គ្រុនផ្តាសាយបក្សីលេចឡើង នៅជប៉ុន បន្ទាប់ពីស្ងាត់បាត់ បីឆ្នាំ
ក្រសួងកសិកម្មជប៉ុនបានចេញបញ្ជាឲ្យសម្លាប់សត្វបក្សីជាងមួយសែនក្បាល បន្ទាប់ពីមានសេចក្តីរាយការណ៍ នៅថ្ងៃអាទិត្យទី ១៣ មេសា ពីករណីផ្ទុះ ជម្ងឺផ្តាសាយបក្សីនៅកសិដ្ឋានចញ្ចឹមមាន់ ពីរ នៅភាគខាងត្បូងប្រទេសជប៉ុន។ ចាប់តាំងពីស្ងប់ស្ងាត់អស់បីឆ្នាំ នេះជាលើកទីមួយ ដែលអាជ្ញាធរជប៉ុនរកឃើញការផ្ទុះឡើងជម្ងឺគ្រុនផ្តាសាយបក្សី នៅជប៉ុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
កាលពីថ្ងៃសៅរ៍ ម្ចាស់កសិដ្ឋានចិញ្ចឹមសត្វមួយកន្លែង នៅខេត្តគូម៉ាម៉ូតូ បានរាយការណ៍ទៅប៉ូលិស បន្ទាប់ពីមាន់របស់គាត់ជាច្រើនក្បាល បានដួលងាប់ជាបន្តបន្ទាប់។ ការធ្វើតេស្តសាកល្បងរបស់មន្រ្តីកសិកម្មបានបង្ហាញថា មាន់នៅក្នុងកសិដ្ឋាន នៅខេត្តគូម៉ាម៉ូតូមានផ្ទុកមេរោគ គ្រុនផ្តាសាយបក្សី។
នៅថ្ងៃអាទិត្យនេះ អាជ្ញាធរបានបញ្ជាឲ្យគេសម្លាប់មាន់ទាំងអស់ នៅក្នុងកសិដ្ឋានទាំងពីរ ដែលមានម្ចាស់តែមួយ ពោលគឺប្រមាណជាងមួយសែនក្បាល។ យ៉ាងណាក៏ដោយអាជ្ញាធរជប៉ុនបានធានាអះអាង មេរោគគ្រុនផ្តាសាយនេះនឹងមិនឆ្លងទៅមនុស្ស តាមរយៈការបរិភោគពងមាន់ ឬសាច់មាន់ឡើយ។
នៅក្នុងសេចក្តីប្រកាសព័ត៌មាន ក្រសួងកសិកម្មជប៉ុនបានអំពាវនាវផងដែរដល់ម្ចាស់កសិដ្ឋានជប៉ុនឲ្យប្រុងប្រយ័ត្ននឹងការរាតត្បាតរបស់មេរោគ ដែលកំពុងលុកលុយ នៅអាស៊ី ជាពិសេស នៅកូរ៉េខាងត្បូង ដែលជាប្រទេសជិតខាង និងនៅ ចិន ជាទីដែលមេរោគ គ្រុនផ្តាសាយបក្សីបានសម្លាប់មនុស្សជាងមួយរយនាក់ ក្នុងរយៈពេលមួយឆ្នាំចុងក្រោយនេះ។
កាលពីថ្ងៃសៅរ៍ អាជ្ញាធរបានហាមឃាត់មិនឲ្យមានដំណើរដឹកសត្វ ចេញ ឬចូលខេត្តគូម៉ាម៉ូតូ ឬកសិដ្ឋានដែលកំពុងឆ្លងដោយមេរោគគ្រុនផ្តាសាយបក្សី។ នៅថ្ងៃនេះ អាជ្ញាធរជប៉ុននៅបន្តបាញ់ថ្នាំ សម្លាប់មេរោគ នៅក្នុងកសិដ្ឋានទាំងពីរ ដើម្បីទប់ស្កាត់ការឆ្លងរាតត្បាតទៅកន្លែងដទៃ។ បន្ទាប់មកទៀត អ្នកជំនាញ នឹងទៅពិនិត្យកសិដ្ឋានទាំងពីជាថ្មី ដើម្បីស្វែងយល់រកប្រភពដែលធ្វើឲ្យកសិដ្ឋានរងការរាតត្បាតពីមេរោគ គ្រុនផ្តាសាយបក្សី។
សូមបញ្ជាក់ថា ការរាតត្បាតរបស់មេរោគគ្រុនផ្តាយបក្សី កើតមាន ចុងក្រោយ នៅជប៉ុន នៅខែមីនា ឆ្នាំ ២០១១ គឺកាលពីបីឆ្នាំមុន នៅ តាមបណ្តាខេត្ត ដែលស្ថិតនៅភាគខាងជើងជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ