អ្នកភូមិបឹងកក់ស្វែងរកជំនួយពីធនាគារពិភពលោកបន្ទាប់ពីបរាជ័យក្នុងការពិភាក្សា
ប្រជាពលរដ្ឋនៅតំបន់បឹងកក់ និងអតីតអ្នកបឹងកក់ បានដាក់ញត្តិទៅធនាគារពិភពលោក នៅព្រឹកថ្ងៃព្រហស្បតិ៍នេះ ដើម្បីស្វែងរកអន្តរាគមន៍ពីស្ថាប័នហិរញ្ញវត្ថុដ៏ធំនេះ ក្នុងការតាមឃ្លាំមើលដំណើរការដោះស្រាយបញ្ហាដីធ្លីជាមួយនឹងសាលារាជធានីភ្នំពេញ។ ការពឹងពាក់ធនាគារពិភពលោករបស់អ្នកភូមិនៅពេលនេះ គឺដោយសារតែមិនមានដំណោះស្រាយកាលពីពីរថ្ងៃមុន ដោយអ្នកតវ៉ាចង់បានទំហំដីដែលគេគ្រប់គ្រងពីមុន តែសាលាក្រុងមិនមានលទ្ធភាពដោះស្រាយជូន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ជាថ្មីម្តងទៀតប្រជាពលរដ្ឋដែលរស់នៅតំបន់បឹងកក់និងអតីតអ្នកបឹងកក់ដោយមានការចូលរួមពីអ្នកគាំទ្រជាច្រើនទៀតប្រហែល១០០នាក់ នៅព្រឹកថ្ងៃព្រហស្បតិ៍ទី២៤មេសា បានដង្ហែរញត្តិទៅកាន់ធនាគារពិភពលោកដើម្បីឲ្យស្ថាប័នហិរញ្ញវត្ថុដ៏ធំមួយនេះ ជួយឃ្លាំមើលដោយផ្ទាល់រាល់ដំណោះស្រាយដីធ្លីរវាងសហគមន៍ពួកគេនិងអាជ្ញាធររាជធានីភ្នំពេញ។
នៅក្នុងលិខិតរបស់អ្នកភូមិបឹងកក់ចុះថ្ងៃទី២៤ខែមេសាឆ្នាំ២០១៤ ដែលបានដាក់ទៅកាន់ប្រធានធនាគារពិភពលោក ដែលអមដោយស្នាមមេដៃប្រជាជនភូមិ១ ចំនួន១៤គ្រួសារនោះឲ្យដឹងថាប្រជាពលរដ្ឋស្នើឲ្យធនាគារពិភពលោកមានកិច្ចអន្តរគមន៍ដោយផ្ទាល់រាល់ពេលដែលសាលារាជធានីភ្នំពេញកោះហៅប្រជាពលរដ្ឋចូលជួបស្វែងរកដំណោះស្រាយ សូមឲ្យមានតំណាងធនាគារពិភពលោកមួយរូបដែលអាចឲ្យដឹង និងទទួលព័ត៌មានពិតពីការពិភាក្សារកដំណោះស្រាយដីធ្លីជាក់ស្តែង។
ការដាក់ញត្តិនេះគឺធ្វើឡើងបន្ទាប់ពីប្រជាពលរដ្ឋបឹងកក់ចំនួន ១៤គ្រួសារបានជួបជជែកគ្នាជាមួយ អភិបាលរាជធានីភ្នំពេញ កាលពីថ្ងៃទី២២ មេសាដោយមិនមានលទ្ធផលអ្វីទាំងអស់។មិនបានផលដោយសារតែដំណោះស្រាយរបស់សាលាក្រុងដែលបានផ្តល់ដល់ប្រជាជនទាំងនោះក្នុងមួយគ្រួសារនូវដីទំហំ ៤ម៉ែត្រ គុណនឹង១៨ម៉ែត្រ ទោះបីជាប្រជាពលរដ្ឋមានទំហំដីពីមុនធំប៉ុណ្ណាក៏ដោយ ក៏ត្រូវបានទទួលគោលការណ៍នេះដែរ ព្រោះវាជាការសម្រេចរបស់លោកនាយករដ្ឋមន្ត្រីហ៊ុន សែន។តាមអ្នកភូមិបឹងកក់, ប្រធានធនាគារពិភពលោកប្រចាំនៅប្រទេសកម្ពុជាបានសន្យាថា នឹងព្យាយាមជួយក្រុមអ្នកតវ៉ាក្នុងការស្វែងរកដំណោះស្រាយបញ្ហាដីធ្លីនេះបន្ថែមទៀត។
ជាមួយគ្នានេះ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានថ្លែងប្រាប់វិទ្យុបារាំងអន្តរជាតិ RFI ថាការដែលមិនបានត្រូវរ៉ូវគ្នានៅក្នុងការជជែកគ្នាកាលពីថ្ងៃមុនគឺដោយសារអ្នកភូមិបឹងកក់ទាំងនោះ បានទាមទារនូវទំហំដីដើមរបស់ពួកគេ ដែលការទាមទារនោះហួសលទ្ធភាពសាលារាជធានីផ្តល់ជូន។
សូមបញ្ជាក់ថា ជម្ល៉ោះដីធ្លីរ៉ាំរ៉ៃនៃតំបន់បឹងកក់ តម្រូវឲ្យមានអន្តរគមន៍ពីលោក ហ៊ុន សែន ដោយលោកនាយករដ្ឋមន្ត្រីកាលពីឆ្នាំ២០១២ បានសម្រេចផ្តល់ដីនៅតំបន់បឹងកក់ចំនួន១២,៤៤ហិចតាដល់អ្នកតវ៉ាតំបន់បឹងកក់ទាំងអស់ប្រមាណជា៧០០គ្រួសារ ហើយដីដែលត្រូវដោះស្រាយឲ្យប្រជាជន១៤គ្រួសារនៅពេលនេះគឺស្ថិតនៅក្នុងទំហំផ្ទៃដីនោះដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ