲ្យបានទាន់ពេលនោះទេ។ « រដ្ឋាភិបាលភូមាបានចាត់ទុកបញ្ហានេះថា ជារឿងផ្ទៃក្នុងរបស់ខ្លួន ប៉ុន្តែបញ្ហាផ្ទៃក្នុងរបស់ភូមានឹងអាចក្លាយជាបញ្ហារបស់អាស៊ាន និងក្នុងតំបន់ ប្រសិនបើភូមាមិនបានប្រយ័ត្នប្រយែងទេនោះ » នេះជាការថ្លែងរបស់លោក ស៊ូរិន ពិតស៊ូវ៉ាន់។

បើយោងតាមតួលេខផ្លូវការគិតរហូតមកទល់ពេលនេះ អំពើហិង្សារវាងក្រុមអ្នកកាន់សាសនាអ៊ីស្លាម រ៉ូហ៊ីងយ៉ា និងក្រុមអ្នកកាន់ព្រះពុទ្ធសាសនាបានបណ្តាលឲ្យមានមនុស្សស្លាប់ជិត ១៨០នាក់ក្នុងរដ្ឋរ៉ាក់ឃីន។ តែបើយោងតាមក្រុមអ្នកការពារសិទ្ធិមនុស្ស ចំនួនអ្នកស្លាប់មានច្រើនជាងនេះឆ្ងាយណាស់។ ក្រៅពីនោះ នៅមានជនភៀសខ្លួនរ៉ូហ៊ីងយ៉ារាប់សិបម៉ឺននាក់ផ្សេងទៀតបានភាសខ្លួនទៅរស់នៅក្នុងប្រទេសជិតខាង ពិសេសប្រទេសបង់ក្លាដែស។

សូមរម្លឹកជូនថា មានជនជាតិភាគតិចរ៉ូហ៊ីងយ៉ារស់នៅប្រមាណជា ៨០ម៉ឺននាក់ក្នុងប្រទេសភូមា ពិសេសនៅក្នុងរដ្ឋរ៉ាក់ឃីន។ តែបញ្ហានៅត្រង់ថា ពួកគេមិនត្រូវបានរដ្ឋាភិបាលភូមាទទួលស្គាល់ ជាជនជាតិភាគតិច ឬមួយក៏ជាពលរដ្ឋភូមាទេ តែជា « ជនអន្តោប្រវេសន៍ខុសច្បាប់ »។ អង្គការសហប្រជាជាតិបានចាត់ទុកជនជាតិភាគតិចរ៉ូហ៊ីងយ៉ាថា ជាអ្នកដែលបានទទួលរងការធ្វើទុក្ខបុកម្នេញជាងគេនៅលើពិភពលោក៕