អង្គការសហប្រជាជាតិ៖ សហគមន៍សាសនានៅភូមា កាន់តែធ្លាក់ក្នុងភាពដុនដាប
នៅថ្ងៃសៅរ៍ម្សិលមិញ លោកស្រី Yanghee Lee បេសកជនអង្គការសហប្រជាជាតិ បានបរិហារព្រមានភូមា ពីការបែកបាក់រវាងសហគមន៍អ្នកកាន់ពុទ្ធសាសនា និងសាសនាអ៊ីស្លាមក្នុងស្រុក ដែលបង្កអោយស្ថានភាពកាន់តែធ្លាក់ដុនដាប។ លោកស្រីយ៉ាំងហឺ លី ចុះទៅទស្សនកិច្ច១០ថ្ងៃនៅភូមា ចុះទៅរដ្ឋរ៉ាក់ឃីនភាគខាងលិច ដែលសំបូរជនភៀសខ្លួនជនជាតិរ៉ូហ៊ីងយ៉ាស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
ថ្ងៃសៅរ៍ម្សិលមិញ លោកស្រី Yanghee Lee អ្នកនាំពាក្យពិសេសអង្គការសហប្រជាជាតិទទួលបន្ទុកសិទ្ធិមនុស្ស នៅភូមា បានផ្តល់សន្និសីទសារព័ត៌មានទាក់ទងនឹងបញ្ហាជម្លោះសហគមន៍សាសនា នៅភូមា។ សន្និសីទធ្វើឡើង ក្នុងក្របខណ្ឌនៃទស្សនកិច្ច១០ថ្ងៃរបស់លោកស្រីលី នៅភូមា។
បេសកជនអង្គការសហប្រជាជាតិរូបនេះ បានថ្លែងបរិហារពីស្ថានភាពដុនដាប បង្កឡើងដោយការបែកបាក់សហគមន៍អ្នកកាន់ពុទ្ធសាសនា និងសាសនាអ៊ីស្លាម ក្នុងស្រុក ព្រោះថា គាត់បានចុះទៅរដ្ឋរ៉ាក់ឃីនភាគខាងលិចភូមា ទៅមើលជនភៀសខ្លួនកាន់សាសនាអ៊ីស្លាមរ៉ូហ៊ីងយ៉ាសដោយផ្ទាល់ភ្នែក។ ជនភៀសខ្លួនរ៉ូហ៊ីងយ៉ាស ១សែន៤ម៉ឺននាក់ កំពុងតែជ្រកខ្លួនបណ្តោះអាសន្ន នៅរដ្ឋរ៉ាក់ឃីន។ ពួកគេត្រូវបានបណ្តេញចេញពីផ្ទះសម្បែង តាំងពីឆ្នាំ២០១២មក គឺក្រោយមានអំពើហិង្សាសហគមន៍រវាងអ្នកកាន់ពុទ្ធសាសនា និងសាសនាអ៊ីស្លាម នៅរដ្ឋរ៉ាក់ឃីន។
បេសកជនអង្គការសហប្រជាជាតិ យ៉ាំងហឺ លី បានលើកឡើងទៅអ្នកសារព័ត៌មានថា ស្ថានភាពនៅជំរំជនភៀសខ្លួនក្នុងតំបន់ស៊ីតវេ រដ្ឋរ៉ាក់ឃីន មិនល្អសោះឡើយ។ លោកស្រីលី គិតថា ជនភៀសខ្លួនមិនបានទទួលសេវាជំនួយ សមស្របទេ។ បេសកជនអង្គការសហប្រជាជាតិរូបនេះ បានសុំរដ្ឋាភិបាលភូមាអោយដោះស្រាយអោយខ្លាំងក្លា នូវបញ្ហាជម្លោះសាសនា ដែលតែងកើតឡើងក្នុងស្រុក។
ក្នុងទស្សនកិច្ចនៅភូមា លោកស្រី យ៉ាំងហឺ លី ក៏បានចុះទៅរដ្ឋកាឈីន នៅភាគខាងជើងផងដែរ។ នៅទីនោះ ក៏មានជនភៀសខ្លួនដែរ គឺមានប្រមាណ១សែននាក់។ ពួកគេបានរត់គេចចេញពីការប្រយុទ្ធរវាងក្រុមឧទ្ទាមជនជាតិភាគតិច និងកងទ័ព កាលពីខែមិថុនា ឆ្នាំ២០១១។ កងទ័ពនិងក្រុមឧទ្ទាមបានប្រយុទ្ធគ្នាឡើងវិញ ១៧ឆ្នាំក្រោយមានបទឈប់បាញ់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ