ភូមាដុតបំផ្លាញអាភៀន២,៥តោនជានិមិត្តរូប
អាជ្ញាធរភូមាបានដុតកម្ទេចអាភៀនចំនួន២តោនកន្លះ នៅថ្ងៃ២៦មិថុនា ម្សិលមិញនេះ។ ការបំផ្លាញអាភៀនទ្រង់ទ្រាយធំប៉ុន្នេះក៏ដោយ ក៏មិនមានការប៉ះពាល់ដល់លំដាប់ថ្នាក់ពិភពលោក របស់ភូមាដែលជាប្រទេសនាំអាភៀនចេញធំជាងគេទីពីរ បន្ទាប់ពីអាហ្វហ្គានីស្ថាន។ យោងតាមសម្តីរបស់បុគ្គលិក ទទួលខុសត្រូវអង្គការប្រយុទ្ធប្រឆាំងនឹងថ្នាំញៀនប្រចាំការនៅភូមា លោកថានេះគ្រាន់តែជាសម្តែងបង្ហាញឲ្យគេឃើញ ថាភូមាខិតខំទប់ស្កាត់ការផលិតអាភៀន។
ចុះផ្សាយនៅថ្ងៃ៖
ស្តាប់ - ០១:៤០
នៅភូមាមានចំការដាំអាភៀនមិនតិចជាង៥៧៨០០ហិកតាទេ ហើយទំហំនេះកើនឡើងជារៀងរាល់ឆ្នាំ។ យោងតាមសម្តីរបស់តំណាងអង្គការប្រយុទ្ធប្រឆាំងគ្រឿងញៀនម្នាក់ នៅឆ្នាំ២០១៣កន្លងទៅការផលិតថ្នាំញៀននៅភូមា មានការកើនឡើងយ៉ាងខ្លាំងមិនដែលធ្លាប់មាន។ លោកថាឆ្នាំ២០១៤នេះក៏មានការកើនឡើងខ្លាំងណាស់ដែរ បើទោះណាជាពេលនេះលោកនៅពុំទាន់មានទិន្ន័យច្បាស់លាស់ក៏ដោយ។
លោកថាន់ គីនមុង ដែលជាភ្នាក់ងារប្រយុទ្ធប្រឆាំងគ្រឿងញៀនភូមាបានមានប្រសាសន៍ថា ដោយសារតែភូមានៅតែមិនទាន់ដោះស្រាយជម្លោះ ជាមួយក្រុមជនជាតិភាគតិចនៅរដ្ឋហ្សានទើបរដ្ឋាភិបាលនៅមិនទាន់អាចទប់ស្កាត់ការផលិតអាភៀនទាំងស្រុងឲ្យមានប្រសិទ្ធិភាព។ សូមបញ្ជាក់ថារដ្ឋហ្សាន គឺជារដ្ឋមួយដ៏ធំនៅតំបន់ភ្នំ ភាគខាងជើងប្រទេសភូមា។ រដ្ឋនេះមានជនជាតិភាគតិចជាច្រើនក្រុមរស់នៅហើយដែលរបរកសិកម្មចំបងគឺការដាំអាភៀន។
ជាការពិតណាស់ ដែលថាជម្លោះជាមួយក្រុមសហគមន៍ជនជាតិភាគតិចនៅភាគខាងជើង មិនអាចអនុញ្ញាតឲ្យអាជ្ញាធររដ្ឋភូមាបំពេញកាតព្វកិច្ចក្នុងការកាត់បន្ថយការផលិតអាភៀន ប៉ុន្តែទន្ទឹមនឹងនោះមានមន្ត្រីក្នុងជួររដ្ឋាភិបាលភូមាខ្លួនឯងផ្ទាល់ដែលបាន ឆ្លៀតឱកាសជំរុញការផលិតអាភៀន និងថ្នាំញៀនផ្សេងៗ ដោយបានប្រព្រឹត្តអំពើពុករលួយ ឃុបឃិតជាមួយឈ្មួញ។
ប្រទេសថៃដែលជាប្រទេសក្បែរខាង មានអ្នកសេពគ្រឿងញៀនដ៏ច្រើនលើសលប់។ ថ្នាំញៀនដែលគេប្រើភាគច្រើនជាងគេនៅប្រទេសថៃ គឺមេតំហ្វេតាមីនដែលជាថ្នាំញៀនឆ្នៃចេញពីអាភៀន។ ថ្មីៗនេះ អាជ្ញាធរថៃបានដុតកម្ទេចថ្នាំញៀនប្រមាណជា៣តោនដែរ។ អំណាចយោធាថៃដែលទើបនឹងក្តោបក្តាប់អំណាចចាប់តាំងពីមួយខែកន្លងមកនេះ បានសន្យាថានឹងលុបបំបាត់នូវការប្រើប្រាស់ និងការជួញដូរគ្រឿងញៀនឲ្យបានក្នុងប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ