កម្ពុជា -

អត្ថបទចុះផ្សាយនៅថ្ងៃ អាទិត្យ 29 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ អាទិត្យ 29 កក្កដា 2012

ពលរដ្ឋបឹងកក់បញ្ចេញប្រតិកម្មតបនឹងការចោទប្រកាន់របស់អភិបាលក្រុងភ្នំពេញ

ពលរដ្ឋសហគមន៍បឹងកក់បង្ហាញឯកសារ ដើម្បីតបនឹងការចោទប្រកាន់របស់លោកអភិបាលក្រុងភ្នំពេញ

ដោយ គីន ហត្ថារ៉ូ

ជម្លោះដីធ្លីនៅក្នុងសហគមន៍បឹងកក់ បានផ្ទុះឡើងចាប់តាំងពីឆ្នាំ២០០៧ រហូតមកដល់បច្ចុប្បន្ន រវាងក្រុមហ៊ុនស៊ូកាកូអ៊ីន ដែលធ្វើវិនិយោគដើម្បីប្រែក្លាយតំបន់នោះឲ្យទៅជាតំបន់រមណីយដ្ឋាន និងអាគារពាណិជ្ជកម្ម។ គម្រោងនោះបានធ្វើឲ្យប៉ះពាល់ពលរដ្ឋជាង៤០០០គ្រួសារ។ ពលរដ្ឋរស់នៅក្នុងតំបន់នោះ បានបញ្ចេញនូវប្រតិកម្មយ៉ាងខ្លាំងៗ កាលពីព្រឹកមិញ ប្រឆាំងនឹងលោកអភិបាលក្រុង កែប ជុតិមា ដែលបានធ្វើបទសម្ភាសន៍ក្នុងទូរទស្សន៍ក្នុងស្រុកមួយ ចោទប្រកាន់ពលរដ្ឋបឹងកក់ថា យករឿងបឹងកក់ប្រែក្លាយទៅជារឿងនយោបាយចងជើងរូបគាត់។

សេចក្តីរាយការណ៍របស់គីន ហត្ថារ៉ូ ពីទីក្រុងភ្នំពេញ

ស្តាប់ (02:27)

29/07/2012

ពលរដ្ឋជាង៥០គ្រួសារ នៅក្នុងសហគមន៍បឹងកក់ បញ្ចេញប្រតិកម្មប្រឆាំងតបទៅនឹងលោកកែប ជុតិមា អភិបាលរាជធានីភ្នំពេញ ដែលបានចោទប្រកាន់ពួកគេថា រស់នៅលើទឹក ដែលជាសម្បត្តិរបស់រដ្ឋ និងយករឿងបឹងកក់ធ្វើជារឿងនយោបាយ។

ប្រតិកម្មរបស់ពលរដ្ឋបឹងកក់បានធ្វើឡើងតាមរយៈសន្និសីទសារព័ត៌មាននៅព្រឹកមិញ នៅក្នុងសហគមន៍បឹងកក់ បន្ទាប់ពីលោកកែប ជុតិមា បានធ្វើបទសម្ភាសន៍នៅក្នុងទូរទស្សន៍ក្នុងស្រុកមួយ កាលពីយប់ថ្ងៃទី ២៦ ខែកក្កដា ដោយមានប្រសាសន៍ថា ពលរដ្ឋបឹងកក់ទទួលបានប្លង់ជាង ៨០០គ្រួសារហើយ រីឯចំនួន៦៤គ្រួសារផ្សេងទៀតរស់នៅលើទឹក ដែលជាដីរបស់រដ្ឋ គ្មានឯកសារគ្រប់គ្រាន់ និងចោទពលរដ្ឋថាយករឿងបឹងកក់ធ្វើជារឿងនយោបាយចងជើងគាត់។

ពលរដ្ឋទាំងអស់បានលើកឡើងនៅក្នុងសន្និសីទសាព័ត៌មានថា ការលើកឡើងរបស់លោកអភិបាលក្រុងបែបនេះ គឺជាការមិនទទួលខុសត្រូវ អសមត្ថភាពក្នុងការដឹកនាំ និងព្យាយាមលាក់បាំងការពិត។ ផ្ទះពលរដ្ឋដែលអាជ្ញាធរនិងក្រុមហ៊ុនបូមខ្សាច់ពន្លិច និងវាយកម្ទេចនោះ សុទ្ធតែមានឯកសារបញ្ជាក់គ្រប់គ្រាន់ ទទួលស្គាល់ដោយអាជ្ញាធរដែនដី។

ដោយមានបង្ហាញទាំងឯកសារដូចជាប័ណ្ណស្នាក់នៅ និងលិខិតជូនដំណឹងរបស់សាលាក្រុងភ្នំពេញតាំងពីឆ្នាំ២០០៧នោះ ពលរដ្ឋបានអះអាងថា ការចោទប្រកាន់របស់លោកអភិបាលរាជធានីភ្នំពេញ ដែលបានថ្លែងតាមរយៈបទសម្ភាសន៍នៅក្នុងទូរទស្សន៍នោះ គឺបានបំផ្លើសពីការពិត ហើយថា លោកអភិបាលក្រុងមិនគួរធ្វើភ្លេច មិនដឹងមិនឮនោះទេ គួរតែពិចារណាឡើងវិញ។ ហើយការលើកឡើងរបស់លោកអភិបាលក្រុងដែលថាយករឿងបឹងកក់ធ្វើជារឿងនយោបាយនោះ តាមពិតលោកអភិបាលក្រុងខ្លួនឯងជាអ្នកយករឿងរបស់បឹងកក់ប្រែក្លាយទៅជារឿងនយោបាយ ដើម្បីបិទបាំងអំពើអាក្រក់ និងអំពើពុករលួយរបស់ខ្លួន។

មន្ត្រីសាលាក្រុងភ្នំពេញបានបដិសេធពុំធ្វើការអត្ថាធិប្បាយ ដើម្បីឆ្លើយតបទៅនឹងប្រតិកម្មរបស់ពលរដ្ឋនោះទេ កាលពីព្រឹកមិញ។

នៅក្នុងជម្លោះតាំងពីឆ្នាំ២០០៧ ដែលសាលាក្រុងភ្នំពេញបានចុះកិច្ចសន្យាជួលដីទំហំ១៣៣ ហិកតា ឲ្យទៅក្រុមហ៊ុនឯកជនស៊ូកាកូអ៊ីន ដើម្បីវិនិយោគប្រែក្លាយទៅជាតំបន់រមណីយដ្ឋាន អាគារពាណិជ្ជកម្មនោះ បានធ្វើឲ្យប៉ះពាល់ពលរដ្ឋជាង៤០០០គ្រួសារ។ នៅក្នុងជម្លោះនោះដែរ ស្ត្រីក្នុងសហគមន៍បឹងកក់១៣នាក់ ត្រូវបានអាជ្ញាធររាជធានីភ្នំពេញចាប់ឃុំខ្លួនក្នុងពន្ធនាគារព្រៃស ដោយសាលាដំបូងរាជធានីភ្នំពេញសម្រេចផ្តន្ទាទោសឲ្យជាប់ពន្ធនាគារពីមួយឆ្នាំទៅពីរឆ្នាំកន្លះ ពីបទប្រឆាំងមន្ត្រីរាជការសាធារណៈ និងបំពានកាន់កាប់អចលនវត្ថុរបស់នីតិបុគ្គលសាធារណៈ។ ប៉ុន្តែស្ត្រីទាំងនោះត្រូវបានក្រុមប្រឹក្សាចៅក្រមសាលាឧទ្ធរណ៍បន្ថយទោសមកនៅត្រឹម១ខែ៣ថ្ងៃ៕