អាមេរិកថាមាគ៌ាប្រជាធិបតេយ្យនៅភូមានៅសល់វែងឆ្ងាយតទៅទៀត
ភូមាកំពុងទទួលរៀបចំកិច្ចប្រជុំកំពូលថ្នាក់រដ្ឋមន្ត្រីការបរទេសអាស៊ាន នៅទីក្រុងណៃពីដ៏រ។ កិច្ចប្រជុំនោះក៏មានការចូលរួមរបស់មហាអំណាចទាំងបី និងជាដៃគូពាណិជ្ជកម្មដ៏សំខាន់របស់បណ្តារប្រទេសអាស៊ាន គឺចិន ជប៉ុន និងសហរដ្ឋអាមេរិក។ ថ្លែងក្នុងពេលជួបផ្ទាល់ជាមួយលោកប្រធានាធិបតីភូមា លោកប្រមុខការទូតអាមេរិក ចន ឃេរី បានថ្លែងអបអរនូវដំណើរបោះជំហានលទ្ធិប្រជាធិបតេយ្យនៅភូមា តែលោកថាដំណើរនេះ គឺស្ថិតនៅលើផ្លូវដែលមានចំងាយឆ្ងាយតទៅទៀត។
ចុះផ្សាយនៅថ្ងៃ៖
ស្តាប់ - ០១:៣៦
លោកប្រមុខការទូតអាមេរិក ចន ឃេរី បានជួបសន្ទនាជាឯកជនជាមួយលោកប្រធានាធិបតីភូមា ថេន សេន នៅថ្ងៃសៅរ៍ម្សិលមិញ។ ក្នុងឱកាសនោះ លោក ចន ឃេរី បានមានប្រសាសន៍សរសើរចំពោះដំណើរវិវឌ្ឍន៍នៃលទ្ធិប្រជាធិបតេយ្យនៅភូមា ក្នុងរយៈពេល៣ឆ្នាំកន្លងមកនេះ។ ប៉ុន្តែទោះជាយ៉ាងណា លោកបានឆ្លៀតរិះគន់ថា ភូមាត្រូវតែខឹតខំប្រឹងប្រែងជាងនេះទៀត ក្នុងការធ្វើកំណែរទម្រង់ កសាងលទ្ធិប្រជាធិបតេយ្យមួយឲ្យបានពេញលេញ តួយ៉ាងដូចជាការគោរពសិទ្ធិបញ្ចេញមតិ សិទ្ធិសេរីភាពសារពត៌មានជាដើមដែលភូមានៅមានកង្វះខាត។ ផ្ទុយទៅវិញ លោក ចន ឃេរី បានគ្រាន់តែថ្លែងសរសើរភូមាប៉ុណ្ណោះ ក្នុងពេលបើកកិច្ចប្រជុំទ្វេរភាគីអាមេរិក-អាស៊ាន។
សូមបញ្ជាក់ថារបបសឹកភូមាដែលបានកាន់កាប់អំណាចផ្តាច់ការអស់រយៈពេលជាច្រើនទសវត្ស ត្រូវបានរំលាយចោលកាលពីឆ្នាំ២០១១។ រដ្ឋាភិបាលភូមាបច្ចុប្បន្នបានធ្វើការដោះលែងអ្នកទោសនយោបាយជាច្រើនរូប ព្រមទាំងបានអនុញ្ញាតឲ្យគណបក្សប្រឆាំងរបស់លោកស្រី អ៊ុងសាន ស៊ូជី បានចូលរួមក្នុងការបោះឆ្នោតសភាទៀតផង។ ដោយឃើញរបត់នយោបាយវិជ្ជមានបែបនេះ រដ្ឋាភិបាលអាមេរិកបានដកចេញជាបន្តបន្ទាប់នូវទណ្ឌកម្មសេដ្ឋកិច្ចចេញពីភូមា។
ជាការពិតណាស់ សម្តីរបស់លោក ចន ឃេរី នាពេលនេះ ហាក់ដូចជាអង្អែលផង ខោកផង ព្រោះថាទន្ទឹមនឹងសរសើរភូមាថាបានរីកចម្រើន តែលោកក៏បានរិះគន់ភូមាថាមិនយកចិត្តទុកដាក់ក្នុងការលើកកម្ពស់ការគោរពសិទ្ធិមនុស្ស ឧទាហរណ៍ទាក់ទិនទៅនឹងការចាប់ខ្លួនអ្នកសារពត៌មាន និងការព្រងើយកន្តើយបណ្តោយឲ្យមានអំពើហិង្សា លើប្រជាជនកាន់សាសនាអ៊ីស្លាម នាពេលកន្លងមកនេះ។ សូមរំលឹកថា អំពើហឹង្សាដែលកើតមានឡើងនៅតំបន់រ៉ាឃីន បង្កដោយក្រុមជនភូមាកាន់ពុទ្ធសាសនាជ្រុលនិយម បានធ្វើទុក្ខបុកម្នេញទៅលើប្រជាជនកាន់សាសនាអ៊ីស្លាម ក្នុងនោះមានស្លាប់២០០នាក់ និងជាង១៤ម៉ឺននាក់ដែលត្រូវបានភាសខ្លួនចេញពីលំនៅដ្ឋាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ